MY BRIEF MEMOIRS OF ZSP AND ZOD(1984-2008)

Lâibu Tungtâng

Tami lâibu in a gên thupipên ahileh,i sep i bawl sunte khu a thawn in a mangthang sih dínga,leitung leh vântung ah, teptê(ciepte) leh thei zing in a na omden hi,ci khu a thupi(theme) ahi. Tunia,silkhat i bawl khu mawh bawl mawh sep ci omthei lou ahia, Pu.Isaac Newton in a gên mabangin, ‘Every action has equal and opposite reaction’ a na ci mabangin,i pawlpi sung,i society sunga,i sephoi leh a gâhoi puoh ahia,i sepkhiel leh a gâsie(hût) puoh ahi.

Leisiet ah,damlâi niteng in,bangbang bawl ma lei zong,mi tamzawte pen i nêh i tâh buoipi i hi uhhi. Lungsim sinsim ngaituona zang mite pen leitung ah kitawm mama hi,zâlah ah sawm(10%) zong cing zou kha lou maithei ahihi.

Eima’n i lungsim a a’ng om zuai khat poupou i gênthei pouleh,cia thu leh la mawh gên lou leh mawh sât lou díng ahidân a’ng musah a ,a’ng theisah hi. Leitung a’ng pil deudeu a,koima mawh simmaw leh mawh dudah bawllou díng ahidân zong a ensah hi. Kizâtâttuona khu piendân hoi mama ahi.

Zo thupil khat in hici in a gên hi, ‘Ni mu masa,hla mu masa,zâtât un’a ci hi. Zo ngaina dânin, nâuzawte’n uzawte a zâtât díng uh,kici pen kitasamta mama in tami lâibu sungah a kimudoh hi. Delhi khopi sunga intên kipneite leh lâisim zuai a,hing om;sângnâupangte kitêthei lou ahi. Pienna Nu leh Pate oplouna mun a,intên detneite khu sângnâupangte’ Nu leh Pate ahi uhhi,ci khu tami lâibu sungah a kimuthei hi.

Zokhankhuol a op leh Zokhandâl zong a om hi,cithute kicientahin tami lâibu tungpan in a kitheithei hi.

Thumakâi(Preface)

Hun leh nite’n ei ngâhlou in a bei zungzung hi. Theilou kâlin i tâte uh a’ng khanglien u’a,mi picing a’ng suohta uhhi. Ei pen têhtheilou, vuoitheilou dânin i na kingaisut zing uh leh,tuaci na hilou mawh hi. I sep i bawlte uh zong bangtan a,gâsuoh ahiei ? ci’n nua-et kia ta lei, kiletsahtah a,i gêndoh díng uh leh,i tângkoupi díng uh,bangma kimu lou maithei ahi. Ei lah,sémgim,hawmgim,lêlcim,hâmcim kisa na ma vâi in,i society sunga i gên,i tohte in bangtan tongkha ahia,bangtan sukha ahia,bangtan susie ahia,bangtan suhoi,siemhoi i hia,bangtan suzang i hi ei? cite eima mimal a kidoh kawmkawm hun ahita hi,ciin ka um hi. Leitung ah mihing tamzawte pen lungkimna neilouin hinkhuo mang in a khosa uhhi. Mihing pawlkhatte ahileh,thuneina kitu uh,kimkhatte ahileh thu a kitu u’a,pawlkhatte lêulêu kia lah,pilna siemna kidem in a hunteng uh a zang bei uhhi. Mihing pawlkhatte pen Pasien thu sui lele in a hinkhuo a zang bei uhhi. Mihing kimkhatte in a hinkhuo uh milieng vâi, genthei, tagate díngin a zang bei uhhi. Mihing kimkhat kia lêulêu ahileh,bangma ngaituo manlou in,a damsung nite uh,tui zah in a zangthâng suhthop mai uhhi. Mihing kimkhat lah,sum leh pâi,nei leh lam,gou leh lam sui kawikawi in leitung muncinteng a tuon lele uhhi. Mihing kimkhat pen bangci leh solte leh âhsite sungah a kitungthei diei? ciin lungsim tuottuot in a hinkhuo uh a zang bei uhhi. Mihing pawlkhatte lah,leitung nopsahna sui kawikawi in uimaw gamphu bangin a vâh kawikawi uhhi. Mihing pawlkhatte lah,bangma bawl díng neilou in thusie lasie gêl,gên,thêzâh in a damsung nite uh a zang bei uhhi. Lâi Siengthou in a gên ma bangin leitung a thupina toh bei leltah díng ahihi. Leitung thupina,lalna leh letna kitu in mihingte a buoi zêngzûng uh hi. Nang leh kei bang toh i buoi uh e? Tami memoirs sunga thute ahileh,ka lungsim sunga ka na mêlci nalâi thute ahi. Record bu sunga kikhumlûtte leh kikhumlûtloute kigawm a ka’ng bawl ahi. Lungsim sunga kimêlci thute tampi a tel ziehin tami lâibu min pen ‘My Brief Memoirs of ZSP and ZOD(1984-2008) ciin ka minvaw hi.

Delhi khopi tuol ka tuh langkalsie,kum 12 a’ng vâl touta hi. I gâsuo na uoi? i gâsuola uoi? cia ei leh ei kidoh hun ahita hi. I Society uh bang ci’n i pûihoi thei díng uoi? ci lam thute gêlkhawh ciet díng deihuoi ka sa hi. Sângnâupangte’n amauh leh amauh a kidohcien díng uh ahileh; ka sep ka bawl díng lawmte ka bawl in ka sêm na’i mah? Ka tup ka ngîmna lampi lam ka zûi zing na’i mah? cite ahi. Ka nu ka pate kinepna leh lam-etna ka lawcingsah zou na diei mah? Ka zi ka tâte bangin ka vâ díei? ka gam ka lei in hâi bang ei ngâh ahi ci khu ka thei zing na’i mah? cithute kingaituo gige uh henlen,hileh,deisahhuoi mama hi. Tam Delhi khopi ka têndenna díng mun leh gam hisih,na ci leh, na gam in hâi bang na’ng ngâhla mama hi,cikhu thei khinkhian in,kalsuon zing va ui.Zola lûi mama khat in nâupangte hici in,na hil hi; ‘Bawi aw,hing khang mêngmêng in,nu tha,na pa tha dawn zâng díngin aw’..... Nu tha,Pa tha dot zâng lampang gênda vâi in,eimama khankhuo zong i kidawn zâng zou na’i mah? i kikhuol zou na’i mah? ciin kidong ciet in,tualeh ki-entha ciet va ui,pi leh pute,nu leh pate,u leh naute aw.

Ka lungdam e.

Lâigiel

Philip Thanglienmâng

DANICS B.E(Civil Engineer),M.A(Linguistics)

Sources: 1. My Personal Diary of 1984 A.D

2.My memoirs,My collection of Zokuawmthawn/ Zokuomthawn news,ZOD records etc.

SINGTOM Z.S.P GENERAL CONFERENCE 1984 THUTE:

1983 kum Zînghla ni 14 niin, ZSP General Hqtrs President Pu Michael Ginzasuon lamkaina in ZSP Chandel Block na kiphut hi.
1984 kum in Pu Jacob Nâuthang in President, Chandel block panmun a na luo hi. Pu Joseph Khenkhanmang@ Mângvom Secretary in na pang hi. Amani kûkalna zâl in,Chandel Block in inntêhna na la in,Pu Michael Ginzasuon leh Pu Francis Zâmkhanthang@Ringote’n President leh General Secretary a na puoh lâitah un,Zomi Sangnaupang Pawlpi General Conference a 30 veina Singtom vângkhuo ah 1984 kum Doupi hla ni 15th patin ni 18th kikâl sungin thupitah leh nuomtahin na kimangkhawm hi. Kei’a díngin ZSP General Conference ka telna amasapên leh anukhiapên ahihi. ZSPHqtrs makâite zintunna; Special inn khat a na kituomkoi hi.
Kei pen Morvi(Gujarat) a,B.E(Civil Engineering) ka zil lâitah ahia,ka opna gam panin suti ka na la a,Conference mangin,ka’ng haw hi. ZSP General Conference panpina díngin a poimaw pen sum sûi in ZSP Canteen Manager in ka na pang luòng hi.Canteen sai in ka na pumbuoi hi.Phamsa,ka u Lucy Lamching in nâhpitahin ei na kithuopi hi. Nungâh-tangvâlte kuva hlâi a na sua mama u’a,kuva pen nêhthei lah a na kikhilai mun pen uh ahi. Zawlhêlna vanzah hoipên khat zong na hihi. Eimite nêhthei leite ahileh; zatep, khaini, kuva, mithai, puri, niengtui(singpi) cite ahihi.
Khawmpi hun a,Zinlien Pu.Satkholal,MOS(IFCD) na hihi. Churachandpur district; Gûngâl lam panin,UZO(United Zomi Organisation) President (L)Pu.Thangkhanlal, Dr. Lachin khai,Pu.T.C Tungnung, Pu.Kamdou, Pu.T.Semkholun,Pu.Barry Thangchinmang Zomi, Pu A.Nêhkhojâng, Pu.Lamkhothong, Pu.Hâumâng,Dr.Lampu Tâithul, Pu.Thangkhenkhup,Pu.Kâikhankâp, Pu.Dominic Khammêng,(L)Dr.Tongkhokâi, Pi.Vung zamawi,Pi.Chingkhokim leh adangdangte’n na jòu uhhi.
Chandel district sunga gûngâl patin Pu.Khupchinmâng MDC, Pu.Leo Kâmchinthang MDC,Subedar Peter Thangkhokâm, Subedar Lawrence Lângpum,Pu.Lienzathang Tâithul Chief ofSingtom,Pu. Zâmmâng Chief of Sugnu Lamhâng, Pu.Thangkhogin Chief of Sachih,Pu. Suonchinthang Chief of Kathuong leh mi tampite’n na uop uhhi. Phâipi leh Moreh(Tamu) panin zong mipi tampi in tua ZSP Khawmpi Lien a na uòp uhhi.

MISS LEH MR ZSP KITÊLNA
Doupi hla ni 16th niin Extempore Speech kidemna Zokam leh Mangkam in na om hi. Mi tampi na tel uhhi. Kei zong ka na tel a, ‘Mizawng’ leh ‘Love’ topic(thupi) ka na sâwkhâh hi. ZSP Miss leh Mr kitêlna a na om kia a, tuami hun ah,Miss Nienghauchîn in Miss ZSP a na la hi. Tualeh, Mr. Joseph Khenkhanmang in Mr.ZSP na la hi.
Doupi hla ni 17th niin,ZSP Bumper Lottery draw a na kinei hi. Ist Prize puonkhûina khawl(hieubawng) khat na hihi. Kidemna tuomtuomte a na om a,lasahna leh lâmkaina na om hi. Nitâhin mipi lênkhawmna na om a,nungâh tangvâlte lâmton in nun bang nuom tuolnuom na mang uhhi. Tuami nitâh lênkhawmna ah, Nh. Chinglunnieng in ‘Mîm bang I pienna Zolei gam nuom ah’ la pen ngaitahin a aw ngaiteng toh Singtom leh a kîmvêl a om khuo dangte thawn zên in a na sa hi.
Doupi hla 18th niin, Zinlien Pu.Sâtkholal a’ng na vâigei tâh ziehin sawtpi a na zilsa uh Zo lâm lahna toh kivâidot díng chipen a kilah nawnta sih hi. Hunzahna a na kinei a, zinlien thugenna, UZO President thugênna, ZSP President thugênna leh thugênna dangdang a na om hi. Tuazawin, letsong hawmna a na om hi.
MIPI ZÂNGTA LÂMKAINA
Nitâhin,zutung nekawm leh dawnkawm in Zo lâmtuol kaina in na zui paita hi. Pu Thangkhanlal MLApu in a .38mm pistol satkhie in, Zo laphuosiemte,Zo lâm siemte leh Pu Huotpau theizingna leh zâna in a thâunêu tang li(4) tah vântung lang dawikawm in, a na kâptou hi.Atawpna lamah, Bosconiens Musical Band a lasahsiem leh tumgingsiem; Michael Suonpu, Francis Ringo leh Dominic Khammêngte’n mipi ngâinuom la tampi na sa uhhi. Lasahsiem; Hâumâng,Ching lûnnieng leh ngâhnu tampite’n zong la ngaingai tampi a na sa uhhi. Singtom khomite’n zin tampi na dou(zintun) uhhi.

‘ZOVAKHU KOP BANG’ PIENNA THUTE
Tu-a a ka nuathei dânin Pu.Hâumâng in Singtom ZSP Conference hun sungin,ngâhnu mêlhoi mama khat a na ngâi hi. Tua ngâhnunu a na ît séngséng man in, mitphiel kâl in, “Zovakhu kop bangin= Singtom vângkhuo pan” (‘Tunia mêl a ka mu ngai Zozâm aw) kichi tu chienga la minthang pen khat a na phuodoh a,tuachiin Khawmpi vâiguon sungin,mipite mâitang ah ngaitahin a na sa khie hi. Mipite’n ngai a na sa u’a, ama a pâtâtmama uhhi. Hinanleh,tua ngâhnunu pen a ninu in zu-ûm a tunlusa ahimanin, a kingâina gêl na guitung zouta sih hi. Tua bânin,Pu.Hâumâng in zong zawlla zâtzât a na phuokhie hi. A laphuo pawlkhatte ahileh; Tulsing lêl a Saheipa bang,Sawm leh nga veipi, Kei Ngai heisa,Kei ka heina gam pan,Tulsing lêl a Saheipa bang, Solha hing tâng ngai aw leh a dangdangte ahihi. Ama pen Kishore Hâumâng na kici kêi hi.
ZOGAL LIMLAHNA
Tuami ni nitâh in,Mawng-awnte’n Zogal(1917-1919) limlahna (drama) a na nei uhhi. Tuami limlahna ka ngaituo chiengin I pu I pate namtatnate thupi ka sa mama hi. Tuni dongin zong ka mangngilthei sih hi. Tuami limlahna pen etnuomhuoi mama uhhi. Tuami zou in,mipi lênkhawmna zânlâi nai 12.00 tan in na om hi. Lênkhawmna a nop mama mai hi. Tu vângin(tu chiengin) pâpi ka hita a,hinanleh tua hunlâia ZSP General Conference nunnop guollâi ka mangngilthei sih hi. Bangchia mangtheikia díng ka hi diei? chi’n sumsiel bang lung ka sielsiel zêlta hi. Tua banga nunnuom zaidei awina,lie leh tângte lâmtâng kaina nuom ma e! aw nuom sâm e!.
Khum hunlâi a,lênlâi pe bang zilkia thei díng hileng nuóm sâm va’ng! Tua bang nunnop tuong hing tungthei kia leh chi’n hâi bang ngâh na lâi sâm va’ng e, Seinouguolte aw.
CHURACHANDPUR(LAMKA)
ZSP GEN.HQTRS AH BUOINA LIENPI NA PIENG
Tam thute na pien lâiin,tu-a simtu tamzawte na pieng panpan lâi díng uhhi. ZSP General Hqtrs hal lâi ci mai vai in,lamkâite leh sângnaupang tawmngâi pawlkhatte,kukaltahin a na pang uhhi.

