ZOTON(Feast of Boasting)

By MK

Pasal khat in a kiphatsahna, a kisahtheina leh a hausatna kipulahna toh kizawitawn a, guolvâna abawl khu Ton kichi ahi. Tabanga guolvâna bawlpa khu Atongpa akichi hi. Atongpa in zubêl khâuvaw tampi asa(bawl) a, a bil hi. Atanu jousie in zong zu khauvaw khat chiet asa u'a tuachi'n a kiging khol chiet uhhi. Tam zute athaw(ripe) hun kuon chiengin a kisingsa phot a, zute thou tahtahta a chi chiengin siel gaw dîngte a kigingsah hi.

Ton chiengin sieltal sielnu atawmpên in sagi akigou let hi. Atongpa inn mâi leituol lâi ah Tonphuol a kisât hi. Tuanah,Tonsong dîngin sesing gil mama kâ phenphon kimêt mâm a kiphut hi. Tonmung dîngin gopum zong a kiphut a , a kûngah suongpêh lienpipi a kiphâ zêl hi. Tami tonsong zung ah tonsielte huolkhâu in a kikhî uhhi. Tonsiel kitha masangin khosung tangvalte sielkân a kidem u'a ki-apmaina tuomtuomte zong anei zêl uhhi. Tonsiel a kitha kuon chiengin atongpa tulpipa'n zu khuot a la a, a kam bêm dim zên in amuom a tua tonsiel pên a phîtlu a tulpi(teipi) in a sun a a si tandong in a sunsun uh a, pasal thahat pawlte'n tua tonsiel pen sât kichiin asât uh a, a sât nâng dildel u'a, tualeh phohtâm tê in a têh uhhi. Tuachi in tonsiel gentheitah in a sisah zêl uh hi. Tuami pên guolnopna leh thupina in a la zêl uh hi. Sasem dîngin atongpa tute a kingansie u'a, sa gil sa dîngin tanute a kise let uhhi. Minei leh mitêngtheite loungâl bawlzaw dîng guol ahisih hi. Pawi kibawl lah a thupi pên leh a sângpên ahi mai hi. Pusa Pasa tunga kipâhna leh lungkimna pulahna khat zong ahi hi. Hlâ bêm lâitah in mite atong ût sese uhhi. Azieh ahileh zânlâi a lâmkaina leh lasah limna dîng ahi hi. Ton sîm dîngin a khozângmite ahing peikhawm uh hi. Kâlkhat(hapta) vingveng zu leh sa nêhna, gulnopna amang uhhi. Lâmkîl zawl ah atongpa a lâmsah uh a a tanute'n tuhpâl a sietpieh uh, sil leh tênte leh silpieh tuomtuomte zong akipie hi. Laphuosiemte'n la a phuo khum uh a, tuachiin a sa let uh a hun nuomtahte a mangkhawm uh hi. Zân khovâh in la a sa u'a khovâ zên in lâm akâi uh hi. Ton kân a guolnopna leh pawi thupizaw a om nawn sih hi.(Extracted from ZKT 2005 Sept)