1983 kum a Zo Holy Bible hing kihonkhie toh kituohin siltung tampi na pieng hi. Tuate lah ah, 1984-85 kum vêlin, ZSP General Headquarters in sawtpi khat a sut zingsa ZSP Magazine nei sunsun, ‘ZSP on the move’ (editor: Dominic Khammeng) kici pen Zoveng lamka thuom lâitah ah,tangvâl ni leh thum lamkaina in,kizâtuona bei in, a na hâltum uhhi.
Tuana kuón in, ZSP Headquarters lamte kitheisiemlouna leh ki-etdangna a na pieng hi. Tuachia,ZSP hqtrs lamte a’ng kisong-solawitâh ciengun, tuni dongin dei bangin tua hunlâi a bangzou ta sih hi! ZSP HQTRS pen âhnou tuikie bangin hing lah hing lou,si lah si lou in kum tampi a na om hi.
CHANDEL (SUGNU)
ZSP CHANDEL BLOCK KA NA HALSAH U’HI
1987 kum in,B.E(Civil Engineering) ka’ng zou a,sepna ka mu pailou ziehin, St.Joseph School Sugnu ah sângsie in hla guh ka na pang hi. Tua hun lâiin, ZSP Conference in naupang khangthate a na halsahzou hi. Tuami hunteng in, Tv.Kamchinthang (Lawmthang), Joseph Mangsuonhau@Mangpatom leh Tv.Stephen Mangsuon thang toh ZSP Chandel ka’ng suhing kia u’a,ka na puo uhhi. 1987 a patin 1990 tan,kum sielin, ZSP Conference ka na bawl uhhi. Tuami Khawmpite ziehin gam sunga díngin phattuomna tampi; lampi,lei leh adangdanggte na tun hi. Khumi’n, ZSPGeneral Headquarterte dâi dingdeng a, a na op lâitah ahi.
DELHI KHOPI
EXISTENCE OF ZSP DELHI
1990 kum in Delhi khopi ah,Civil Service bawl in hla 3(thum) tah Jagjivan Bhavan Hostel ah ka na om hi. Tua hun lâiin Delhi Khopi ah Zo/Zou cia simthei díngin Pa.SK Mung Innkuonte, Tv.Paunou Zou,Tv.Khakhai Zou,Nh.Suonchîn leh Tv. David Suontah te chilou ngâl Zou ta kichi mawngmawng muthei a na om nâi sih hi.
Tua kum in,thu ka na kankan kawikawi leh Zo te kikhâi khawmna Social or Student Organisation kichi bangma a na om nâi louin ka na theidoh hi. 1991 kum in UPSC Interview díngin New Delhi ah ka na zin hi. 1992 leh 1994 kumte inzong UPSC Interview díngin New Delhi ah ka na zinkia hi, hinanleh,student body a om ei chi’n ka kan lele leh,a om louin ka na theidoh hi.
1993 YEAR OF ESTABLISHMENT OF ZSP DELHI
ZSP Delhi Constitution original copy seal kitah dungzuiin ZSP Delhi kiphu kum pen 1993 ahihi. ZSP Minute bu dungzuiin ZSP Delhi pen 1995-96 kum apata na kikhumlût pan ahi in ka mudoh hi. 1993 official year of establishment ciin a kimuthei a,tuami kum panin simta lei, tukum; 2008 pen 15th Year of ZSP Delhi hipan nalâi ahi hi.
ZSP MEETING A KHATNA LEH A THUMNA
1995 kum,October hla ni 22 nini’n ZSP meeting B 1/1 Malkaganj Delhi ah a na kinei hi. Member a na peikhawmteng: Tv. Milun Zou,Tv.Chinlunthang(President), Lienneu(Secy), Tv. Kamminthang, Tv.G.Tungnung,Tv.PH Zou,Tv.K Suantah, Tv.Paul Lalpu ahi uhhi. Zolengthe censor board telna a na nei u’a,Paunou Zou, ZSP D President,Secretary te ahi uhhi.
23rd October 1995 kum (Sunday) nai 12.30 sûnlâi in 107, Mansorawar Hostel,Delhi University ah ZSP meeting a thumveina a na om hi. Mary Grace Siesien in hunhon thungetna a na nei hi. Member a na peikhawmteng: Tv.K.Zou,Tv.P.H Zou, Tv.Lienneu (Secy), Tv.Chinlunthang(President),Pa.SK Mung, Tv.Paul, Tv.Kammin thang, Tv.Khamminlun, Nh.Mary Grace ahi uhhi. Tua hun a patin Cultural Dress,Zolengthe tungthu a na kikum uhhi. Tv.P.Hâuminthang Zou(PH Zou) Editor Zo lêngthê a na puóh lâitahin eimite toh kisai la(poem) khat Executive theipilou ciin azieh thulim séng loupiin ama pen na kitawpsah a,tualeh Zolêngthê pen Zomi Tângkou in n a kihlengta hi. Ama tângin Assistant Editor Paul Henkholal na kipangsah hi. Pa. SK Mung adviserpu in hunkha thumna a na nei hi.
1996 kum in DANICS Training díngin New Delhi ah ka’ng tung hi.
1995-96 kum sunga;Tv.Chinlunthang President puóh kum in mêlthâ vâidotna; ZSP Freshers’ Meet 96, Pa. SK Mung inn C-115 Panchvati,Vikaspuri mun ah,na kimang hi. Kei pen tua lâitahin DANICS training bawl a, ka op lâitah a na hi’n, ke’nzong tua Pawi ka va sîmkhata hi. Sângnâupang 26 bang a phata a,Extempore Speech kidemna a thukhen díng in ei na guot uhhi.
1996-1997 kum in Tv. Jamkholien President,S.Haulienkap General Secretary in a na pang uhhi.
1996 kum September hla ni 15(Sunday) ni’n K.Zou inn 6/13 Vijaynagar Delhi ah ZSP GBM a na kitoukhawm hi. Tuami hun in,Cultural form,ZSP news,ZSP Agra Tour leh Zomi Namni tungtâng kikuptonna a na kinei hi. Zomi namni mankhawm díngin thupuasahna na kinei pen na kizuita sih hi. ZSP news pen Zou Literature Society Delhi Censor board hi heh chiin thupuasah No.4 na ah na kigiellut hi. Tuami News sutna dingin Floppy packet khat kiphaltahin ka na tuoh hi. Cultural puon sai in Tv.Chinlunthang a na kise hi.
1996 kum December hla ni 8 niin C-169 Arambagh Pa. Khakhai inn ah ZSP Executive Meeting a na kinei hi. Member 11 na peikhawm uhhi. Tua hun in,Cultural Form,ZSP News leh thu dangdang a na kikum uhhi. Cultural Uniform Project etthana a na kinei a,Tv. Zamkholien in mawpuohna latou díngin thupuasah No.4 dungzuiin pha a na kisata hi. Tv. Doulienmang in hunkha thumna na nei hi.
1997 kum April hla ni 16 niin ZSP Emergency Meeting 6/13 Vijaynagar ah na kinei hi. Tua hunin,Cultural Uniform genkiana na kinei hi.
1997 kum June hla ni 1 niin C-169 Arambagh ah sunzou nai 4 gin in ZSP Executive Toukhawmna a na om hi. Tuanah,Ex-President Chinlunthang Chairman hina toh Cultural Form leh President tungtang thute na kikum uhhi. Cultural form leina díng sum za 800 na thelthang ahi ziehin Adviserte’n Persidentpu lâi khat a na hlâh uhhi. Tuami hun in,Zou Organisation ciin lâiteng a na kizang pan hi. ZSP hqtrs ngetna dungzuiin Year of Reformation kichi banners/stickers 100 ZSP Delhi in na zuapi hi.
ZSP DELHI IN SDM KA PAN EI NA KIPAHPINA
1997 kum July hla ni 6 niin 6/13,Vijaynagar mun ah kei SDM panmun ka luo pen Felicitation Programme ZSP Delhi sângnâu-pangte’n a na bawl uhhi. Tua hun a,lamkâi;ZSP,General Secretary

Tv. Hâulienkâp a na hihi. Tua hun in,kipâhthu gên kawmin, nâupangte hasotna leh hânthawnna ka nei hi. Lâi ha sim in,sim un len milien milal suosawm ciet un ciin sângnâupangte deisahtahin thuhilna ka na nei hi.

ZSP DELHI CONSTITUTION DRAFTING COMMITTEE
ZSP Delhi puòthâ vâi ciin,1997 kum June ni 28 niin, C-169 Arambagh mun ah,Tv.Lunminthang ZSP Delhi Executive Committee Member in Chairmanship hina lâ in ZSP Executive Meeting in toukhawmna a na nei hi. Tua hunin, Agenda 6 guh a lakhawm uhhi. Cultural Form,ZSP Byelaw/Constitution draft díng,Zomi Tangkou,Kei SDM ka hi kipâhpina(atunga kigênsa), Annual fee,ZSP(Hqtrs) ngetna chite a na kikum khawm uhhi.
Tua hun in, ZSP Delhi Sângnâupangte lîuliêu toh kituoh leh kilawm díngin ZSP Constitution,Delhi mun a, zahthei díngin gieltha vâi chiin tangvâl(sangnaupang)te’n ei na chiel uhhi

ZSP Executive te ei na chielna pom in kei zong kikupna ah ka va pangta hi. Sawt lâi patsa na kigêngên Cultural Form pen lèizóu lòu a, a’ng optâh ziéhin ZSP Cultural Form leina díngin dangka zanga(Rs.500) ka na donêt hi. Tua bân ah, a leina díng sum cing zoulou leh a kisamteng tuóh díngin zong ka na kipe sawnsawn hi.


ZSP DELHI CONSTITUTION DRAFTING COMMITTEE CHAIRMAN A EI KIGUÒTNA(DÂNBU)
Tam atunga kikhopna a, A Thupuasah No.2 dungzuiin kei pen Chairman, ZSP Delhi Constitution Drafting Committee in ei guòt u’a, ei kithuòpi díngin member 2 toh ei na guóng uhhi. Tuate gêl ahileh; Tv.Hâuminthang leh Tv.Chinlunthang ahi uhhi. Kei in zong ei na cielna bang uh leh ei na sêna bangun kiphaltahin ka na pom hi.
1997 kum July hla ni 13 niin Tv. Lunminthang in Chairman hina la in,Tv.Haulienkap Secretray na pang in,Executive meeting Arambagh mun ah na om hi. Resolution No.3 dungzuiin Constitution Drafting Committee hun kipie in,tutan a draft jou tanah committee in pha asa a,draft jou nailou teng pen Meeting kia masang ngei a sufel a hing joudoh ngeingei dingin committee in pha a kisa hi.
ZSP CONSTITUION THÂ C-115,PANCHAVATI VIKASPURI MUN ZSP GBM HUN IN POMKIP NA HITA
Ei na guot dungzui un ke’n zong hun neilou sasa in hla 2(ni) tahpi ZSP Delhi Constitution ngaituona in ka na thapâi kêi hi. Hla 2(ni) a chin zou, August hla ni 10 niin C-115 Panchvati, Vikaspuri Pa.SK Mung inn ah, Delhi ZSP GBM toukhawmna a na kinei a,tuanah koima nielkalna themkatmalmal om louin, ZSP Delhi Constitution Thâ pen khut zietlang ciet tung kawmin,a na kipomkip cietta hi.Cultural form progress ahi ziehin mipi in kipâhpi a, freshers’ meet masang ngêingêi zaw dingin thupie uhhi. Tuami hun a mi na peikhawm 26 pha hi.
ZSP MOTTO; Learn,Persevere and Honour
Tv. Robert Paukhanthang President pan lâi leh Tv.Lunminthang G.S pan kum 1997,August hla ni 17 niin ZSP Delhi Emergency Meeting a na toukhawm uhi.
Tua hun in, a Motto díng kikupna na kinei in,kei puohkhiet(suggest) ‘Learn,Persevere and Honour’ hisah díng chi’n Resolution No.3 na ah a om hi.Tv. Chinlunthang leh Nn. Mary Grace Siesien Cultural form lei díngun a kise u’a,dangka 1300 draw theina phalna a na kipie hi.
Tv.Chinlunthang pen inn lam a na peita ziehin,keima kipumpieh in,ka nu uh leh Nn.Siesien toh puonsà zuana Chandni Chowk kotawng mun ah ka sumpi zangin Cultural form ka va leita uhhi. Nu.Nemnu Suontah in kiphaltahin ZSP Cultural Form a na khuipi’ hi.
ZCLS(D) leh ZSP(D) JOINT MEETING THUTE
Tv.Lunminthang in President tualeh Joshua Samte in GS a puóh lâitah un,kum 1997 October hla ni 2 niin nai 2.30 in Arambagh mun ah Zou Cultural cum Literature Society Delhi leh Zomi Sangnaupang Pawlpi Delhi joint meeting mi 11 telna in na om hi. President in Chair la in,GS in recording Secy lain, Nh. Kimcha Tungdim in hunpat thumna a na nei hi.
ZSP letter head sut ding,Constitution a motto zah díng,
motto pen English a sut díng, in pha a na sa uhhi. ZCF labu sutna panpina in dangka 500 a na pie uhhi. ZCLSD Chairman ka hi ziehin ZCF labu sunga Zola omte spelling entûp díngin Tv.Lunminthang toh ei na kiguot gêl hi.
ZOU WELFARE SOCIETY DELHI BYE-LAW THUTE
1997 kum October hla ni 30 niin Gulabibagh,mun ah mi 16 peikhawmteng in,ZSP GBM 1997 kum a GBM masapên na nei uhhi. ZWS (D) hoitaha matâl theina díngin Byelaw bawl díngin Adviserte Keima,Pa.SK Mung leh ZWS(D) President leh Secretary a na guòt u’a, 9.11.97 Vikaspuri a kimu díngin pha na sa uhhi. Hinanleh,pankhawmlou zieh leh sum don hâsat ziehin tualeh mi na kitawm ziehin ZWSD pen na kitung ding zoulou tadi phot na suoh hi.
ZOMI LITERATURE SOCIETY LEH ZOU CULTURAL cum LITERATURE SOCIETY DELHI THUTE
ZSP Delhi Constitution kibawl zóu a patsa’n Emergency Meeting mat leh mat in,na om mielmuol a, cimhuoi ka na sa man hi.
Chairman,ZSP Delhi Constitution Drafting Committee ka hina dawl in,Zou Cultural cum Literature Society pen ZSP Delhi tahsa(organ) khat in ZSP Constitution sungah na kiguónglût uhhi.
ZSP GBM in zong pha a sahsa hinapiin, himaleh,ngâidân kibahlou leh kituohlou ziehin tami pen ZSP Executivete leh Recording Secretary in koima theilouin amahaw thuthupi in,Zomi Cultural Literature Society ciin a na khumlut a,hun hing peitou zêlin, 30th October 1997 in ZSP GBM meeting Resolution No.4 na sungah Zomi Literature Society ciin a na hlêh lamdang kiata uhhi.

ZOU CULTURAL CUM LITERATURE SOCIETY DELHI (ZOCLSD) ZSP DÂNBU PATSA KIPHIETMANGNA
ZSP Constitution Bu sunga na kigiellût leh na telsa;Zou Cultural cum Literature Society Delhi cia kiminvawsa pen ZSP makâi khat leh ni deilou zieh in Amendment a na bawlta u’a, 30th October 1997 in ZSP GBM in Resolution No.4 dungzuiin Zomi Culture Literature Society ci’n na kikhum lut/giellut mawhta a,tua pen hun khat zouin,Zomi Literature Society ci’n a na kihlêh lamdang sawnsawn kiata hi. Upate leh a na ngaituo masate dohna leh zâtâtna beiin na gamtâng uhhi.
HALL PI A, ZSP FRESHERS LEH SOCIAL MEET OM MASAPEN: ZSP kiphukhiet a patin SK Mung inn Vikaspuri mun ah Social Meet na kimang gige hi. Hinanleh,mihingte a’ng tam sémsém toh kizúiin,1997 kum October tawp kuon lamin, Kamlanagar Community Hall pîcing(lien) mun ah Freshers Meet leh Social Meet ZSP pienkhiet apatin na kinei masapên na ahi. Tua hunin,Phamsa Pu. (L) Thangkhanlal MLA in Cultural Form honkhietna na nei hi. Ahivangin,koiteng in Cultural Form a buoipi uh e? chipen kamteng khat zong President leh GS speech leh report na ah na kizakha sih hi. A kumkia in,NDMC Baratghar Mandir Marg ah,Social Meet cum Fresher Meet na kinei hi. Nupapa a,lasah tonna na om hi. Learn,Persevere,Honour thupi toh nuomtahin hun nunnop na kimangkhawm hi.
ZSP ADVISERTE
1997 kum September hla ni 6 niin 6/13 Vijaynagar mun ah ZSP Executive Meeting nai 3 nitah lam in a na nei uh hi. Tv.Lunminthang (President) leh Hauminthang (GS) pang in agenda 9(kuo) gênkhawmna a na nei uhhi. Tua hunin, Constitution print khiet díng,Zou Welfare Society bawlkhiet díng,Adviser telna,Cultural Form,H/Q stickers leh adangdang na kikum uhhi. ZSP Constitution sêkhiet zúiin Resolution No.3 sungah Adviser thum 3 na kitêldoh hi. Amate ahileh; SK Mung,Khamchinpao Zou,kei ka hi. President leh GS te in theisahna a pieh díngin hoi a na sa uhhi.
DELHI ZOU WELFARE SOCIETY
1997-98 kum sungin ZSP Constitution mandate(phasahna)neiah Delhi Zou Welfare Society ci khat a na kibawl a, Tv.Hauminthang Secretary tualeh Miss Mary Grace Treasurer in na pang uhhi. Hinanleh, ei lah a sum don hâsat séng manin a na lawcing theita sihhi.
SAKHI LUKHU TUNGTÂNG THUTE
1998 Kum Gangpi hla ni 26 niin C-115 Panchvati,Vikaspuri Pa.SK Mung inn ah,ZSP ann nêhkhawmna na kinei hi. Hunpat thumna Nu. L.T in na nei hi. Tua mun a,thupuasahna dungzuiin sakhi lukhu leina díngin sum a na kidong khawm a,ke’n zong
dangka 500 ka tuoh pai hi. Pa SK Mung in dangka 300,Tv. Kapbawi in dangka 500,Pa L.T in dangka 300,Pa Thang-khanlien in dangka 200 chiet a na tuoh u’a,sakhi lukhu lei têitêi díng ahi kici ziehin sum kisamteng keima’n ka na tuoh hi. Tuami sumpi zong a kim in, ka nua mu nawnta sih hi.
ZOU CULTURAL CUM LITERATURE SOCIETY DELHI A’NG PIENKHIETDÂN THUTE: Tuachia, ZSP Delhi makâi pawlkhat na deilou leh na paidoh; Zou Cultural cum Literature Society Delhi pen a min ngai leh hoi ka na sah zieh leh,Zou/Zo lâi khantouna díng ka na ngaikhawh ziehin Kum 1998 April(Ning hla) ni 23 ni’n tua a na kideilousa leh na kipâidohsa; Zou Cultural-cum-Literature Society Delhi kici pen Government of Delhi theipi díngin ka na khumlûtta (registered) hi. Muncinteng ah, ZOU spelling ma kizang sieng thei leh,cia pan ka na lâh vângin,a tamzawte’n ZOMI ma,na pansia tinten uhhi. Bang hileh mi tamzawte deina bangin ka na pom veve hi. Tukum 2008 A.D ahileh, ZOCLSD/ZOCULSIN kum 10(sawm) a cin kum ahihi. One Decade of Existence of ZOCULSIN in Delhi cia 10th Anniver sary Pawipi bawlthei tham ahita hi. 1998 ZSP Calendar Project sutna ei na kiguot dungzúiin a sutman keima’n ka na tuòh hi.
PASTOR LANGTHANG (L.T) ORDINATION KIPÂHPI ANNKUONG ÎMTONNA: 1998 kum July hla ni 7th niin Pa L.T(Langthang) inn ah ZSP(D) te’n Ama Pastor Ordination kipâhpina in annkuong îmtonna a na neipieh uhhi. Ke’n Zo Puondum khat ka na sê hi.
ZSP LAMKÂI PAWLKHATTE’N A NGAITUO LOU DíNG UH NGAITUO UH:

Kum 1998 August hla ni 14 niin 6/5A Vijayanagar mun ah ZSP GBM niveina Tv.Lunminthang Presidentpu leh Joshua Samte lamkaina in mi 16 peikhawm un,GBM a na nei uhhi. President lamkaina in ZSP Constitution amendment kibawl uhhi. ZSP lamkâi Graduate student final year senior memberte sese dei ahi,ciin na hleng lamdang uhhi. ZSP branch leh branch hilou thute a na kikum u’a,ke’n Zo/Zou lâi khanletna dei man a,Zou Cultural cum Literature Society Delhi cia ka na register pen merit leh demerit theiciet díng ciin Freshers Meet 1998 zaw cienga nikhat mawngmawng houlimna bawl díngin ciin thupasitna na nei uhhi. Tami ZCLSD pen ZSPD deilousa,nuolsa leh paidohsa ci thei na giagu,pum in tua hun a,makâipu in agenda na polut mawh lâizang kawi hi. Bang merit bang demerit na gên sawm a’ta diei?
ZSP(D) SUHBEI/PHIETMANG DÍNG THUTE
Emergency meeting leh emergency lou kikhopna tampi na omta mielmuol hi. Nikhat,Tv. Lunminthang ZSPD President a puòh lâitahin,ZSPDelhi Government of Delhi ah kiregister leh ciin, ka opna inn Gulabibagh ah a’ng haw(vâh) a, ‘U Mang,Society bangci kiregister e? ka thei ut hi’ciin ei na dong hi. A citahtah hina va ciin ke’n zong gintâtna(good faith) lien kuo in,Society kikhumlûtdânte ka na hilcien hi.Tua bân ah,ZCLSD Memorandum of Association leh Bye-law photocopy khat tuóh ama ka na pie hi. Hinanleh,ZSP Delhi pen a register kiata sih a,alêlam in,tua thu hoi ka hilte pen kei demsietna in a’ng zangta hi. Tami ZoCLSociety Delhi ka register zieha a na êngsie leh a na mûisie mi tampi na om ahi,cithu pen ke’n ka na theikha hîlhiel sih hi. Tami toh kizawitawn kawmin, ZSP Delhi Constitution demsie pawlkhat a’ng piengkhe pai hi. ZSP Delhi Constitution pen hun sawtpi lût a,tha leh zung,hun manpha tampi séng zên a,na kingaituo leh na kibawlkhie pen makâi pawlkhat na theisiemlou leh na deilou ziehin,ZSP Delhi pen phietmang díngin khopihuisie lâng kigên mabangin na lâng hi.
Tuaciin hun hing peitou zêlin,1998 kum September hla ni 27 niin,Pa.Khakhai Inn C-169,Arambagh mun ah ZSP Delhi phietmang/suhbei díng ahiei? suhbei/phietmang lou díng ahiei? ciin ZSP Delhi Emergency Meeting na ah cinthu a na kilêl hi. ZSPD Constitution kipomzou in,ZSP Delhi Autonomous amah? Hilou e? tualeh Constitution Review bawl díng cithute zong a na lêlkhawm uhhi. ZOCLSD ka na register ziehin bangzieha Philip in Zou min a deidei a a kiregister ahiei? Ama’n bang authority a nei e? ciin makâi pawlkhat in nasetahin ei na demsie uhhi. Tv. Hâuminthang, Tv.HangP, Tv.Khamminlun, Tv.Thangboi leh Pa. S K Mung te a bânbân in na díngun, Government theipina pi Nehru,Gandhi,Indian leh min dangdangte zangin zong register lei bangma a sietna om sih hi,cia mipite mâitang a,a’ng gêncien zou bep un mipite na theisiem pai un, ke’n ZOCLSD pen ka register a hoi hi,ciin mi tamzawte’n a’ng sângthei uhhi.
ZSP SUHBEI DÍNG AHITÂH LEH,ZYO BÊH PHUT VAI CIA KA PHÛT VÂNG DONG KêI VAWT !
ZSP kimawh phietmang díng ka ci ciengin zumhuoi leh dâhuoi ka na sa mama hi.Kei ka na pandân ahileh; ZSP Delhi phietmang díng i ci ngâl u’a ahileh ZYO bêh tungdíng va ui ciin ka na pang hi.
Hinanleh zong,upa kimkhat in, “ZYO pi Gouzadou phukhiet,ama’a, hilou amah? ci kawm in, kiphuthei sih va” ciin a na nielkalsan paita uhhi. Ke’n zong ‘ZSP koima pupa gou hituon sih,koima’n phietmang/subeithei sihva’ ciin ka na pang têntûn hi. Pa L.T Lianzaw pen a lâikim suh tuom in a’ng tung a, a’ng ding a, kei pen ZSP kiregister díng leh, ZSP hinawn ke’ng ci toh thuo in a kivâmang paita hi.
ZSP Delhi suhbei leh phietmang díng cipen koiin Agenda a a’ng guonlût e? cia a’ng kikandoh ciengin Tv.Paunou ahi,ci’n a’ng kiphuongkhie hi.Tam ziehin Tv. Paunou tungah mipite a lungkim nawnta sih a,Tv. Paunou pen ZSP meeting khatvei jong jau lou(participate lou)jiehin Tv. Hauminthang in question raise a na bawl a,tua bânin Tv. Khamminlun leh Tv.Lalboi tegêl tungthu zong na kilêl hi.
Adviser Tv.Paunou pen ZSP(D) ah interest (lunglutna) nei sih tualeh Anti-ZSP propoganda a thê chi a kithei jiehin tuani patin Adviser Paunou pen Adviser hina pat a topsah na lai pia dingin,ang peikhomteng in pha aki sa a,tualeh Khamminlun jong explanation call ang lailut na ding a lai pia ding in ang pei khom teng in pha aki sa hi,tam bang a P.Lalboi Zou jong a tung a bang a bawl ding pha aki sa hi.
Mipi ang peikhawm teng in phasa in a khut ziet lang chiet uh a dom chiet hi. Nitâh lang Nai 4.50 a patsa in zân Nai 8.20 in meeting a tawp hi. Huntop,Sr.Advisor SK Mung in Pa Pasien kungah kipah thu gen in,hun kha ahi”.
theipina pi Nehru,Gandhi,Indian leh min dangdangte zangin zong register lei bangma a sietna om sih hi,cia mipite mâitang a,a’ng gêncien zou bep un mipite na theisiem pai un, ke’n ZOCLSD pen ka register a hoi hi,ciin mi tamzawte’n a’ng sângthei uhhi.


ZSP SUHBEI DÍNG AHITÂH LEH, ZYO BÊH PHUT VAI CIA KA PHÛT VÂNG DONG KÊI VAWT !
ZSP kimawh phietmang díng ka ci ciengin zumhuoi leh dâhuoi ka na sa mama hi.Kei ka na pandân ahileh; ZSP Delhi phietmang díng i ci ngâl u’a ahileh ZYO bêh tungdíng va ui ciin ka na pang hi.
Hinanleh zong,upa kimkhat in, “ZYO pi Gouzadou phukhiet,ama’a, hilou amah? ci kawm in, kiphuthei sih va” ciin a na nielkalsan paita uhhi. Ke’n zong ‘ZSP koima pupa gou hituon sih,koima’n phietmang/subeithei sihva’ ciin ka na pang têntûn hi. Pa. L.T Lianzaw pen a lâikim suh tuom in a’ng tung a,a’ng ding a,kei pen ZSP kiregister díng leh,ZSP hinawn ke’ng ci toh thuo in a kivâmang paita hi.
ZSP Delhi suhbei leh phietmang díng cipen koiin Agenda a a’ng guonlût e? cia a’ng kikandoh ciengin Tv.Paunou ahi,ci’n a’ng kiphuongkhie hi.Tam ziehin Tv. Paunou tungah mipite a lungkim nawnta sih a,Tv. Paunou pen ZSP meeting khatvei jong jau lou(participate lou)jiehin Tv. Hauminthang in question raise a na bawl a,tua bânin Tv. Khamminlun leh Tv.Lalboi tegêl tungthu zong na kilêl hi.
Adviser Tv.Paunou pen ZSP(D) ah interest (lunglutna) nei sih tualeh Anti-ZSP propoganda a thê chi a kithei jiehin tuani patin Adviser Paunou pen Adviser hina pat a topsah na lai pia dingin,ang peikhomteng in pha aki sa a,tualeh Khamminlun jong explanation call ang lailut na ding a lai pia ding in ang pei khom teng in pha aki sa hi,tam bang a P.Lalboi Zou jong a tung a bang a bawl ding pha aki sa hi.
Mipi ang peikhawm teng in phasa in a khut ziet lang chiet uh a dom chiet hi. Nitâh lang Nai 4.50 a patsa in zân Nai 8.20 in meeting a tawp hi. Huntop,Sr.Advisor SK Mung in Pa Pasien kungah kipah thu gen in,hun kha ahi”.
ZSP DELHI MILLENIUM AGRA TOUR 1999 LEH ZSP CALENDAR THUTE:

ZSP Calendar bawlna díngin dangka 3000 ka leitawisah díng ci’n a’ng ngen u’a ka na pie hi. Pa Khakhai,Pa SK Mung,Tv. Dodou te’n zong a tuo díng un pha a na sa uhhi. Kum1999,November hla ni 14 ni nai 4.30 nitah lam in ZSP Informal meeting a nei na ua’h,ZSP Calender 2000 A.D leh Millenium Agra Tour 1999 nei hoi a na sa uhhi. Tuami toh kisaiin ZSP Delhi sângnâupangte lamkâite’n gari tuoh in ciin a’ng thûm uhhi. Tuachia, sângnâupangte thanuom chiet ahi uh leh chi’n,ke’n zong theitawpsuo in kiphaltahin Gari Bus 2(ni), Tata Sumo khat leh ka Maruti Car ka na tuoh hi. Zouta kici tapouma pen tuami tour a haw chiet díngin na kithukim uhhi. 2000 kum December ni 3ni zîngmawng phalvâh hun in North Delhi lam a om sângnâupangte leh nupi papite ladíngin Tata Sumo khat ka na sawl hi. Innkuon kim a nu leh pate,tangvâl nungâhteng Agra Tour 99 haw ciet díng kici hinapiin, innkuon khat leh ni leh tangvâl senior deute a’ng hawta sih uhhi. Ka opna Greater Kailash Part-I mun ah,phalvâh masangin zîng-ann(breakfast) inntêhnu leh Tv. Kamminthang in na sai uhhi.Zíng-ann tuitah; âhtui leh bread nêhzou in nai 7 gin in,a na kipankhie uhhi.

SK Mung leh Keima lamkaina in naikâl 3(thum) kitâizaw in Agra mun ah ka tung uhhi. Kouni mapuina bangin ZSP Delhi sângnâupangte’n nuomtahin AGRA TOUR 1999 a na mang uhhi.Hun nuomtah a, kimanzou leh i mit ciet tai kim sîusieu diemdiem zouin,nitâh nai 4(li) gin tuom in Delhi zuon in ka’ng kilekiata uhhi. Delhi ah nai 7 gin zou in ka tung uhhi. Gim leh tawl,dângta gilkiel kawm in ka inn ah ka tung khawm dieldiel u’a,tuami zân sawt nua in DELHI ZILLAI (Delhi Vaiphei Students) sângnâupangte’n ZSP Delhite díngin ann tûitah a na huonpieh uhhi.
Ahivangin,Editorpu Tv. Lunminthang(Agra a’ng haw lou) Zokuamthawn dated December 1999 Vol.I in tuami Agra Tour 99 pen thulimloutahin a’ng suokhie hi. Jt.Editor Kapzalam leh Cir.Manager Tv. Thanglunmang na puoh hun lâi ahi. Ann huonte koi e? Ann nêhna mun heisung? Ankuong îmtonna sumleh pâi tuoh leh lieu koi e ? cite a’ng suota sih uhhi

Langkâina neiin thusuo a’ng bawl u’a,ke’n zong kilawm maw séngséng ka na sah ziehin,Pa SK Mung ka na houpi pai hi. Tuaciin,ama’n zong thusuo bukimzoulou dânte a na pona mama hi. April 2000 Zokuomthawn ah, Pa Philip Thang lienmang, ZSP President Tv.Haulienkap, Tv Dodou lamkaina zieh a,ZSP Millenium Agra Tour 1999 khu kilawcing ahidân thute Letter to the Editor dânin Pa SK Mung in a’ng suokhie hi. Thudih thumân pen mang ngailou cikhu a kitheikhie hi.
DELHI MELLENIUM KUT 2000 HUN AH ZSP DELHI IN ZO CULTURAL DANCE A NA LAHNA THUTE:
2000 kum October hla ni 22 ni niin Tv.Thanglunmang President leh Tv. Thanglienhau GS tegel lamkaina in Resoln No.2 dungzuiin DELHI MELLENIUM KUT 2000 a Zo Cultural Dance lah dîngin G.K-I ka inntung ah,Zo lâm zân simsiel in a na sin u’a,October 29 ni tan ka na zintun uhhi.
Sângnâupangte pen lâm a siem thei mama uhhi. November ni 1 niin, MPte club Constitution Club kichi mun ah,Delhi Mellenium Kut 2000 na kimang khawm hi. Delhi Kut Committee in ei na ngetna dungzuiin touna zousie ka na tuoh hi. Lâm tuomtuomte; Dailam,Phîtlâm,Saguol kêngkhâi, Zangta lâm a na lah uhhi.
Tua pen ZSP Delhi sângnâupangte’a díngin, Delhi khopi sunga Zo lâm lahna masapên na hihi. Mipite’n ZSPD Cultural Troupe lâm lahna etlawm mama a sa uhhi. Zo Cultural Dresste zong kim set in a sil ciet uhhi. Ngâhnute’n sakhi lukhu khu un a lâm dieldiel uhhi. Tangvâlte’n tuhpâl a khu u’a,naltahin a lâm khawm uhhi. Atawpna lam toh kituohin, Zinlien Pu. Babulal Marandi MOS,Kutpa leh milien dangdang teng in Zo langaite zui un, Zo lâmkai a na kâiton uhhi. Zothâu,Zo nâmsâu, Zâmpi,Tawm (khuong),vaphuol gie te leh tuhpâlte ka na kawmsah uh ahi.
2000 kum November ni 30 niin ZSP Head Office C-169 Arambagh pan a mun kichingzaw chiin ka inn 48,Delhi Government Officers Flats,Greater Kailash -I,New Delhi pen ZSP Head Office díngin na lemsah uhhi.
ZSP DELHI CONSTITUTION ETKÂILOUPIA ZSP DB BYE-LAW A KIHLENNA THUTE
1998-99 sungin Tv. Paukhanthang President in a na puo hi. Hun hing peipeitou zêl a,1999-2000 sungin Tv.David leh Tv. Haulienkap Suontah tegêl in ZSP Delhi pen a na potou u’a, a peisa hun a,thu tampi a’ng pholkhekia gêl hi. Tv. Haulienkap Chairman hina/lâhna nei ah, 1999,November ni 9th niin ka inn ah ZSP Delhi GBM a’ng om a,tuami hun ah,bangma kikupna leh kitheisahna om masa loupiin ZSP Delhi Constitution omsa pen ZSP Delhi Bye-law chiin coup tabangin ki-enkâiloupi in,a’ng peiteng in Resolution a mawh passitta uhhi. ZSP Delhi pen ZSP Delhi Branch in na hleng uhhi. Tua bân ah,Resolution No.7 dungzuiin ‘Pa. Khakhai inn a Tv.Paunou kitawpsah pen buoina tampi om ahimanin, lungbuoina(confusion) tampi omte ziah in ZSP (Delhi) in khohsa mama hi. Tua ziehin,President leh General Secretary ZSP(Delhi Branch) te’n Tv. K. Zou in theitawp sua a ZSP(DB)’a dia pan hing lahsah dia ngetna leh adviser apat a kholsah ahina ziah a theisiamlouna piangte hilchetna (clarification) na bawl ngei dingin Pa.Khakhai leh Tv.David Lalpi in lemsah hi’. Zokuam Thawn deimi 14 pha a,tualeh Zo Leengthe deipawl mi 11 pha hi. Zou Emergency Fund a na kiphutdoh hi. Sum don hâsat ziehin a pichingzou ta sih hi.
SIGÂLNA(CONDOLENCE) THUTE
1997 kum in Pa. Khakhai Zou naupa Tv.Kailien in damlouna lienpi na nei in AIIMS hospital ah na muolliem hi. Eimite tampi’n a’ng gâl uh hi. Hinanleh,niengtui awm díng tangvâl leh ngâhnute na kimu kha lou hi. Zumhuoi mama ka na sa hi. Mipite tuonna díng ciin ke’n zong tuothei pen ciin ka official Gypsy gari 2(ni)tah ka na tuoh hi.
1998 kum in,Pa. Thangkhanlien Taithul tanu neu in muolliemna a’ng tuoh a,keima’n bus khat ka na sâppieh a,a hawthei teng in ka va gâl u’a,ka va vui uhhi.2000 kum December ni 31st niin ZCF Delhite’n kumlui vâihlâh leh phawh díngin Pu.Nehkhomang inn RK Puram a,ka na op lâitah un, Pa.Thangkhanlien in damlou lienpi a na nei ziehin a’ng buoisezâh a,tua thu toh kisai in,Dr. Chinkholal Thangsing sepna Michael Care Home ah SK Mung, Khakhai leh tangvâl 2(ni) toh ka va polut uhhi. Ama’n tuami zân in a’ng na muolliemsanta hi.
Azíngni a, embalm a, innlam thottung díngin Pa.Ngulhên in ei thuta hi. ZSPD Information Secretarypa kungah I mi I sate na hil sieng in chia, kithuhil pen na hilta louin,ama khu kolez na kikâi zîuzieu valong kawi hi.
Hoibawipa, Sangbawipa toh a siluong pen embalm díngin ka na posah ta uhhi. Tv. Kapzalam toh peiton díngin ka na guong ka na sê uhhi. Himaleh, ama’n peithei sih va’ng a na citâh ziehin,James Mângpasâu ka zawl u’a,ama zong inn lang pei veve díng ahimanin,a na nuom paupau hi. Tuami niin, Air ticket mu bailamta lou ahimanin, Pa.Khakhai in a guolpa khat apatin Delhi Lucknow Calcutta-Imphal hoping flight ticket ni a’ng muthei hi. Calcutta airport ah a zângieh a,a zíngni in Imphal,Lamka a kipotungta hi.
1999-2000 kum sungtengin, ZSP Delhi te a’ng fel deudeu u’a,Sigâlna(Condolence) tampi a na bawl u’a; 1999 kum December ni 14 niin Pa. Khaikhansuon sepoy Safdarjung Hospital ah a na si hi. Kei,Pa. LT,Pa. Khakhai,Pa.SK Mung leh tangvâl pawlkhat toh in Pa. Khaikhansuon Chawla Delhi BSF camp a zi a tate hesuotah a omte hênêm díngin, a zân a zân a kizâhtahin ka va gâl u’a,zîngmawng nai 6.00 in Airport ah a siluong hlâhdohna va kinei hi.
2000 AD kum patsain ZSPD te’n Nu. Chingboi pa,Nh.Kimcha naupa,Ka Pa,Robert Henlienthang Nu leh adangdangte gâlna a na bawl hoi mama uhhi. Sângnâu pangte’n Condolence lam zong hing hoi sai panpanta uh,ka ci leh hun khatin Condolence kibawlta sih heh ciin upate leh adviserte dong loupiin thupasitna na bawlta mawh uhhi (Resolution No.2 of ZSP Meeting dated 17th March 2000). Resolution No.4 sungah ZYO phukhiet ding tualeh ZSP vûimang díngin ci’n kinielna nasatahpi khat na om a, nanleh a na lawcingta sih hi. Expert Committee a na phutkhie u’a, tuate phasah dandan a peitou ding hi ciin hunkhâna a nei uhhi.
Kum 2000, May hla in Pu.Kapmuonthang in IFS a na gielcing hi. ZSPDB in kipâhpina hing bawl va ka ci leh lah,a makâite ginatlou zieh a’diei mah, Zou lah a IFS giel masapênpa a kitheimaw bawlta uhhi.
Zou Emergency Fund(ZEF)Board khat a na kinei hi. Hizongleh,Secretary Pa Soichinmang in a ziehbei in a’ng kikhawldoh mawh a,ama tângin Pa. SK Mung na kiguot hi. Sum don hâsat ziehin a dingzouta sih hi.
2002 lâiin Tv. Mangkholun GS leh Tv. David Lalpi President te puóh hun sungin ZSP Musical Teamte in ka inn kâlkhat vingveng Music tumna in a na zang u’a,ka gari ei kizahpieh u’a,a sesa in ka na nua mukia hi.
DELHI KUT 2002 ZO CULTURAL DANCE KILAHNA ANIVEINA THUTE:

2002 kum November hla ni 9 nini in Tv. John Chinlienkap President leh Tv. HangP GS lamkaina in DELHI KUT 2002 hun ah, Zo Cultural Dance lah dîngin chi’n G.K-I ka inntung ah,zân nga vilvel, Zo lâm zân simsiel in a na kizil uhhi. A inn gamlate pen ka zintun den hi. Sângnâupangte pen lâm a siem mama uhhi. Nov.9niin Talkatora Indoor Stadium sungah lâm ci tuomtuomte lahna a na om hi.Zo lâm lah hun in, Tv. Soikhanthang leh Tv. Mangboi in zâmpi(dâhtal) gol a pogêl a,Tv. Aaron Kâpmuonthang in Zothâu tawiin vân lang dawi kawmin a kâp hi. Zo nâmsâu zong zang uhhi.Dailam, Phîtlâm, Saguolkêngkhâi, Zângta lâm,Ton leh Ai late a na sa uhhi.
Mipite’n ZSP Cultural Troupe a siem mama uhhi,ciin pâtâtna thute a’ng gên kêi uhhi. Zo puon sil ciet un, Ngâhnute’n sakhi lukhu a na khu u’a, tangvâlte’n tuhpâl kilawmtahte a siet ciet uhhi. Zolâm leh Zolate toh kisai thute ka na gielsa Pa. Khakhai in a simsuh hi. A tawpna lamah, Chief Guest, Kutpa toh ZSP Delhite a lâmton dieldiel uhhi. Zothâu,Zo nâmsâu, Zâmpi, Tawm (khuong), vaphuol giete leh tuhpâlte kei’a ka na kawmsah ahi. Mipite’n lâmteng lah ah, Zo lâm etlawm pên ciin a na gênpha uhhi. Dr. Mangbawi in, ‘U Mâng hapan na chie!,chiin ei dahhou lâizang kawi hi,kei zong lêng pai in,’Bawl vânglah picingtaha bawlsawm kei deilam ahi,nêh ciet tui,puoh ciet zâng a na kici bou a sam! ciin ka dawng pailien hi.
ASSIST.COMNMANDANT GIELDOHTE KIPÂHPINA
Tv.HangP GS leh Tv. John Kap President pan lâi un, ZSPD tangvâl thumtah Thawngkhanlal,Hauminthang leh Thanglien haute’n Assistant Command a’ng mu u’a, ZSP Delhi in kipahpina nimit 22/12/2002 ni in ZSP Head Office G.K-I ah a nei uhhi.Kei, Pa Khakhai, Pa SK Mung, Tv.Dodou in dangka 300 ciet ka na tuoh uhhi. Kipâhthu tampi a na kigendoh hi.
ZSP(D) CONSTITUTION OMSA REVIEW COMMITTEE THU:
2002-2003 sungin John Kap leh HangP a’ng potou gel hi. 2002 kum December ni 8 niin G.K-I Head Office ah ZSP GBM a na om hi.
Tuami hun in, Resolution No.2 dungzuiin ZSP Delhi Constitution lui ma kizui lou ahizieh in Constitution pen backbone of ZSP ahiziehin poimaw asah leh Review bawl poimaw a sah man un, masanglai a Constitution a na kidraft dan leh Ist GBM 1999 a byelaw a ana kihen lamdan dante sawt kuomtah gen khawmna kinei zou in,atha mawngmawng a Constitution bawl ding,alui pen toh et tha a draft bawl dingin member na peikhawmteng in khut chiet dom in pha a na sa uh hi. Constitution Drafting member dingin Tv. Kamminthang Adviser ZSPD,President leh Secretary a na guong uhhi. Convenor dingin Presidentpu a na guong uhhi.
ZOD AHING PIENKHIETNA THUTE
2003 kum,September hla sungin, khopihui lâng bangin ZSP Hqtrs kidisolveta,‘sita’ ciin thuthang lawi bang na thang in,a’ng kithêzâhta hi. Tua hun lâitahin ZSP DB President Tv. T. John Chinlienkâp in Delhi nuasie in inn langah kinuale a, hun tomkhat General Secretarypu in President om louin a na makâi hi.

2003 kum ni 28th September hla in ZSP Delhi Branch GBM a na om a,tuami hun ah, Resolution No.1 na ah hichiin a na kigiel hi, ‘General Secretarypu’n ZSP headquarters dissolve chithu tungtang a zâhdân genkhiehna anei a, I headquarter uh I lutang ,I lupi ahia,tua a bei mawh leh ei a branch kichite bang chi’n i hingthei diei?,bang e tu-a bawl ding chia pulahna a nei zou in memberte a pat ngaidan lahkhawmna a nei hi. Hun sawt kuomtah ngaidan tuomtuomte lahna a kinei a,member tamzawte’n evidence om louin bangchi’n i pomthei diei chi’n legal tahin ngaidan a genu’a,khenkhat in “i bulpi a dissolve leh ei a branch zong automatically dissolve i himai hi” chi’n ngaidan a gen uhi. Dissolve a mintha phuo ding chi ngaidan gen pawl zong a na um hi. Adviserpu SK Mung in hichi agen hi, “i lu kitan in i hing thei ding uoi?” tuaziehin mintha i nei uh poimaw ta ahi,ZSP DB branch history zong sutna tomkim a sut hi. Tuazaw in ngaidan lahkhawmna a kinei hi.
Tv.Chinpu ‘ Headquarters bei ahileh ei zong bei himai lou di? Family lamte’n i masot ma hoiva . A mintha phuo vai’
Pa. Soichinmang ‘ A new beginning inei theile a hoi ding ahi’
Tv. Gouzakap ‘ Mintha heng ding ka na suggest zouta a,tualeh student body dan a I bawl nonlou ding leh Family lamte’n zong ahing lamkai thei ta ding uhi’
Tv. Aaron in a genna ah mintha heng chu khoh sa sing,hilezong student body dan khat a um chu hoi kasa a,ahin tam student body pen Upa lamte lamkaina nuai a (Social lam a upa lamte organisation khat a nei ding uh) ahi ding hi achi.
Tv. Mangkholun in, “Organisation/Body khat poupou static a umthei sih a,dynamic gige ahi. Tam tuniin I theikheta ua,I civilise ta uh ka chi thei hi. Just for a change ahina heng mongmong in enkhe vai” chiin ang peikhawmte a hântawh hi.
Tv. Dr.Robert in hichi in agen hi, ‘Member tam hilei organisation ni(2) nei chu a hoi a,hinanle tun ahitheinai sih. Tuaziehin studente ten a puoh lezong a pei dih thei sih a,Family lam te’n po leh hoi ka sa hi’
Nh. Jennifer ‘ Amin heng asietna um ka sa sih,Family lamte’n poleh hoiva’
Tv. Muamuan ‘Family ten puo henlen a nuai a Education Department chi dan deu student te’n kipawleh’
Pa.SK Mung ‘ Dissolve leh Dissolve lou hinonlou in amintha phua lei ahita mai hi. Tuoleh Family lamte;n hing pova ung ka chi vang a, student lamte’n na khut uh na silsieng ding uh china ahi laizang sih. A head pen Family lamte hing hiva ung ka china
ahi. Kei pen in Zou i hizieh un Zou min ma khat suon hoi ka na sa hi. Tam bang ngaidan lâhkhawm zou in Headquarter dissolve zieh a, ei dissolve ding leh dissolve lou ding thu hita lou in,ZSP DB pen mipi ang peikhawmte deina bangin amin heng ding a phasah ahita hi. A na peikhawm tampite’n zong a ngaidan uh a sung chiet uhhi.
Minlâhna a na kinei a, Tv.Mangkholun in Zo Welfare Association achia, Tv. Lalmuonlien in Zo Welfare Organisation achia, Ke’n Zo Innkuon Delhi ki ci va ui,ciin ka na polut hi,hinanleh vote a kilâh ciengin leh, Dr. Robert Ginlunmang in a phuo; Zo/Zou Organisation Delhi pen mipite’n na deizaw ahimanin,na kipomta hi. Tuaciin Zo Organisation Delhi a na piengkhie hi. Tuami min zang a tunia ZOD peitou den ahi. Tua chiin,September ni 28 niin ZSP-DB a na kichi pen Zo Organisation Delhi chi dingin a peikhawm tengin mi 30 vâl in, kituohtahin,phasahna a na kinei a,tuaciin ZOD pen Pasien kungah na kilânkhie hi.
ZOD KIPHUKHIETDÂN, A TUP LEH A DAWITE
Kolgam leh Kawlgam a pêmkhie; Delhi leh National Capital Region Gurgaon,Noida,Ghaziabad leh adangdang mun a om Zo/Zou tate kithêthâng séngséng na kisahtâh ziehin Delhi a omte’n Nopni leh Dani a ki-etkoltuona díngun tam ZOD 2003 kum September hla ni 28 niin ka inn ah na kiphutkhie hi.
Zou/Zota koi tabang hâsat,lungkham,liengvai, sina, manna tuoh a’ng op cienga Zo/Zou tate kihûitûpna díng, vâihawmna díng,vâisaina díng leh mapûi dínga ZOD na kiphutkhie ahi. Tam Delhi mun leh a kimvel a om Zou tate Welfare Body lîuliêu ahibou hi.
ZOD ahileh Government, Politiks, Biehna toh kisai ahisih hi. Inn lam nuasie a Delhi khopi leh a kîmvêl a eimi omte liengvai, genthei, hesuo, dâna,kâna tuóhkhâ a op cienga Nu leh Pate tânga leh luónga ding dínga khuòm leh zâwl poimawtah khu ZOD ahihi. A kiphukhiet apatin hamsatna leh lungkiehna, demna, douna tampi a na kituòh tóutóu zêl hi.
ZOD IN ZOU SOCIAL MEET cum FRESHERS MEET 2003 NA BAWL HI: Zoton masapên
Pa SK Mung in President hina toh thanuomtahin pan a na la a,Zou Social Meet cum Freshers Meet 2003 October hla ni 24 niin JNU community Hall ah Pu. Holkhomang MPpu Zinlien panna toh thupitahin ton a na kinei hi. Mângpa’n tuni tanin ei Zou tate a’ng puihuoitou dieldiel ziehin Ama i phat zing hi. ZOD Lapi díngin La(Psalm) No. 23 ka na deisah a,tuaciin na kitêldoh hi.‘Mângpa khu kei ei cing belampu hoi ahi’ ci kawm in Ama muong leh suong kawmin a na kikalsuon khawm tou zêl hi.


ZOD in I MI I SATE DÍNGA TUTAN A A SEPKHIET TUOMTUOMTE DELHI LEH A KIMVÊL A SINNA MANNA TUOHTE:

I mi I sa Delhi a sina tuoh ahilou leh a siluong Delhi leh a kîmvêl a’ng tuonkha photpen a luong Zo/Zou/Jou puon dum/puonlâisan khat in a kituom zêl hi.
SINA MANNA TOH KISAI SEPKHIETTE
i)Delhi lam zuon,a hing pei laiin Pa. Thangchinkhup (Singngat khuo) in vangsiethuoi tahin Aligarh mun tuom a tun in,meilêng tung panin na kesuh kha in,2004 kum February ni 20 niin sina a na tuoh hi. ZOD Chairman leh papite, tangvâlte kipei pai un,a luong sûi díngin Tv. HangP(Gen.Secy,ZOD),Tv.Aaron Muonthang, Tv.Goubieklien leh Tv.Suonlienkhupte Aligarh (UP) lam zuon in a na kisawl hi. Sawtpi a’ng sûi nua un,Aligarh railway station a,newspaper tung khat ah Pa.Thangchinkhup lim(photo) leh asina thute kigiel a va mu uhhi. Policete a doh ciengun,a luong kihâltumzouta a na cisan uhhi. Aligarh mun apat Tv. HangP in Phone tungtawn in FIR leh document cite policete’n na bawlpieh nuomta lou uh thute ahing hil a, Delhi apat Aligarh Police station a SHOpa phone in ka houpi a, tuachin FIR leh document cite lah policete’n na bawlpieh nuomta lou uh, ahimanin,a sipa luong na kinua mukia tama sih leh zong Police verifications, document poimawtah FIRte pen keima ngaituona in,a’ng khumsah ta uhhi.A zîngni inn,a sipa kihâlna vut,a puonsilte leh a citung silte Tv.HangP leh Pa. Lamkholun in a va lakhethei u’a,Delhi ah a’ng kitutzaw in Singngat lama ha a kithot suhta hi.Tuni’n a zi atate’n railway compensation sum tampi lakh 4 vâl a muthei uhhi,ci’n ka na zâ hi.ZOD in asipa gâlna kilawmtahin na bawl hi.Rev. Haozalien in hasotna na gên hi.
ii) Dr.Tongkhokai f/o Miss Haunieng Tungnung in tam sietlei a nuasiena toh kisai in March hla ni 5 niin,kum 2004 in ka opna mun G.K-I ah ZOD in sûnna a na nei hi. Tua hun in ZOD, ZCF Delhi member tampite’n na sûnpi uhhi. Rev. Haozalien in innsung mite hênêmna leh hasotna thupha na gên hi. Rev. Pastor Khup Za Go in hunkha thûmna a na nei hi.
iii) Zo/Zou tate nopni dâni a na kizang zêl; Rev. Khup Za Go,Delhi ZCF pastorpa dated 9th April 2005 ni’a a’ng muolliemsanna tungah ZOD in Zo puondum khat toh a luong a na tuom hi.
iv) Pa. Khupsuonkap(Assam Regiment) Ngoiphai khuo a pieng,Dehradun a opna mun ah na si hi. A siluong Delhi IG Airport ah 2005 kum in a na kivaidot a,Chairman leh Ex-chairman lamkaina in Zo puonlaisan khat in a na kituom hi.
INN LAM A MUOLLIEMTE CONDOLENCE(SÛNNA)
v) 14/5/05 Executive meeting ni’n Pu.Albert Gengoukhup Mate sûnna leh zâna in ZOD in minit 1khat sip dide in a na kikhongâi hi.
vi) 2004 April hla ni 12 niin Pa. Letchinkhai s/o Sienchinthang of Lailam veng,Lamka in a na tuosietna toh kisaiin ZODte’n Munirka a om Pa. Soikholian(h/o Chiching a sanggamnu) inn ah lusunna a na bawl uhhi. Tua hun in Rev.Khup Za Go in a innpite Pasien thu toh hênêmna a na nei hi. Inntêhte lam a díngin Tv. Kamminthang in kipâhthu gênna na nei hi. Rev.Stephen Chinzathang in hunkha thumna na nei hi.
vii)2004 kum Sept hla in Pa. M.Soichinmangpa Pu. Tutkhothang na muolliem ziehin ZOD lamkâite leh khang noute’n Munirka a opna u’ah lusûnna na bawl uhhi. Tua hun in Rev.Khup Za Go in hlamuonna thute na gen hi. Pa. K.Zou in inntêh lamte apat thugênna na nei hi.
viii) 23rd November 2004 niin Tv. Ginlienmang b/o Tv. Paulienthang sina toh kisai in Patel Chest North Delhi ah Condolence program na kibawl hi.
ix) 30th Nov.2004 niin Pa Suanhang f/o Tv. Stephen Doukhanlun condolence program JNU Kamminthang hostel room sungah a na kineipi hi.
x) 15th August 2005 niin Pi.Nehzaching m/o Pa Nehzamang Innpi condolence program Munirka a inn luona mun ah a na kibawl hi.
xi) 28th August 2005 niin Pa Zamchinkhup b/o Nh. Kimboi condolence program na kinei hi.
xii) 7th Sept 2005 niin unaupa Paumeng b/o Pa SK Mung condolence program Munirka mun ah a na kinei hi.
xiii) 5th May 2007 niin Upa Khamzadou f/o Nh.Julie Dimthuomching condolence Sarai Juliana ah a na kibawl hi.
xiv) 14th July 2007 niin Rev.Khupdoukham f/o Nh.Kimzahoi condolence program Noida ah a na kibawl hi.
xv) 22nd July 2007 niin Pu.Khupzathang f/o Pa John Zamkho mang condolence program Gurgaon ah a na kinei hi.
xvi) 1st January 2008 niin Pa.Lienlal f/o Hohoi condolence Jamia Okla mun ah a na kinei hi.
xvii) 16th January 2008 niin Nu.Niengzanuom m/o Nh. Lunnieng leh Tv.Mangkhanlal,sûnna ka inn ah na kinei hi.
xviii) 2008 kum January ni 17 ni’n Ngasuon lei tàwn ziehin i mi i sat tampi(luong 24) tuosietna(sina) a na tuoh uh thu toh kisai in,ZOD mapûina in Manipur House,Bir Tikendrajit Marg, Chanakyapuri ah sûnna leh gâlna na kinei hi. Delhi khopi tuol a om Eimi unao tampite’n a’ng uòp uhhi. ZOD in tam toh kisai in Govt. kung ah sina leh liemna tuohte kithuopina sum peding in phutna nei in,Press Release zong na bawl hi.
FELICITATION(Kipâhpina) leh FAREWELL(Vâihlâhna)
1.David Lalpi Belfast UK mun a siemsinna sângzaw sin díng a kuonkhiet kipâhpina leh hlâhna program 10th Jan 2004 niin ka inn G.K-I ah a kinei a,annkuong sawkhawna na kineihi.
2. Rev.Hauzalien Manlun in Phillipine gam ding toh kisai in ama vâihlâhna G.K-I ah 2004 kum in a na kibawl hi.
3. Nov,2004 kum in Dr. Lachinkhai ,Chairman ZLSM vâi dotna leh anzaluina G.K-I mun ah na kineihi
4.2004-2005 kum in Zo tangvâl khat leh Zo ngâhnu khat kibuoina ZOD zum in a gen mâi hi. Tuaban ah,Zo leh midangte kibuoina case khat zong na kisuveng hi.
5.2nd Oct 2004 kum in ZOD leh ZNU(Kawlgam Zote) Vikaspuri ah na kimukhawm uhi. Amaute’n ZOD a’ng pom pai ua,member hina zong sum a’ng tuoh ciet uhi.
6.2005 kum in Kei Chairman leh Tv.HangP na puoh hun in Delhi Zou Directory masapên na kisunkhie hi.
7. July 2005 kum in Daman and Diu Union Territories a ka kitransfer toh kisai in kei vaihlâhna program Safdarjang Pa.Hâulienkâp Inn ah ZOD in na nei hi.
8. 14th May 2005 kum in Pu.A.Nehkhojang Tungdim Secy, ZLSM vaidotna leh anzaluina a na kinei hi.
9. Pu. T.Gougin, Freshers’ Meet cum Zoton kum 2005 October hla ni 25 niin MTNL Hall ah Father of Jou/Zo/Zou Certificate ZOD in na pie a, Zo puonlaisan khat na sê hi.
10.Rev.G.K Samte ZCF Pastor vaidotna in anzaluina Pa. Hâulienkâp inn Safdarjung ah a na kinei hi.
11.Pu. Hangkhanpao MLA Singngat AC a kâi lopna leh vâidotna in kum 2007 in Pa. Hâulienkâp inn Safdarjung Enclave ah annzaluina toh a na kibawl hi.
12. Tv.David Vumlallien Belfast a Ph.D a zawna toh kisai kipahpi vaidotna leh ZOD Vice-Chairman Pa Nehzamangte innkuon Kochi, Kerala mun zuon ding uh, vaihlâhna vâiguon leh anehkhawmna 11th Dec kum 2007 in ZOD Chairman Pa.Haulienkâp inn ah thupitahin ana kibawl hi.
13. Pa. Lamkholun leh a innpite vâihlâhna,kum 2008 April ni 6 niin ZOD Chairman Pa.Khákhâi Zo inn ah nuomtah leh limtahin na kinei hi. Pa. Lamkholun in ZOD zâlzou masapên ahidânte leh a kipâhthute na gên hi.
ZOKUOMTHAWN THUSUO
2003-2005 apatin Kei,HangP,Pa. SK Mung leh S.Thangsuon mung in sum leh pai ît louin a tha a zung neisun teng toh Zokuomthawn news ka na publish tou zêl uhhi. Ahivang in, Zokuomthawn magazine 2008 a’ng sut in,Editorpu in tam record a’ng tuongsah sih hi.Theinasasa a,bawl hileh kilawm!
STUDENT BODY KHAT DINKHIETSAHNA
2004 kum July ni 10 niin,ZOD GBM a na kinei hi. Agendate ahileh; Student body dinkhieh díng leh Freshers Meet 2004 ahi. Chairman, ZOD in a gênna ah, student body khat opsah díng pen tangâi phamaw ahi ci thute na kikum uhhi. Zomi ci sângin Zou ci kizangzaw leh ciin mipite mâiah ka na tâlang hi. Tam thu tungtângkikupna sawtpi khat a na kinei a,pawlkhat in Zomi mangtheilou díng ahi,eima min phuosa lîuliêu, ka pu ka pa min phuosa ci tanpha in,eima gou dânin a gên kêi uhhi. Zou hiheh ci pawlte thu mawngmawng kidonse ta lou,kingâipieh ta valong lou!. Student body dinkhieh díng ci Agenda toh kisai dated 10th July 2004 nai 10.35 PM in Chairman phalna bangin ‘ZSP Revive ahita hi’ ci’n a na phuong hi. Zomi Sangnaupang Pawlpi sunga ‘Zomi’ leh ‘Zou’ zah ding vote lâhna a na kinei a,‘Zomi’ dei mi 10 a om a,’Zou’ dei mi 8 a om hi. A zoula pawl lamkâi in ka na pang phuat lehloh hi!. Majority deina bangin ‘Zomi’ zah dínga phasah a na hita hi. Zou thuteng/thumal ka na dei mama ziehin kei pi! sawtpi khat ka na lungbuoi kha kawi lâizang hi.
ZOMI, ZOU, ZO TUNGTÂNG THUTE
Tam atunga kammalte zieha buoisezâh mi tampi om díngin ka gingta a(um a),tuaziehin,tam kammal tungtâng thute ka mudân themkhat hing tâlang va’ng. Tua hun zouin,kei zong ka na kingaituo thakia a,sawtpi i na zahsa uh, Zomi leh Zou koizaw a na kizang tamzaw diei? ci’n Research bàwl ka na kipan paita hi. Tua hunlâi in UZO zong United Zomi Organisation a na hihi. ZSP zong Zomi Sangnaupang Pawlpi na kici hi.
Sugnu Lamhang Village Youth Club min Zomi Youth Association zong Zomi na pang a,kum 1975 tuom in a na kiphutkhie a,kum 1981 kum in kumpi ah na kiregister hi.
Phâi khosung a,Zotate’n Zomi Villa khuo a na sât lâi u’a,Eviction op cienga,Bulldozer in innte a’ng tah kuon cienga,ka nu leh mipite’n a na dâl sawm te ka mithla ah a’ng kilang zêl hi.
Tua ciengin leh Kawlgam a magazine khat ka ngâkhâ hi,tua pen 2000 A.D ZO MAGAZINE ciin a min a tuong a,a sunga thute ka sim ciengin nidanglâia Zo Ngaina,Tuonthu Tângthu ka na mu ngai vawt lou tampi khat ka’ng mudohta hi.
Kawlgam a, I unau Zote pen na kihûitup mama ahimanun,Zo Baptist Association,Zo Presbyterian Church chite bang na nei zou uhhi. 1983 kum a Lâi Siengthou ka’ng et kia ciengin ‘Holy Bible in Zou kici khalou in ‘The Holy Bible in Zo’ kichi ka’ng mukhie hi. 1995 kum a kisun Bible zong ka et ciengin Holy Bible in Zomi ciin ka’ng mukhie hi. Lâi Siengthou bute bàwn a, ZO thumal ma kizang hibou e, ciin, ZO thumal/lâiteng ma ka’ng pomkipta hi. Tuaziehin,Lâilam poupou ah,Zo ma kungluipên ci in,ka’ng zangta hi. Bangbang hilehzong, ZOU ci maleizong, JOU chi nanleizong, ahisihleh ZO ci leizong a AWGIN,a AWSUO/Osuo ‘ZO’ ma ging bembom lenlon ahihi. Pu.Zo min kitap minam i hi uhhi. Hâm(Kampâu) zieha Zo kihi hizaw louin,Pu.Zo hlâh leh suonte i hi zieh u’a,Zo kihi ahibou a,tualeh Zo i hi zieh u’a, Zohâm khat i na nei den khinkhian uh,ahi. Bangbang lâiteng (spelling) zang tama nanleizong Zo/Zou awgin ma a’ng ging veve díng ahi. Meiteilâi, Kawllâi, Hebrewlâi, Sênlâi, Japanlâi, Tamillâi, Siehzathang Zolai, Pauchinhau Mângtuallai leh adang dangte in giel tama nanleizong i Osuo(Awsuo) khu ZO/ZOU/JOU ma ging lenlon hici pen i theithei ciet uhhi.Zo i hina leithei ahisih a,hlenthei zong ahisih a,paithei zong ahisih a, phuolthei zong ahisih hi. Ahivangin,mi kimkhat in,a zuathei,zumpithei, kinei sahthei,kihûhpithei,minsietsahthei,mansuothei,dudahbawlthei, nuoisiethei, kiletsahpithei, kineituomsahthei,dahbawlthei,zausahthei, kizumpithei,dâikailuthei (dâikaikhumthei) leh adangdangte.
2005 kum July hla apatin 2007 July hla tan Daman&Diu, Dadra Nagar & Haveli Union Territory gamte ah ka na kisuon hi. Kum 2(ni) sung vingveng Delhi pulam ah ka na om hi.
2005-2006 sungin,ZOD Chairman dí’n Pa.Pâunou Zou a na kitêl hi.Hinânleh,Chairman a, na kitêlpa’n a panmun a na lâhlou ziehin ZOD pen a si bangin, hallou(defunct) in na om den hi. Ama hun bei bepin 2007 kum in mipite a na kikum kia u’a, ZOD hinsah díng e?sisah díng e? ci’n vote a na la u’a,hinsah díng cite’n na zou uhhi. Kitêlna ah, Pa.Hâulienkâp ZOD Chairman in na cing a, a kitêl dungzuiin 2007-2008 kum sungin hoitahin leh kiptahin a na potou hi.
2007 kum ni 15 ni, August hla in ZSP leh ZOD joint meeting na ah ZSP min pen ZOMI apatin ZOU in a na kihleng thei lêulêu mawh hi!.Tuami thu ka zâhtahin kidang ka sa a,tua lâitahin tuami min na ît,na kihûhpite’n bang lunglâitengpi a gêl díng uoi,maw? ci’n ka matangin lunglâi ka na sielsiel hi. Tami min hlen pen azieh cientahin ka thei sih hi.
2008 kum Gangpi hla in Singngat Assembly Constituency Delimitation toh kisaiin UZO makâite Delhi a’ng zin u’a,Delhi a om Zo/Zou tate’n vânlêngsai ah UZO President Pu.P.Chinza khup leh a kaizatamte pâhkhigûi awsahna leh zâtâtnapie in na kivâidot uhhi.Gangpi hla ni 11 niin ka inn ah,UZO makâite leh mipite kimutuona leh houlimna na om uhhi. Gangpi hla 12 ni niin,ZOD in Pa. SK Mung huongsung ah thupitahin,UZO makâite Zolâm toh vâidotna na kibawl a,mipite toh anzaluina na kineipi hi.
ZOD kei phudoh hi,ciin thuthang a om hi. ZOD kei ngen tang phudoh ahiloudân thute a mâilangah i simzouta hi. ZOD leh ZSP khantouna díng leh hoina díngin theikhamkham in,ka na pang sâm hi.Mipawlkhat in a theisiemlou zieh uh a’ta diei? ZOD pen a mawh demsiet uhhi. Delhi khopi sunga mipite toh kikupna om masa loupiin,ZOD suhbei a,UZO phukhiet díng thu thakhat in,ahing om hi. Tam thute pâulap in,mi khat leh ni in,ZOD makâite leh kei pen UZO deilou dânin ei dem u’a, tuaciin thudihlou a’ng tângkoupi uhhi. Bangbang min in kipota maleizong,i mi i sate’a dínga silhoi bawl khu kûl leh poimaw in ka thei hi.
Zo/Zou/Jou/Zhou/Dzo/Zao bangbang min neiin suong in,kiminvawta maleizong i mi i sate îtna leh lâinatna tahtah lungtang i nei tuon sih uh leh,mâilam hun cieng ah zong,i khotâng hinkhuo (socio-economic life) leh i nam khantouna (progress) hamsa mama díng ahi,cithu pen kimucienta hi. 2008 kum Doupi hla ni 15 niin 2008-2009 sunga ZOD vâipodíngte kitêlna hun ah,Pa. Khakhai têlcing na hiin, tuaciin, Doupi hla ni 29 niin,ama’n panmun a luota hi. I Pawlpi uh hoi sém nadíngin,nang leh kei’n,‘tah ka pa tapa,ka nu tanu’ cia, thutah leh thuhoi têl a,pankhawm ciet dîng kûl ahi.
I Tung Sienmâng i theihoi u’a,i bieh siem ciengun,i lah u’ah,ki-îttuona, citahna, kukalna, kizâtâttuona, zaidamna, thudihpanpina,ki-ûihuplouna leh mimal kitundingna a’ng om dínga,tuaciin,i nam leh i gam in,masawnna leh guolzawlna lienpi,a’ng ngâthei pan díng hi.
**********

Zolei tâng bang dam ni e, Mâng aw

a) Guol in pâl,pal bang nang zong leh,

Vûmtung pâlpâl pâl bang in,

Tuni’n pâlpâl ta’n pal valien Mâng aw.
b) Theilou sînggam lênmuol kâikuon,

Zolei tâng bang dam ni e, Mâng aw.

-Phamsa Pu.Dongmêng
[U Dongmêng in Delhi ka pei kuon a, ei tapna la, Lamka Zoveng kum 1996 April hla ni 30 ni] 2008 kum in a ît l a ngâite nuasie in,a na muolliem ta hi.

Ke’n Ama ka tapna la.
Kumsawt Zoheisa’n na pal zing in aw

a) Na pham tâng bang pal e,U Dongmêng aw,

Sien in na lâukha nâu bang sâng hên.

b) Sien in lâukha nâu bang sâng hênlen,

Kumsawt Zoheisa’n na pal zing in aw.

-MK
“Tawndân a khawlden sih a,a halzing ahi a, a kihleng gige ahihi” [Culture is not static,it is dynamic,it always keeps on changing]

HÂMKULMUT(IDIOM& PHRASES)

ÂH BUPSHI BANG= gim mama, thatawl mama,piathawlou.
ÂH NÊLKÂI BANG=thupi,lien,loupi.
ÂH SINKHA BANG A KHÂ=thethuoi,tuimaw,deimawhuoi mama.
ÂH-ÊH ÛI BANG=mihingte atawm vang u’a kithutuoh uh hausa uh, tualeh thuneina nei uh.
ÂHNOU TUIKIE BANG =halmaw mama,hâtmaw mama.
ÂHPA NUPA BANG=kituoh,ki-îttuoh,kithutuoh,omkhawm.
ÂHPI IN ÂNOUTE AHAKÛI A AHUI BANG=enkol,poimawngâi, kol.
ÂHTAL KHUONSIE BANG=thusie,pâupêng,mi toh kituohlou.
AKÊL LU PHÛM DAWH=a thugûh phuol kipholkhie,ahina tah kilangdoh.
ANÊUPÊN IN ÂH KÂNG CHIE LOM=sil khat poupou mi khat in a satan lawmloupi huoihamtah a,a lom.
ANNJÂNG KHA BANG=tuilou,tuimaw,zâh nuom huoilou
BAWNGPI KIPHIN BANG=thumangmaw,kiphinsie,thununglou.
BELENGTANG KHIEH BANG=thu akihil hil vanga lut lou,tum joulou,thawn.
BELTA BU DU=dugaw,deigaw.
BUIPI AKUO APHÂH KUON A TAWP/KIA=tupna ahilouleh sepna khat pou alawchin kuon a khawlsan,gim sasa asepgimjou a aga aneh kuon a tawp.
BUI TOHOL BANG=buoisah mama, sugenthei mama, om ngimsah l lou.
CHINTUIGU KANG JÊN A PANG=aneisate teng seng a pang, hatangtaha pang bembom,tha leh zung neiteng toh pang.
DAWI HAVANG KÂL A SUOHTA=zauhuoina mun pana vangphathuoitaha a suohta.
GÂLLU GÎNG A GÂLLU TUOH=pêltheilou sil gênna,mun khat apata kuon a gâlging a atâi leh atâina mun a gâl ana veve, mawpuohna khat a tâisan leh mawpuohna lienjaw sêm leh gihjaw sêm tuoh .
GOUTANG KILIA BANG=ginsie,lim mama,thanuom mama,kipei lele kawi.
GUOLPÂU DÊHNA ZANG=mi toh kidemna zang,mi dêhna zang.
HÂHKOL HET=gimna thuohsah, gimsah,buoisah,puohgih pie.
HÂUSA I GÊN LEH HÂUSA HINGSUOH=mi khat thugên kigên lâitah a tua mipa hing suoh,thugên khat tângtung.
HÂUSA NGAI LOU HÂUSA= vâihawm ngailou vâisai,thukhen ngailou thukhen,vâîhawm siemlou.
HOULIM SA SÂNG IN TUIJAW=houlimna poupou nuom kisa,kihoulimtuona khu apei lam kithei pah manlou ahijieha sa tui mama toh kitêtuo.
HUI MUT SUONG SE BANG=athugênte,athuhilte khat bil a lut joulou,atuhna dînga tulou,a natoh a thawnsuoh.
INN GUO LEH GAM GUO=innsungmi leh pulammim,mi kinâîpi leh midang kinâîpilou.
JAWNG HA THEILOU JAWNG HA THEISAH=theilou dîng sil khat theisah,pilsah,JAWN
G IN AMA KHÊNG MU LOU A MI KHÊNG AKAW=ama-leh-ama mîtmawna/mawna/chitlana ki-enloupi mi mîtmawna/mawna/chitlana gên gige,mi ngaw zing.
JAWNG NÊH NGÂU IN SANG=abawl khâhlou silkhat jieha liêuna-pânna tuoh,aliêuna lou dîng mun a valiêu kha.
JAWNG THUOH DÎNG NGÂU IN ATHUOH=pilvanglou man a thuohlou.
KÂMKEI IN AGIEL HENG LOU=abepbep,angaibep,agîtlouna mangthang tuonlou.
KAMKOU MEISIE=gintatloupi a meisi apata meikuong suoh.
KAMSIEM IN SIEL LEI SANG=kampha tawisiem khat in mi lungthah lâî zong alungkimsah thei hi,thu-leh-la gênsiem khat in thu agên leh liêuna mâithei.
KHANG HLIM PHEDÊN BANG=kimut tui mama,imut tui sêngsêng in a kiphoh leh zong khang thei lou.
KHÂU SÂU SÊNG KIKÂI-AWH=thu-leh-la akigên sawt leh buoina pieng.
KHUOILI TE NUPA BANG=nupa ki-ît mama,kituoh mama na asep uhleh sêmkhawm, a nêh uhleh nekhawm,atou uhleh toukhawm, adin uhleh ding khawm kigênna ahi.
KHUOIPHÂNG BANG=lien,gol.
KHUOIPI HÂNG BANG=lungthah mama,thangpâî mama.
KHUOIVA DE BANG=na sêng mang lou,gâûnat.
KHUOIZU HLUM BANG=hLum,hum,tui,lim.
KHUOL HOL LEH GIP HOL KITUOH=deidân kibang leh ki-îtte gênna ahi.
KHUOI SIM/SUTE’N ALIEH UHHI= natong leh nasêmte’n aga themkhat bêh ane têitêi uhhi.
KHUOLZIN SALIEM ZUI IN PANG SI’N=mi khuo ah va lîp sêng si’n len tua khomite va subuoi kawi si’n apiehpieh uh toh lungkim mai in.
KHUTNUA KHUTMA LIEH=zuoutat,ginomlou,lepchia,lepchie.
KIGÛLLÛH=kidaphou,kidapkup,agûh a kimu.
KIKHÂUPHE NGAWNG DOT=kisim huotbawl.
KÎ LEH NEI BANG=kingâî mama,kituoh mama,ki-ît mama, kilungsiet mama.
KI-UI THUONG HUP=dih leh dihlou en lou khuol lou akipawng panpi.
LAWI NÂH SA BANG=thununsah bai lou,thumansah hasa mama.
LAWI SIH SIEL SIH A SI= ût leh ûtlou omlou a pâubawl têntun.
LIENDOU LEH THANGHOU MÎM TANGKHAT KIPHALHAWM BANG=ki-ît mama,kingâî vatun,kilungsiet sêngsêng.
LUITA SUA LEH BÊLTA PHÛL BANG=huoisie mama,gum mama, om ngimtheilou.
MÂI DAWNG BANG=hoi sepsop,ngêh sepsop,khangdawng mama.
MAWNG BANG KIKAWI= ki-ît mama.
MI KHUT A GÛL HING MAN=mi lepchia leh ngiansiem(chalâk) ama bawl tânga mi bawlsah,bangma tong pei lou a mi tohsa leh sepsa ngam kigênna ahi.
MI MU MASA HA MU MASA=eima sânga tâjaw leh piljaw kigênnna ahi,upa.
MITHAHTE NUPA TUNGTUON KITU BANG=kidemna,kidêhna gênna ahi.
NÂNG HIEM BANG=pil,khel,taima,hât.
NÂUPANG KÂNG KÂ BANG=sil chinteng mawh diegaw,deigaw chinteng mawh nei sawm.
NÂUPANG PÂPE DEIGAW=amanphatdân leh ajieh theilou a sil khat poupou mawh deigaw,mawh âm.
NÊHLOU DÎNG VONGGA KA KEI LEH MAH=lunglut tahtah loupi a sil khat avabawl leh tuitum joulou,ama toh kisai lou sil khat avabawl leh hasa mama sa thalkiadoh.
NELOU DAWNLOU NEPHU BUON BÂNG=
NGAL HAPÂ BANG=gînhuoi mama,hât mama,lûn mama.
NGALTA LEIKOU BANG=mimawl kamtam gênna,kisuhkhâhna simtham lou ahivanga na tham,thu nêunoukhat apata thuhuo- isie suo, na mama.
NGALTANG HAPÂ BANG=gînhuoi mama,hât mama,lûn mama
NGÂU MÂI KÂNG BANG =mêlsie mama,hoilou.
NGÊNTANG TUMSUH BANG=kinuale nawtalou,lunglut mama, lutthuh,lutzang.
NGÊUNOU TUOPASAL ZANG LAWNG KHÂI=mi pasal ching khat china.
PAT NÊM BANG=thunuom,zâînêm.
PENGLAM ÂIKUO SAW BANG=zuou,akilawmlou sil khat pou dugaw leh deigaw.
PENGLAM SAKHI MAT BANG=sil khat theichien loupi a vâîsai mawh,hamva,tâpva,tupna bei,lunggêl bei.
PENGLAM SHU THEI=zongsang,sil khat athei vânglah khat tuden bawl dendon,bawl mielmuol
PHEISAM BIE NA BAH=abul lam a hâusa leh nuomsa mama tawp lang a a’ng vângsete kigênna ahi.
SAKHI THAT LOU NGALTANG TUM=a kalvâl a sil khat poupou nei sawm muna neilou pi a ,gari hoi nei sawm,thakhat a hâusat mawh sawm,bawl joulou dîng sil tum.
SANG-ÂH BUHTOM=innsuong dudah lou,hindan dudahlou.
SANG-ÂH PALAI=mi zuou,lepchie.
SAWMTANG KHAT ZUNTE=innsung khat a mi khat a minsiet leh innsung miteng a unpi u’a minsie uh.
SAZUH KÎ PUOH= amin maimai a apuoh.
SIEL GUO THUOH A THUOH=hasa nanleh, genthei huoi ma nanleh zong thuoh pâupâu thuoh tinten.
SIEL IN TOT LEH NÊH ATHUO=hoisa mama ahivanga gênsie gawp thop,gênsiet leh nêh athuo.
SIEL KOT KÂNLA BANG=mâitâng joulou,lawching lou,piching joulou.
SIEL NÂH SÂ BANG=chîl hasa,thumanglou,thunung lou.
SIEL SHINUA SIEL DÂI KÂI BANG
SÎ LEH BÂL BANG=kituoh mama,kithutuoh mama,ki-îttuo mama.
SUMKUONG CHIENG PÊ=sil khat athei leh hasuo nuom nawnlou tutâh den,lungsim kiheng theilou,kikhêltheilou kigênna ahi.
SHITHU NAM JÊN A PANG=ha pan a pang,kithakhêtlou a asepna khat a tangpan a pang.
SUONG TUNG A TUI SUN BANG=dêulou,thumanglou,gênte ngâilou.
TAGA NAWI MU BANG=nêh khâhlou mu khâh lou sil khat athei chienga akalvâl a ne mu sawm.
TALTÊNG(TANGTÊL)SITAN BANG=lungtom,lungkhawh, hiemngam gênna ahi.
TAWM TAWI NGAILOU TAWM TAWI=vâihawm ngailou vâihawm tuachia vâihawm siemlou.
TEM BEI A NGAWNGTAN=mi khut a bang khatpou mat sawm ahisihleh tha sawm.
THASIE HUL DU=nasêm peiloupi a,sa tuitui du,nasep kukal loupi ann tuitui du.
THASIE TÊHSIE TANGDEN=tehsie nasêm joulou banga nasepna apata kihemkhe mang,nasepna apata kilep mang.
TO-U BANG A PANG=mi khatpou khu anêu vânga pang têntun, lunglien.
THUPHA IN KOTBIENG KÂN LOU=Thupha leh thuhoi khu mite’n ajâh chiengun agên gênsawn ngâp khol sih uhhi.Thuhoi leh thupha gênsawn hasa kisa hi.
THUSIE IN MUOL KUO KÂN=Thusie pên mite’n ngâinuom in khat jâh khat in ana gênsawn pai hi.Tauchiin akithejâh bai mama hi.
TUI BANG KIGAWM=kichimat,kitêng,kinung,kithutuoh.
TUI BUOHSA LUOKIATHEILOU=Hun peisa kilekia theilou in thu kikhêlsa bawltha kiathei nawnlou.
UI MEI KHUP BANG=meipuoh,meidawi,jâu mama.
UI SUMLU=zumna bei a sil khat mu sawm,neisawm,nêhsawam.
UIMAW GAMSU BANG=tâpva,tupna neilou a mawh pângva.
UIPI MÂI A SAGUBAW KILIA=tâ,jawl sawm.
UI SHI A SHI=zumhuoitah a shi,mi mawhna banga shi.
UM TOU=tou muong,bangma ngaituona khawh neilou a tou muong.
VÂI LAH ZUNTHAH BANG=apanna bei,lungsim sunga mi thugên khatbêh zong lut lou,lunglut lou.
VAKHU TUINI BANG A KILOM=kihawmthaw mama,kikhuoltuo.
VAPHUOL MOULA=mou deisahtah k hat pui,mou pui.
VÂUPA BANG A PÂ=ngou mama,êm setsot,pâ phingpheng.
VOHPI MÂI A SUONGMANPHA KILUI BANG=sil manpha khat a manphatdân theithei lou.VOHPI NGÂH MANG NGAILOU=numei hoi lungching leh anua ama khuolzingte in khiel ngailou.VOMPI SA HAWM=a hâm joupên leh a thahâtpên in satan tam a kitan a, midangte pên anêu nounou atangsah hi. ZU-LEH-SA NEKHAWM=kipawlthei,kilawipawl,kichimat.
ZU LEH VA HÂM NGÂI=khongâi,lung ngaituo.
ZUN LEH ÊH SUOH=pannabei,mahthah,mangthang.
ZU SHI VA SHI A SHI=shi ginalou a shi,gamtum.

GUOLLUI HÂM (Old words)
ÂI=siempu in azah thusim,khamthei leh guithei nêh leh dawn sil.
ÂI-AM=lungvâi,lungmaw,tavai.
ÂIKOHÂN=âipi akuo a hângsantah a apan bang a mi koipou khat akhosung-avêngsung a hângsan ngam tualeh kipâusah apulam apwt chieng a meipuoh mama.
GÂUKOU=vângphalou,hamphalou,kâmphalou dînga mim samsie.
GÂUSAM=gâukou,vângphalou,hamphalou,kâmphalou dînga mim samsie.
GÂUSAP=vângneilou,ahingmaw, apoimaw, ashithei dîng a samsie.
GÂUSAPNA=samsietna,shisamna,kamsielawna,hâmsietna
GIE=mul,vamul.
GIEPHUOL=gamva chieng ahisihleh mihonpi a opkhawm chienga giena mun.
GONGVÂH=phâhvâh,mi apanna omlou a kipumva thâu.
GONGSAN=nêh-leh-dawn lam a lawptawp,dugawhâu,dugawl.
GUOLPÂU=mi simmawna,kalphêt,phinna.
GUOLPÂU DÊHNA=mi simmawna dêhna
GUOLVÂH=mipi vâhna,zapi annluina,annzaluina.
HÂHKOL=sil gil mama a kisui; ngawng a kithuo van puohna vanzah.
HÂIKÊH=ûmgaw akikim a,kiphal hah kikhuotkuoh,mêtui hawpna kizang.
HÂIKHAT=bângkuo khat,bê khat sung a tulpipa phalna om leh om sih leh zong a innsung khat kihuoituom khu hâikhat ahi.
HÂNDÂLNA=Shivui jou a zîngni in tu leh tate’n hântung sing leh guo toh îm bawlna.
HÂNKHUOM=salu leh âh giesawnte tâhna hântung a kiphut khuom.
HÂNLA=mipa khat in sa leh gâl amat chieng a kipohna, kiphatna, kitângkouna leh a hânsanna etsahna dînga osângtah a alasah.
HIENGKAWM=Nu leh pa, U leh nâute va kawm.
HUGÊN HEHU=thupigên, uonggên, pigên.
INN SIENSUO=inntha kiluo masang a Pasien kûng a kilatna.
INNGAM=hlâh leh suon bei,mangthâi,chibei
INNGUO=midang,innpilou,innsungmilou.
INNPIPA=innsuongpa,inntêhpa,numei mouthasa a pasalpa’ pa. INNPINU=innsuongnu,inntêhnu,numei mouthasa a pasalpa’ nu.
KÂU=misung a lutthei hagilou;zân chieng meikuong a lêngthei.
KHAKHAMVEI=shithei khop a lungkhamna leh zâuna lienpi tuoh.
KHÂNGDOH=Innsia/phâitom lang innsung bâng a pheisam biehna dînga tâunêu/lângnêu kidaw.
KHÂUVAW=Zuphelpi,zubêl sâu khâu toh kiviel/kikat.
KHIENGKHAW=Kâusie in mi amat chieng a kithoina chikhat.
KHITA=meipuoh,meidawi,kingamla,zâu,lâu
KHONEI=zubêlnêu.
KHOU=dou,hou,hlou
KHOUNGAWN=douzou,thatzou,that.
KIBÂNHLÂH/KIKHAKHEH=a bânbân a khatzou chienga khatpang.
KÎHTÂT=gîn,zâu.
KÎHTÂTNA=gînna,zâuna.
KITHADOT=abânbân a khatzou chienga khat pang.
KITHAHÊH=abânbân a khatzou chienga khat pang.
KIDAWILAM=china loupi a china a kigên,chinatna neiloupi a china a kigingta.
KIELLAP=hunlap,ahunlâitah a zahthei a om.
KIKÊLKI=kituohlou,kimatlou,luongkhawmlou.
KIKÊLGOP/KIKÊLPAWL=kigop maimai lungsim kûlmut kihiltuolou.
KISAKHIBÊ=kibêtuo maimai,bê tahtah hilou,khat leh khat phattuomna dînga kibê kou maimai,kingâina tahtahlou.
KISÊNGLE=Innsung ni mou kipetuo tuoh/kihengtuo;chîndân hoilou vawt.
KÎTA=zâu,gîng.
KOSA=mi khat ashi chienga mishikhuo a ajawpi dîng sa kithat tuami sa shi-uopteng nêh dînga kihuon.
KÛLMUT=lunglut,thûh,chia.
KUNTA=tam,innkuon mi tam,tâhâu innkuon.
LÂITA ZU=shizu,lâitajouu a inntêhte zu sup.
LÂNGKHEN/VAIHAN=mi shi chieng a pu a pang kosa huonpa.
LUNGÂHNA=kingapna,kingâhna,dohtu,tunna.
LUNGSHI=lungsim ngaituona bei,mi khatpoupou in azi ahiei ahisihleh apasal deijoulouna a nei khu lungshi kichi ahi.
LUONGHAL=Ngâhnu khat leh tangvâl khat akinun kuon u’a khat lang pênpên innsung mi ashi khâhleh khu luonghal kichi hi.
MÊLMU=tupa a shi chieng a a nu pienna a pulamte’n amin manmawna dînga mêlchina van khat;teipi,bêlpi,khiba,chite a pieh khu. Tulâi in,Pi ahisihleh Pu a shi chienga van kipie khu mêlmu a kichi hi.
MISHIKHO=mihingte ashi chieng u’a atun masahna mun.
MÎMZU TÂNGZU NÊ=pawibawl,noptah a hing,guolnopbawl.
MOUSA=numei pasal neisa anuate’n avâihâhna sa pumkhat kiposah khu.
NÂHNÎTHÂM=lungkimmaw hâm,nuomlou hâm.
NÂHKAWNHÂM=lunghimaw hâm.
NGALTUNPI SALOM=deina mun pet/ât/lâi.
NUAKAWM=Numei khat in pasal a neijou hakhatnua a a nuate inn a va kawm khu. PANGPA=zâuna toh dim,khita,kingamla,kimuonglou.
PAWNGPAN=khawhsalou a pang pâupâu,mite’n bangteng gên leh zong pang têntûn,dih leh dihlou,hoi leh hoilou mite’n bang a chi ngâi diei,chi; ngaituona neilou a khawhsalou a mawhpan pâupâu.
PHUI=siemthu,Pasien ahisihleh pusa biehna thusim,thugûh,thusie thupha.
PHUISAM=kithoina siemthu gên,thusie thupha gên.
PHUNGSIMNA=satha chienga sa kihuon nâng a kisil ditdet,bête shigâl ahingpei poupou sa kipie khu phungsimna kichi ahi.
PÎEUGÂL=mishikhuo apat a mishite apei chieng u’a atunna uh luigâl;vângam.
PU SATHA=tute deisahna leh ngâinatna etsahna dînga pu satha.
PUSA=Pu thupipên,Bê leh phung hing kuonna Pupa,Pienna pu leh pate.
PUSA BIE=pupa hagâu thoidam,pupa hagâu taisah/lungkimsah.
PUSA BIEH=Pupa thoidamna,pupa hagâu taisahna.
SALAM=kigapna sa kithat.
SALAM SÂT=mi khat a kigap chieng a sa a tha khu salam sât kichi ahi.
SAM=hân,kou,phawh,hil.
SAM=lutung a pou mul bang.
SANG=sa,gamsa.
SANG=ei ban a pieng nau khu i sang kichi ahi.
SANGGA=taga,nu neilou,pa neilou.
SAPÊNGKÂ=Ha ka a kap,nah ka.
SASAN THAT=sasan kichi sakhi sâng a gangjaw leh tâihâtzaw sa khat ahi. Sasan thatzou mipa khu sa zakhat that in a na kisim let hi. Sasan thatsa mipa khu khodou,ton chite a op chiengin sasan zu a kidawnsah vatêh hi.
SIENSUNG=Innsung, Innkuon
SHI-ANN=mi shi chienga ann kilui khu.
SHILA=Nu a shi chiengin a manu pienna pulamte’n sa ahing pie uh a, nu mêlmu dîngin innsung a om a deipên khat(tâubêl,khiba, chite) a sinu mêlmu dînga a kilâh khu shila kichi ahi.
SIEL=inn a kikhawi; gamlah a kiha lawital chie vêl pha ganhing vom manpha khat,nidanglâi in mouman ken in ana kisim let hi.
SIELPI SUNG KUON=tute;sanggamnumeite tate pouma pu adîngin sielpi sung a kuon ahi.
SIELPI LEH SALAM=Khosung a mi khat in tawndân palsan a opleh hâusa upate’n akilawm bang in sa alieusah uh khu Sielpi leh salam kichi hi.Salam pên voh tûhli têitêi ahi.
SIELSIH=pâubawl,bilsih.
SIEM=puongatna vanzah.
SIEM-ANN=siempu in kithoina abawl chieng a a ann donpên.
SIEMGÂN=puongân.
SÎ LEH BÂL=kituoh dîldiel,kikhentheilou,kingâina mama,ki- îttuoh,kipawl gige.
SISANPAL=numei khat in pasal a neinua a,ta a nei leh sisanpal ahi.
TAMALOU=vâllou,panna om zing.
TÂNG=tangvâl,pasal zi nei nâilou.
TANGKHAT=pienpi unâu sanggam nei lou.
TÂNGSÊU=hâusa inn a kisung tângtang,shie.
TANU SAGAW/SATHA=sanggam numei ahilouleh ninu sa kitha.
TANUPI=sanggam numei tâpên ahisihleh tanu tapên.
TANUTÂPÊN=tanupi,sanggam numei tâpên ahisihleh tanu tapên.
TAPZÂNG=meitawna kimvêl laha munjâng.
TAWM=lungthu phuna;meitawna mun.
TAWMHLANG=meitawna hlanglam.
TAWMSAH=meitawna sahlam.
TAWNGPÂN=mi te kihâuna kikâl a thugên,mi tânga tâu,thum,ngên ngêtngut.
THAMAN=numei in pasal anei chienga sum dangka 2/- ahilouleh dangka 10/- apieh khu thamana ahi.
THEIPÊNG=nga matna gopêng,chi koina gopêng,tui puohna gopêng
TÂUMUI=tângthu,tuonthu.
TUONTHU=khanglui thu,tângthu.
TULPIPA=bulpipa,be leh phung sunga atâpên.
TUNSA=moutha nu beng kiposah.
UPA=khosung vâihawm mi.
ÛPÂ=sanggam tâzaw.
UPADI=dân,kipuihuoidân,tawndân.
VAPHUOLNOU=neita,mou dînga numei khawi.
ZUNGPI=bulpi,tulpipa.

ZO THUPILTE (Proverbs)
ÂHBU LOU KÂNG IN GAMMÂNG LÂI APÊ Thu tamna mun ah akijang hi.Ahbu lou ahileh loupa kuongbai mama ahia, meisi khat atuhkhâh leh kuongpai ahi. Thu limlou khat leh thu neunou khat akigênggên leh lênglêng in thu liensepi khat suoh china hi.
ÂHPI IN NE TALUO VÂNG ACHI LEH KILAWKHU=dugawl sêngsêng shi theina ahi,du-âm tânna,mi huoiham vângsie.
ÂHTA MANG KUON KITUTU=âhtate aman kuon chiengun akitutu uhhi.Tuachi mabangin mihingte zong aman kuon chieng uleh kituomawna,kiphunsanna,kihâuna in adim hi.
ÂHTUI SUNG A AKÂNG DÎNG LEH AVOM DÎNGKITHEILOU=thu magên gênna in akijang hi.Thu adihna tahtah theichien loua mawhgên atung nâilou akilawm lou phiel a thu mawh gên. ÂIPI SAWIVA(SÎHVA) LEH ANOUTE SAWIVA(SÎHVA)=nu leh pate athudih sihleh tate zong thudih lou,nu-le-pa in zuou agênhât uhleh atate’n zong zuou gênhât.
BÊL AKÊ LEH VA-ÂHTE KIPÂH=mihing khat vângsietna ah khun agâl,amêlmate kipâh.
BUIPI LEI NGIET ZONG AKHAWLTHEI=mi toh kilungthahsuona kihâuna,kilungnopmawna,kisietna chite kilemna ahing kibawl leh khongâi vingveng a zangâitah a kingaituo dîng.
BÊL A ZU BANG KIPUO CHIET LEI PIENGPAN LÛNLÂI TANGJAW VÂI=kideisah chiet lei lienjaw vai.
CHIENGKOT LEH MANKHONG KITUOH=salampi,muolhawm, singhawm sa suonuomna lampi khu chiengkot ahia, mankhong khu thâng ahi. Gintâtloupi a, poimaw hunlâitaha mi dei khat toh kituohkha a kinung.Apoimawna mun akijangtuo.
CHITHAH NUPA TUNGNUNG KITU VÂNLI LÂI AH MANG=hieng leh san,innsung khat,chi khat zât khat let dîng kitutuna u’a,lel law uh,koima joujoulou a mangthang uh china ahi.
DU-ÂM TÂNNA=huoiham ngawlna ahi.
DUMDAL NGA LULOH BANG=pil khollou,mimaw,ngaituona bei mi.
ÊH TAM SÊNG VOHPI IN KHAWNGZOU LOU=thu leh la atam sêng leh bangma ajie-apawl lâh dîng umlou.
GÛL LÛT SHI MI LÛT SHI LOU=gul innsunga alut leh kithat teitei hi,hinanleh mihing khat in ngaidam ava nget leh akithat sâm siha akingaidam thei veve hi.
GÛNGÂL MEIKHU NUOM TUOM(MEIKHUT NOP TUOM)= khuolzin chienga chimaw tuohkhate’n ami-asa khat a kituopi a tua mipa/minu ana houpi ahilouleh ana panpi noptuom mama.
HIMA(MEIMA) LOU AH THOU TULOU=aziehbei in thu leh la pienglou hi.
DAWNKÂI PHUT MASAPÊN=a pantu,khosât masapên.
HAKÂI PÂHTÂT LUNGVEI=hoi kisah khat zong a na hoilou thei, a hoi dînga gintât mama mi khat khu ana sethei.
HUN LEH TUI LUONG IN KOIMA ANGÂH SIH=hunkhawl theilou,hun apeipei a,tui zong aluongluong hi.
I THEINA TEM BANG TAWI CHIET LEI TÂNG A =kiphatsah leh kiletsah chiet lei.
INN GUO HALOU GAM GUO HA=kep dîng lawm u leh nâu kêm lou a huot bawl leh muda a ,tualeh agamlajaw leh akeplou dîngte akep khu inn guo halou gam guo ha kcih ahi.
INN THU LEH GAM THU KITUOHLOU=innsunga annkuong îmkhawm laitah a vaihawm khawm a thu gelkhawmte toh kholai leh khuolgam a thulakhawmte peikhawm in kijang khawm theilou.
KAMSIEM IN SIELLEI SANG=lieuna pânna dîng mun ah kiniemkhiet leh kamsiem taha i vatâu leh sielpi lieu dîng lâî zong ahing kingaidam thei hi.Thupha tawi mêtna ahi.
KAM SUNG A LEI LEH HA ZONG KIPET=Kam sunga lei leh ha zong akipe mabangun innkuon sung mite zong akihâuthei u’a akinuathei zêl uhhi.
KHATVEI LAMHLANG TUON KHILLOU KOIMA A OM SIH= mawneilou leh khiellou koima a um sih china ahi.Abukim,achingkim koima umsih china ahi.
KHUP IN KHÂ A KHÊL NGAI SIH=tung ate thu niellou dîng. Tate’n ujawte demlou dîng,nu leh pate demlou dîng. Ni mu masa dîng.
LOUTUL IN ZONG SANGGAM SUI=na jousie ah sanggam lâîzom sui masah leh bulbawl ngai china ahi. Loutul nua akitawpsan dîng kumin patlei dîngin kibawlkia hi. Inntêhte innhangte,tanute in adeina munmun uh patlei dîngin kihawm masa hi. Amate'n a kihawm zou chiengun midang adei a umleh a pebep uhhi.
MÂI GUI AH ÛM GA NGAI LOU=phung khat apatin phung dang kihengthei lou china hi.
MEISEL KHAT IN LUI NI TÂNTHEILOU=mihing khat in touni aneithei sih,sepna khatpoupou a i tantawh a lungkim dîng.
MI LUONG LEH DOL LUONG MANG LOU=mouman piehlou a mâîthei maimai hilou china ahi.Mouman piehjoulou hilezong piehjou matan a bat hi gige hi.Batmang umtheilou hiel hi.Mi thasa khat luongman um têitêi ahia,dolluong amuot theilou leh amuot ha bangin mouman leh luongman mangtheilou china ahi
MI SHINA DÎNG I BAWL LEH EIMA KISHI=mi sietna dîng i bawl leh eima tunga tu.
MITTAW SIEL KHÂU TÛH=theinabei mipil sênglou khat in midang khat adeina lam ahilouleh a deilouna lama a puipui a,ahin ajui pa’n shina lam e chizong theiloupia amawh jui khu gênna ahi.
NAKE KAWI IN NAKE MÂM A SUONG=Nake kichi singkung kawi ahia, aba mêng kaht teng a mâm,a tang jitjet hi. Tuama bangin nu leh pa lâîsiemloute’n zong tate lâîsiem anei hi. Nu leh pa hoi khollou in ta hoitah ahing nei uh gênna ahi. Mi bangmalou a kisimte zong milien hing suohthei veve hi.
NATANG ZONG A KHÎLKHÎL IN OM=ahâî ahâî,abih abih ahisihleh abawngbawng a mi nam khat su ng hilouleh innsung a kikhendân gênna ahi. Be leh phung zong ahâîhâî in a um u’a tu leh tate zong a bawngbawng in a om uhhi.
NA TAWM MA IN NA TUHNA DÎNG EN IN=na khat poupou na bawl ma in ngaituosiem masa inlen theiloupi in mawh bawl si’n.
NÂUZAW MALÂN=Zawlou sêngsêng dîng mana ahâtdân a kilang masa.
NGÂHNU HÊL IN PHOHBUL TAWI NGAI LOU=Nungah hêl dîngte’n anungahnu anga nuom leh kamsiem,kingainiemna, kampha,kamtui kamteng janga nungah hêl dîng ahi.
NUMEI GÂI TEITANG NÂMTANG KUO,PASAL LOU VÂT IN TUOLGÂL DOU=Numei gâî pên shithei mangthei zing ahi.Tuachi mabangin singtâng louvât pasalpa zong shithei mangthei leh zâuhuoina adim ahi hi.Tua thamlou in numei naupaite vang thaltangpâî toh kigênte ahi.
NUMEI GILOU IN PHUNG KHEN=Mou gilou in apasal unaute ahisihleh apasal be leh phungte a innsung u’ah bangtan e khat akidangkoisah hi. Numei gilou in unau kituohte zong akikhensahthei hi.
NUPI GILKIEL IN BUBÊL A KÊH,PASAL GILKIEL IN LOUMA A KÊH=Annhuon a numei pang ahia, innkuon khamkhop dîng ann tam huon i n ann bêl kêh hi.Pasal in ann khamkhop dîng louma lam ama mawpuohna ahi. Ann bu a khamkhop a upleh louma kêhlet pen mam mawpuohna ahi.
PHELUM(THELUM) PAWTNA DÎNG LEIKHA’N PET(KEI)= Mi khat letna dîng leh lalna dingin pawlkhat in pan ahing halâh ngai ahi.Khantouna dîngin mipil khat in alampi asiel masah ngai hi.
PUTE LEH GITTA IN CHIEM MASAPÊN=Tângvul/buvul a tuipum masang apatin in gitta in neipai hi. Tâng a min chiengin kila a, a lâh masah pên uh pu zu dîngin kibawl hi.Tângzu/buzu a bawl jou chiengun pu zu sup/khol puoh bawl gige ngai hi. Inntêhte’n in tâng anêh masangun gitta in chiem in pu in zu chiem masapên china ahi. Pute zadân leh gîndân kigênna ahi.
SAKHI API ASAN LEH ANOU SAN=Nu leh pate umtandânte khu tate’n abawl u’a, a nu leh nâute bawlteng khu atate’n abawl nuomse hi. Nu leh pate ahoi uh leh tate zong hoi.
SAKHI NGALTA AH BANGMA BEH LOU=sakhi ngalta nêu mama leh pan mama ahia,tuanah a tel nêhkham beh lou hi. Tuachi mabangin mi khat bangma hina leh letna neilou khat ama leh ama kiphat,kipoh leh kiletsah hilezong bangma athupina om lou.
SAKHI THAT LOU NGALTANG TUM=Ngaltang khu sa mathasa mama ahia, sakhi pên ngaltang sânga mat bailamjaw gînhuoilou zaw. Asiemna bukim neilou a, sângpipi tun sawm. Lâîsiem loupi LDC zong mujoulou nu/pa khat IAS,IPS hisawm mawh. Dangka 100 zong neizoulou mawtaw leisawm mawh.
SAME IN HUM TALUO VÂNG ACHI LEH AM(MAH)= Same kichi singga zât khat ahia, aga pen humtuoh mama in a kilang hi. Ahivangin a kinêh chiengin hum lem a lah in mah phelphul hi. Mihing in hoitaluo vang a chileh sietlaw. Sil khatpou khu a vâlkâî i bawl leh hoilouna tunthei.Na khatpou atupdân ase zosop a ahing pan chiengin tami thupil kizang hi.
SÎNG IN A THAH KHELOU(KHIEMLOU)=Sîng khu a thah a hia,heima pou ah kitu leh zong a thah veve hi. Tua mabangin migilou,mihângsan khat khu heisungsung ah um leh zong a gilou thou a,a hângsan veve china ahi.Numei gilou khat a kihenthei lou gênna in zong a kijang hi.
SIA ASAT LÂIPÊT IN SÂT IN=Siakhêngte sia khu asat lâitahin anop dândân un akhêng uhhi. Tuamabangin tate bangkim zil hun ahipêt a zilsah dîng ahi. Ahunpêt a, hil dîngte hilchien dîng ahi.Thu khat la khat akithan vengvung lâitaha ngaituo paidîng china ahi. S
IEL ÊH TAM SÂNG IN Â ÊH UIJAW=Mihing tampi mawh up alunglut tahta lah umlou nasem pei lah umlou sângin mi tawmnou khat lungkituohtah a nasep lawching jaw china ahi. Thu leh late tampi mawh gengen a tahtah lah umlou,thugen mi tam mama zui mumal omlou.
SIEL SHI NUA A SIEL DÂI KÂI=Topi in asiel neva chia sieldâi kai sawm asiel topi a’ng tawjou bepa khanglou pan in,siel khumna dînga siel dâithaw bawl china ahi. Akikhêlnua a khanglou pan in akivênna bawl bep china ahi.
SIELTAL TAGA LAWITAL TAGA KHATVEI KILE=Ganta tagate a neu laiun a kapkap u’a, hinanleh ahinglet chiengun a hatpen in a pangthei uhhi. Tagate,misimmawte,mizawngte,miliengvaite, ni khat ni chienga hing lienthei,hausathei,nopsathei,ahi u’a koima simmawthei a umsih hi.
SING A PÂH ZOUSIE GA KIMLOU=Mihing khatpou khu athudih leh thuman dînga gintâtpai lou dîng.Gingta bai si’n china ahi.
SING OPLOUNA’H GUO KIZANG=Sil khat akilawmtah a um sih leh adang khat kijang china ahi. Lamkai ding dei bangtah asiem apil achingkam a uplouna mun ah seim in siemsih leh zong mi khatpoupou lamkai dingin akipangsah china ahi.Innkhuom gil uplouna mun ah guo akijang china ahi.
SUONG KILIALIA IN PANNA A NEI SIH=Suong akilialia chienginleh a pu tungah bangma a behthei siha a mâm pingpeng hi. Mi thudihlou zuou leh nâl a kipei koima’n thutah a asimloute khu atawpna ah panna neilou ahi.
SUONGPI SUONGTA’N A THEH LEH A KIP=Suong kiguol chiengin suongpi maimai apang siha, suongtate’n zong asuong golte atheh kinkan u’a tuachiin adet uhhi. Tuachi mabangin, aneu alien apankhawm leh nam khat ,ahishleh mihing pawl adet hi. Panna neilou mi di’a bang hilou simmawpen zong midangte’n ahing hanthawn a apanpi chiengleh panna ahing nei a a simtheipen leh muonpen in ahing umthei hi. Khosung a hausa khu hoitaha nautangte’n ahing panpi leh khotêndân leh giehdan ahing kitup china ahi.
TAGA SIEL NEI LAMPI GEI AH KUOL=Tagate ahing hausat chiengun anei-alamte uh mite mu dingin atalang zel uh ahi. Mi kiphat,mi kipoh,mi kihausasah,kipilsah,kihoisah china ahi.
TANU GINTÂT ZAWLGAI=Tanu gintatpen in innsung muolphouna hing tun china hi. Mi gintatpen zong gintat bang ana hilou,mi khat hoi/pha i sah mama zong a giloupen ana hithei mawh.
TÊNGKOL PANGKHIEL TUITAW A NGÂH=Mi kihisah,kingai sang mama,deitel mama,mi bangma a simlou a’ng kieh tahtah bep a, thuohla mama zum leh dai toh kidim in ama leh ama kipâmsedoh tualeh mite toh kipawl ngimta lou china ahi.
TINGTONGPA’N AZI DONMAN LOU IN DIELDIEL IN KHUONG LEH ZÂM KAI=Inn leh lou donlou a noplen,nopva,vah lele zu-le-sa nene mai azi-ata donmanloute genna ahi. Mi duhdahlou.
TUIPI THUH ASIP DILDÊL=Mipilte akamtam sih u’a,thu amawh gengen sih u’a, ahun uh atun chiengin agenpan u’a tuachiin mite’n apina uh ahing theithei uhhi. Dihtatna khu akimuthie pai siha awl-awl in ahing kilang hi.
TUIPI NÊMNÊM LUONG KUO TÂI=Tuipi ahing sua vanglah chiengleh ahat mama a, tuitan mite atawmang thei hi. Tuachi mabangin,mi nunnêmte,mi lungtuolte ahing lungthah tahtah chiengleh akikhamjou sih u’a ahuoise mama uhhi.
UIPI VÂHHÂT IN SAGU BAWH TUOH =Sum leh pâi suisuite’n sum tam leh tawm leh amu teitei uha,septheithei semte in sepna lam ah tam in tawm in lawman amu uhhi.
VOHKHIEL IN VOHPI KUL NGÂH ASUON=Moutha gilou khat innsung a hing kithuneisah chiengin a innpinu(apasalnu) asuonkhie a,adeldoh china ahi. Mounu khu vohkhiel toh kigente ahi.
ZU HAWM HAMPHA SA HAWM HAMSIE=Sa abeithei ahia, Zu pen tui akikhupkhup zel a, mijousie’n atangkim thei let hi. Tuajieha sil khat poupou na bawl a na deina banga ahing up sihleh lunghimaw lou dinga ngaisiem mai dîng ;china hai.
ZUM LEH SÂILI IN KOIMA SHI LOU=Zumna zieha sep dîng, gên dîng,bawl dîng,tawpsan lou dîng. Thagum a sep dîng a up leh sep mai dîng zum lou dîng china ahi.

Philip Thanglienmang

KA LA PHUOTE(MY POEMS)

A tui luong suh zo limtui aw
A tui luong suh zo limtui aw
A va hâmhâm zovakhu aw.

A thê khuongkhuong zolêngthê aw,
A zu hâmhâm zozîngzu aw.

Anên ah zo tâng zuong ing e,
Anawl ah Zo vontawi hi’ng.
By MK

Bûhtuol zozâm pâl singseng e
Bohbuol lawibuol bûhtuol ah,
Lâilên mei dawn kiloh kiloh linlien e,
Lâilên mei dawn kiloh kiloh,
Bûhtuol zozâm pâl singseng e.

Buhtuol zozâm etlawm sa’ng,
Cieukuom zângva zai awi e,
Zuopatâng sang bang buol lâi ngâi ing e,
Cieukuom zângva,limthê khuong.
By MK

DAMTUI VÂNGKHUO
1. Tuon-a pupa mulou vuisâu lêngmei tungah
Damtui vângkhuo zuon khattang sawl bang hei ing

2. Sawl bang heina Damtui vângkhuo tuong ka tunni’n
Zokuom damtui selung va bang hing phawng e

3. Selung va bang aphawn Zodamtui lah hilou
Zodamtui leh pienna Zogam ngai ing e.

4. Zodamtui leh pienna Zogam ngai in
Sîngtawi lâi ah ngalliem vontawi hei ing

5. Ngalliem vontawi sîngtawi lâi ah tongdoh Lûn
Mâng khat Zogam tulta tulsuon bawi hi’ng
By MK

Dated: 9 August 2006 10.00A.M Place: Daman

Tuiguo luong Zolei donleng ing1.
a) Daman vângkhuo taikhuo vâl pan,
Tuiguo luong Zolei donleng ing.

b) Zolei tuiguo dondon lah hilou e,
Tuizum phuiguo luong hibou e.
Tuiguo luon lâikhun pan zuong ing

2. a) Daman vângkhuo zâlna lâikhun pan,
Tulsing,tûmsing nunnuom in lâm u’e.

b) Tulsing,tûmsing huikhidam lâng,
Tuiguo luon lâikhun pan zuong ing.
Pienna gamlei,tuizum pan donleng ing

3. a)
Daman vângkhuo khattang sol bang hei ing,
Khattang sol bang hei lungzuon zatam siel ing.

b) Lungzuon zatam siel ing,
Pienna gamlei,tuizum pan donleng ing,donleng ing e.
Ka lungzuon aw,Daman kângtui

4. a) Ka lungzuon aw,Daman kângtui,
Kihuolhuol bang kân in sang e.

b) Sên ângkawi leh vondeitengnou,
Mu bang ngâi,gâlkhuo don ing.
Tongluon kisân cimmaw’ng

5. a) Sên ângkawi leh vondeiteng toh,
Tongluon kisân chimmaw’ng e.

b) Tongluon kisân chim lou lah,
Singgam kuomthuh hibou e.
By MK



DAMTUI KINAWNG
1. Sunni tum kuon Dam tuipi pieu ah sawl bang hei ing e
Muikhuo zîng kuon huikhidam lâng e
Dam Tuipi pieu ah khattang sawl bang hei ing
Dam Tuipi kinawng e,Zodamtui luonglâi ngai ing e
Pienna vângkhuo ngai ing e,zuong ing e.

2. Dam Tuipi pieu tulsingnanêu huisi sêm ginlawm e
Thangvân tuoiguo luong nun in nuom e
Gâl tuipi kihuol,kinawngnawng valuoi e
Dam tuipi kinawng valuoi,Zodamtui luonglâi ngai ing
Pienna vângkhuo nunnuomnou ngai ing e.

3. Sunni tum kuon damtui luong dieldiel Dam tuipi zuon e
Zângvanou hing hâm luongzuon phawng e
Damtui luong dieldiel kinawng ginglawm sa’ng e
Zokuom damtui ginglawm mu bang ngai ing e
Pienna Zolei ngai ing sawl bang hei ing e.
By MK



29/11/2006 2.30 AM
Damtui kûlthûh vângkhuo lâiah,
Damtui kûlthûh vângkhuo lâiah,
Khattang sawl bang hei ing e,Ngainou,
Na vângngâi in vulvaniang ing e.

Khattang sawl bang ka heina ah,
Zândam hûikhi hing lâng e,
Lungzuon va bang hing phawng e,Ngainou.

Ka lungzuon aw,Ângkawi leh vondeitengnou aw,
Mâimit suon nuom zuopa zuong ing e,
Zuonna vângkhuo,zândam mâimit sîngmaw’ng e.

Tuizum bâikhuong khuonkhuon dataw,
Lungzuon li bang cinna hibou e,
Zâlna lâikhun tungpan tâikhuovâl law’ng e.

Zâlna lâikhun tungpan tâikhuo ahing vâl e,
Tuizum zângvanou hâm aw,
Zângvanou aw,hâmhâm dataw,lungzuon li bang cing e,
By MK



KÂNGTUIPI
1. Kihuolhuol Kângtuipi kihuol valuoi e
Kinawngnawng e Tuipi kinawng valuoi e
Santuipi bang Tuipi kihuol kinawng vapual e
Khawlhun omlou Kângtuipi kinawng vavung

2. Sau..siêu..sau...siêu...Kângtuipi kinawng vapual
Kinawngnawng e Tuipi kinawng valuoi e
Apienna vântuol hie,atawpna ka nên hie(13)
Khawlhun omlou kihuol kinawng vungvung e

3. Thangvân kawlni dawngkot hileh kilawm e
Thangvân kawlni lênkot hileh kilawm e
Simlei kuongtawl lâm hileh kilawm va-iah sâm e
Telingleng dum dide lâm ziziei etlawm e

4. Sunni tum kuon dawngkot lutsuh kuongnou lâm
Thangvânzawl a zângva lêng Kângtuipi tungah
Buolna tuolbûh zuon in lêng dieldiel etlawm e
Khawlhun neilou kihuol kinawng vavung e

5. Sau..siêu..sau...siêu...Kângtuipi kinawng vapual
Damtui kulthûh lâilu thei leng limnga bang’n
Asunga limnga tânglâmte nunnuom ve’n
Khawlhun omlou kihuol kinawng vungvung e


12/4/2007 8.20 P.M JhamporeDaman
Alsi tângnêl
Alsi tângnêl vânthamzawl ah,
Pheliplep telitlet,delingleng,
Vânthamzawl lah na tungkhuo khuo hibou e.
Cihcieng sietlei nang jou diei?

Alsi tângnêl vânthamzawl ah,
Pheliplep telitlet,delingleng
Bawmluoi zawlzawng bawinieng aw e,
Cihcieng sietlei nang jou diei?

Bawmluoi zawlzawng na vângkhuo nuom e,
Na vângkhuo sâulîm jou nuom ing e,
Tungkhuo vângkhuo nuom sâm ve’n maw,
Cihcieng na sieng ka jou diei aw?

Zân cieng na vângtâng lingleng nou khu aw,
Ke’n mâimit suon zêl ing e,kângtui pîeu tuol ah,
Kângtui pîeu tuolnuom ah,na hlîm bêl nuom ing e,
Aw,tung thangvân alsi tângnêl nou aw.

Sûn cieng mâimit sîng nam’ muonna alsi aw?
Zân in mâimit na suonchimla’ng,aw muonna alsi,
Tungkhuo na lênna tuolnuom jou nuom ing e,
Sênlâi nâu bang nang pom nuom ing muonna alsi aw.

Sênnâu bang pom a,chimlou sang bang kinou in,
Tutvûmkhawl khawm tadi e,chilah omlou a,
Na vântuol lêl lênna sâunuom tungpan,
Sietlei tuolkum theilou,muon alsi aw,nâ e!,

Alsi tângnêl vânthamzawl ah,
Pheliplep telitlet,delingleng,
Vânthamzawl lah na tungkhuo khuo hibou e.
Cihcieng sietlei nang zou diei?
By MK

A muol a tâng etlawm e 22/3/2007 4.20 Pm
A muol a tâng etlawm e,
Kholênmûi kâi nîngniang e,
Singchin pâchin pâllûn e,
Biphal hûisidam lâng e.

Hûisidam lâng muoldawn ah,
Kuomchin vâiva nou hâm e,
Etlawm muol leh tângte mâmit suon ing,
Mâimit lâm bang kipâh e.

Mâimit suong chimla’ng e,
Lênmuol khuoiloupâ leh dingdipâ
Tullêl zoheisa pâllûn leh gimnam khuongsel,
Sinlâi ah donchimla’ng e.

Donchimla’ng e,donchimla’ng e,
Eng silsel,êm silsel muol leh tângte,
Lungkituoh thelna lâm ziziei e,
Muoldawn nânêu piapia etlawm e.
By MK

Gamdâi linglipâ 22/3/2007
A ling zum e,kusa ling zum bang e,
A tulsing sâng,kânsâng lînlien bang,
A pâ pâl e,zêmpâl lingleng e,
Gamdâi linglipâ zatamte pâl lûn e.

Gamdâi linglipâ pâl lûn e,
Douling i chichi zong pâl valien e!
Pâlpum minthang khûpla e,
Douling linglipâ etlawm sa’ng e.

Zu chin vachin in bawmluoi e,
Segûl tang gûl simê lênna,
Gamdâi linglipâ zêmpâl lûtna,
Ningga ningzu âisa nienna hie.

Zîng vâiva nêunou 3.00Pm 21/3/2007
Kângtûi munzâng lâikhun tung’h,
Khattang sam bang zâl ing.

Khattang sam bang zâlna lâikhun ah,
Zîng vâiva nêunou a’ng hâmhâm zâ ing e.

Zîng vâiva nêunou a’ng hâmhâm in,
Zogam lei aw,khattang don leng ing.

Zolei chichi lah,Kângtui munzâng hibou e,
Lungzuon kân in sâng e.



Va-âh 22/3/2007 6.00Pm
Simlei vachin pieng zatam laha,
Mêl a etlawm keima va-âh hi’ng e,
Ka aw âh,âh chichi leh zong,
Etlawm keima va-âh âh valûn hi’ng.


Dapa ton nia zuchin vachin sangchin,
Zêmpâl pâl noi keima va-âh hi’ng e,
Dapa lenkhuong ginngai lapla,
Keima va-âh hi’ng e.


Lênmuol kâi leng vom veve ing,
Tuitaw tuilu lu leng zong vom ing,
Ka taw ka lu inkîng vom bang veve e,
Dapa ton nia,mangbêl vomkîng ka kinoi.

Dapa tong e,ton nuom e, zêmpâl noi ing,
Keima va-âh mangbêl vomkîng kinoi,
Bûipi lâmtuol sai zoula ing e,
Zuchin vachin sangchin nunnuom e.


Zuchin vachin sangchin nun a nuom,
Bûipi lâmtuol sai zoula ing e,
Khuongbâi lâmlâm lâm sawi kawi e,
Ningzu hlum kham bûipi sî bang nûi e.

Ningzu kham bûipi sî bang nûi,
Mâimit sîmê bang nêu t’e,
Dapa tuonthu tângthu lêl chimmawna,
Ningzu kham bûipi sî bang nûi hi e.

Ningzu kham bûipi sî bang nûi vâng,
Simlei vachin pieng zatam laha,
Mêl a etlawm keima va-âh âh valûn hi’ng e.

By MK


Ka nu shi a ka lungzuon sêng man a ka latapte;
TUN PHAM SIMTHU’N VA BANG EI PHAWNGa)
Vâimâng bânzâl zângkhên sia pa’n,
Tun pham simthu’n va bang ei phawng e.
b)Buolna mun pan khamkha toh sâusieng zuon ing,
Tung khâimu bang hing lêng ing e,
Duoi va ngêi ing ,nêm va ngût ing e.
SÎNGGAM LEI PANa)
Heina vângla sînggam lei pan,
Huikhi lâng in tong hing lêl aw e.
b)Huikhi lâng a, tong ka sân in,
Tun ngai khapham simthu hing lêl e.
PHAMSA TUN MÊL KA MUTHEI AW
a)Delhi vângkhuo gamvângla pan,
Phamsa tun mêl mu vâng chi’n,
lungzuong huiva bang hing lêngta’ng e.
b)Phamsa tun mêl ka muthei aw ,
Tung Pasien leh vângkhuo guol zîngvâihawm
Siem sa’ng e.
ZÂNGHUIVA BANG HINGLÊNG
a)Kei ka heina agamvângla Delhi vângkhuo apan in,
Zânghuiva bang hing lêng panta’ng e.
b)Eiteng ei tawi itun vângmu bang ka ngâina ,
Kei dîng siel bang lien tuom e,izaw lâizomte .
TUN LAH VAIMAWA’NG E
a)Tun pham nung in sâusieng tung ing,
Lâm bang pâh dîng ei tawi Tunnu sang bang vaimaw’ng e.
b)Tuong tun lâm bang pâh dîng, Tun lah vaimaw’ng e,
Heina sâulîm giel bang dâi Zuo hekâi aw e.

HEINA KUOMTHUOH DELHI TUOL AH
a)Sên ângkawi leh vondeiteng toh,
Heina kuomthuh Delhi tuol ah,
Tun in tanglou bang nei phawng hiam aw.
b)Tanglou bang phawng Tun sieng manaw’n,
Tuong tun kâi a kei aw nêm vêng e.

CHIEU LUMSUONG PHEI A KA DAWNOU
a)Phamsa Tun ngai ngilmawna’chi’n,
Chieu a lumsuong phei a ka daw hi e.
b)Chieu lumsuong phei a ka dawnou,
Kumsawt tulmaw lênheisa bang nang na pâl vên aw.


A muol a tâng etlawm e 22/3/2007 4.20 Pm

A muol a tâng etlawm e,
Kholênmûi kâi nîngniang e,
Singchin pâchin pâllûn e,
Biphal hûisidam lâng e.

Hûisidam lâng muoldawn ah,
Kuomchin vâiva nou hâm e,
Etlawm muol leh tângte mâmit suon ing,
Mâimit lâm bang kipâh e.

Mâimit suong chimla’ng e,
Lênmuol khuoiloupâ leh dingdipâ
Tullêl zoheisa pâllûn leh gimnam khuongsel,
Sinlâi ah donchimla’ng e.

Donchimla’ng e,donchimla’ng e,
Eng silsel,êm silsel muol leh tângte,
Lungkituoh thelna lâm ziziei e,
Muoldawn nânêu piapia etlawm e.
By MK

Dec 2002
(a) Lênna vângkhuo Delhi tuol ah
Kholên muikâi zâmzîziei e,lungzuon phawng e aw!.
(b) Lungzuon phawng e, theisên nêulâi,
Vângkhuo tuolnuom ngâi ing e,lie leh tâng aw.
(a) Lie leh tângte lâmtuol kaina
Sohdu vângkhuo zuopa tângnuom,
(b) Zuopa tâng nên ah tutvumkhawl a
Alsi tângnêl mâimit in echimla’ng e.
(a) Zuopa tângnuom tutvumkhawl a
Tun mêldei lung ah ngilmaw’ng e
(b) Ngilmaw’ng e zuopa tângnnunuom,
Lie leh tângte lâmtuol kaina.
(a) Sielsielta’ng e nunlui muolliemsate ngâi in
Huiva bang mâumâuta’ng e.
(b) Mâumâuta’ng e sênlekiathei lah hilou e
Zuopa tâng ngâi in zuong ing e.
(a) Zâlmang in zong zuopa tâng ah lâituol lêng ing
Tun mêldei toh tutvum khawl ing
(b) Tutvumkhawl ing tun mêldei toh
Nunlui muolliemsate zilkia ing.
(a) Zîngkâl phalva zângva hâm in,
Lênna tuolkuom Delhi hibou e chi e
(b) Aw! nunlui muolliemsate ngâi ing e
Ka lungzuon aw, lî bang ching e.
(a) Chihchieng lungzuon thengta diei?.
Zâlna lâikhun tung pan sielsiel ing
(b) Sînggam lei a lou bang tul dîng ka’maw,
Sienmâng lâukha tam simlei ah,
Lum bang ei sung in aw.



13th Decembeer 2002:by tphilip
(a) Tungsunni vâlnou’n thelna tân e
Biphal huikhi damnou lâng e
(b) Huikhi damnou lâng in
Sâulîm nuomkhawl nunnop e

(a) Zîndaw âi in bang na’ng bawl adiei aw
Hênta kolbu bang na’ng zen aw e
(b) Hênta kolbu bang naen aw
Vânlâi zawl a mei bang thengmaw e.

(a) Hun leh nite akiem zêl e
Ke’n lah sang bang vaimaw’ng e
(b) Lûnlâi mei bang theng mang e
Lêkia theilou dîng maw SienMâng

(a) Sien in bang a khuol e aw
Na vonnou sâulîm giel bang dâidamta e
(b) Dâidamta e sâuÎm nunuomnou
Chichieng thel bang thou dîng aw e

(a) Ka Zuo pham nungsang in
Sîngvontawi lâi ah pat bang nêm ing
(b) Sîng khên hêmthei loukha’ng
Sien aw guo bang ei hingsah kia’n.

(a) Sesum vânngai lungtup deilâm,
Khâu bang zûn lam bang heikhiel,
Ka diei maw,Lun sumtuol ah khawl ing e ngai aw.

(b) Lun sumtuol leh biphal dâidam,
Bangteng lunglâi siel ka diei maw,
Luoichieng nâu bang kei kihim maw’ng e.




13/12/2002 & 26/3/2003
Voice=00,52; temp=104; style =08

1. Thelna zâmzîzieite aw e
d r m s f m d s
Zâmzâm dataw tulleldawn ah
f f l d t l s m
Tullel a zângva zai awite aw
Awi-awi da’n selung hel phawng e
s s m r d t d
Lungzuon zatam sielta’ng e.
2. Loutuol a si-al hâmte aw
Hâmhâm data’n lungzuon phawnge
Tullel a huiva damtâu aw
Tâutâu da’n selung hel phawng e
Ka lungzuon lî bang ching e.
3. Zânsielva damtâu nou aw e
Tâutâu data’n selung hel phawng
Loutuol a si-al hâmte aw
Hâmhâ data’n lungzuon phawng e
Ka lungzuon lî bang ching e
4. Zân biphal huisi dam lângnou aw
Zân biphal huisi damlâng in
Selung hel va bang phawng e
Zâlna lâikhun tung lungzuon siel ing e
Sielatam lungzuong mâu ing e
Ka ngâi e hunliemsate
Ka lungzuon lîu bang ching e.

13/12/2002
Style=23 tem=100
1. Tulsing lel a huiva damtâu nou aw
s d m r d t l s f m
Ka lungzuon tanglou bang phawng chie aw
l t d r d t l s m
Lungzuon zatam siel ing e
s_ f m r d t d
Ka selung nâu bang taita’ng e lawm aw
l t d r d t l s d_ m
Nang zong na selung tai aw.
s_ f m r d t d
Style=23 Voice =32
1. Zouheisa kâina gamkhu
d t d t_ d s d
Ka ngâi e Zougam
m r d t_ d
Thângdang lummei kâina gam khu
l t d r d l s m
Gâl dot ing e aw Zougam nuom
r m f m r d t d


1. Gâldot ing e guoi I vângkhuo uh
s l t d s m r t d
Nêusên pienna lâituol lênna
l t t d s m r d
Selung nâu bang in taimaw e guoi
s l t d m r d t d
2. Hingpei uo guoi aw

Lâmlâi nite

Pê bang zilkia vâi nunnopnate

Lungzuon zatam ke’n sielsiel ta’ng e

3. Guolngai îtte lah nâ bang vulta

I pienna vângkhuo tulpân kâita

Hingpei uo guoi aw

Nunlui zil vâi

Chorus: Oh! ka pienna vângkhuo
l l t d d s
Nunnop lâite
m r d r
Lâmlâi nite aw, zilnuomkia ing.
s l t d m r d t d


23/02/2003

1. Na min loupi Tung Sienmâng thangvân sâng
s s f m m r d t l s
Tung solkha-alsite toh hingphat ing.
s l t d r m r t d t
CH: Oh! Thangvân ah na minthang e
m f s l r m f s
Kou mihingte bang a nei sim a
s f m m r d t l s
Bangzatah a nei ît nei ngâi uh e?.
s l t d r m d t d t
Gêl jou si’ng e nei khotuona
m f d l r m f s
Aw Sienmâng aw tambang nei îtna
s f m m r d t l s
Na min zâng lawi bang kithang zingta hên.
s l t d r m r d t d


08/3/2003(8.30 am) by tphilip

(a) Sienmâng zuopa aw e
Simlei ah ka mêlma atam e
Mêlma te hênkolbuna ah hingpui si’n
Hingvêng zing in aw.
(b) Hingvêng zing ka suongpi leh ka kulpi aw
Nang loungâl kibuhna dîng omlou e
(a) Ka mawna tuisânglêt sângin asângjaw e
Ka khielna kân in sâng e
Ka tawnkhielna gamchin ah lawi bang thang e
Sien ei ngâidam in aw.
(b) Na ngâidam lou in hei sung sudîng ka hêi?
Na lunghêna gu hing buoh si’n aw
Na khotuona-na hoina zâl in ei hundam in
Na min phat zing vâng.
(a) Simlei ka lên sung in zuo sieng aw
Zolei tâng bang ei damsah in aw
Ka zaitha khutbân zoisa
Nâlguo bang hingkiasah in aw
Na vângletna hing patawi zing vâng.
(b) Ami asate koi e nang lou zâl a hing muong?
Azu avate koi e nang loungâl hingbêl dîng?
Mihiemte koie nang loungâl hingbêl dîng?
Na thupina leimong dong thawn hên



I ZOKAM
1. Tuon-a pipu tongdam luongnemnou,gie bang zun vai e,
Pisei-pusei tongkupna i Zokam ngai,
Zu bang mom pan seinouguolte khang i khuol sawn na un,
Gie bang zun vai I Zokam I Zokam.

Sahkia: I Zokam,Lie leh tang aw zun va ui,
Zo tongluong na ming ngai e,
Zokam aw na minthang hen,
I Zokam ngai zun va ui,zil va ui.

2. Tuon-a Pupa Nantal-Phuthil nigel tongkupna kam,
Pisei-Pusei tongkupna I Zokam ngai,
Lentonghhoi dawngkot honna tongluong Zokam ngai hibou,
Zil vai sin vai I Zokam I Zokam.

3. Tuon-a Chingkhup leh Ngambawmte’n zong,
Singzabuong hieng a lungzuon zaila a awi awi na ZOKAM ngai hie,
Thanghou leh Liendou mimtang phalsuona kam,
Zokam Zil vai sin vai I Zokam I Zokam.

4. Endi ve u’aw Seinouguol I Zokam ngai heisa kaidang bang,
tulpan kai bang,
Piengpan lunlaite i tanthei chiet nading un izaw?
Sin chiet va ui,I Zokam I Zokam.

5. Zo vontawi aw,na tongluong gie bang zun lou ding na mah?
Zokuawm damtui luongin zong Zokam ngai chie!
Tuon-a Pupa zaidei awina I Zokam ngai hie,
Zil vai sin vai I Zokam I Zokam.
6. Zolei tang bang i damsung ma bang pan vai I Zolai,
Zolawhta damtau in zong Zokam ngai chie,
I Zolai leh I I Zoham te khang i khuolna un,
Bel a zu bang puo vai izaw? I Zokam.

7. Pupa tongsuo kilawmnou i Zokam ngai hibou e!.
Lie leh tang aw ngai ve u’aw i Zokam chia,
Pupa hanzei tawina tongluong lawm Zokam nem hi e,
Chihma in zong ngil sih vai,ngil sih vai. -MK