By Philip Thanglienmang DANICS, Chief Guest of ZSP Golden Jubilee on 15th October 2008.
ZSP Golden Jubilee chibai nousietna na unpi un, ka’ng buh masa uhhi.
Ei Siem Tung Sienmâng in dam leh bit a, tam ZSP Golden Jubilee muthei leh lawmthei dínga ei opsah ziehin Ama tung leh mipite tungah kipâhthu lienpi ka tut masa hi.
Tam i Golden Jubilee hunzahna ah, Zinlien a pangthei díngin ka na kinêm kha sih a, tuot zong ka na tuot kha sih hi. Jubilee Committe Chairmapu Pu Ginsuonhau in gintâtloupiin, Chief Guest hing hi in, ciin ei chiel a, tu leh tuin înghêh ka cithei pai sih a, bâkhat kingaituo tadi va’ng ci’n ka na kihou kha gêl hi. Ama’n zong a’ng ciel sawnsawn kâlkhat zouin Jubilee dâh gin ei hlât ma ahi ciin, a’ng cielna pen kipâhtahin ka na pom hi. Tuachiin, Jubilee kipâhpina la khat ka phuo a, hing simsuh va’ng.
Buolna kuomthûh Delhi tuolpan,
ZSP Golden Jubilee dâh gin in,
Selung va bang ei phawng e.
Selung va bang phawn kei aw,
ZSP Jubilee dâh ginngainou,va zou va’ng ci’n,
Tungkhâimu bang hing lêng ing.
Zou va’ng ci’n tungkhâimu bang hing lêng ing,
Tuoitêng vângkhuo pupa tongluon siemna mun ah,
Zatamte toh nga bang lâituol ka lên aw,
Nun in nuom e!, nuom bou e, cîn leh tuoi aw.
INDIA LEH KAWLGAM(MYANMAR) GAM SUNGA ZO MISING OMZA
Ei Pu Zo hlâh leh suonte gam chin ah i kithêthângta u’a, tuniin India gam ah Census 2001 kisim dungzuiin Zou mising 20,528 pha hi. Tam sungah Churachandpur District sungah mising 15,000 a om a, Sugnu biel Chandel district sungah mising 4,000-5,000 tuom a om hi. Kawlgam sungah mising simna chientah a op lou hângin Internet leh magazine tungtawn a kimukhiet dânin Myanmar(Kawlgam) sungah Zo hâm sieng a hâm mising 61,000(Zo speakers) bang a om hi, chiin a kimuthei hi. Zo hi a, ei Zohâm a hâm nawnloute misingte sim ta lei, Zo mising pen nuoi(lakh) 5 patsa’n nuoi 6 bêh ki-om dínga gintât ahi.
INDIA GAM CHANDEL DISTRICT ZOTE LAH A TAPIDAW A’NG KHANDAN TOMKIM
1939 kum tuom in, Chin Hills gamkai sunga Zo khuote; Denhla(Lennacot), Lungtah, Sielmawng, Phâitu, Khienglâm leh kho dangdangte patsa’n Tapidaw Catholic suohsa leh hisa in, Japan Gâl(WW-I) hunlaiin inn ni inn thum kizui a’ng pem zel u’a, Chandel District sunga om; Khuongtal, Zangdung leh Singtom khote ah a na pemkhie uhhi.
1939 kum in Phamsa Sie Hau Kho Kham Tungdim(Langphun khomi, Chin Hills) in Catholic Tapidaw upna(ginna) India gam sungah a na polut hi. Tua ban ah, Pu. Thang Cin Lang kici mipa khat in zong tam biehna a na thezah hi, ciin mi kimkhat in na gen ngai hi.
Tuaciin,1952 kum in Singtom khuo ah Rev.Fr.Ravalico in Mass(Latna siengthou; Topa annsieng zaluina) na neizou hi. A banban in, Phaipi munpi apatin phamsa Fr. Wollaston, veve veve at the end of the hawl is Fr. Bianchi tein Zo khote na ve zelzel uhhi. 1964 kum in Sugnu ah St.Joseph Parish ciin Rev.Fr. Joseph Mattam lamkaina nei ah a na kitungding hi. Tuana kuon in, Good Shepherd Parish, Churachandpur, St. Paul Parish Pallel, St. Thomas Parish Singngat, St. Xavier Parish, Thanlon, Tuoitengphai Catholic Centre, St. Mary Tuibuong, St. Mary’s Parish Kholien( Kana huong a) leh adangdangte a na mêngkhie uhhi.
1950 kum hun laiin, Catholic Mission fatherte’n ei Zo naupangte a hon a hon in, bawng naw, lawi naw in Don Bosco Imphal leh Dibrugarh, Assam gam tan ah a thawn in sang a na kaisah u’a, milien milal suoh uh heh, ciin Catholic Mission in ham bang na huoihuoi u’a, deici bang na tel uhhi. Himaleh, mi thasie leh huldu mite leh kinawptalte i hi zieh uh ahita diei mah?, milien milal suoh na tawm mama hi. Tu-a hun laia, Zo naupang lai simteng pi mi 5-6 beh IAS, Civil Service, Sepna lien na gieldoh a na ki-omta leh, tuniin, i Zogam in hici bangin liengvaipi sih va ci’n ka um hi.
Tuinle, ei Zo Father kai mi 3 a omta a tuate ahileh; Fr. Mark Thangkhanai, Fr. Mark Mangkhanpao leh Fr. Stanis Cin Lien Khup, sister kai mi 5 a omta hi. Eimi Father kai lah ah, Fr. Peter Tongmang Haokip, Fr. Ginkhosei Baite tegel ahi uhhi. Tutu a Archbishop of Manipur dinmun luo Rt.Rev. Dominic Lumon zong St. Joseph Parish Sugnu patsa kipankhie ahihi. Chandel district sunga Zote lah a, Tapidaw a’ng lutdan tamzaw hiphot henlen. Tu-a Pu. John Zamkhomang leh Pu. Aloysius Nehkhojang tegel bang father a na kai uh leh, pen Manipur gam sunga father senior ahilouleh Bishop nei masapen na kihi dingdan ahi a, ahinlah, Pasien lemsah lou ahimanin, mi masa ding kihi lai pen na kihi zouta lou phot ahi.
Tu’nle Churachandpur district sunga Zote a’ng khandan gen panta vai.
INDIA GAM CHURACHANDPUR DISTRICT ZOTE LAH A TAPIDAW A’NG KHANDAN TOMKIM
1950 kum bul kipat tuom in, JOUGAM THUSUO Vol.I Douta Editor: S.Semkhopao office Babulane, Imphal 1954 sungah India gam Churachandpur district Zote tancin tomkim na giel hi. Jougam kipuohdan ding leh Pasien thu hilchienna a na genna tungtang ah I Mangpa Jesu Dawimangpa’n a solsawmna thute toh a na gente hi. Ni 40 sung vingveng I Mangpa Jesu Satan in a na solsawm leh na hlemsawm thupi in a na nei hi.
Misiengthou Luke na giel tancin hoi bung 4 li tang 5 apat tang 8 gietna ah, hiciin a kigen hi, tang 5na; “Jesu Dawimangpa’n taang sangpen tungah a puitou a, Hun tomnou kal sung dingin, leitung lenggam zousie a ensah zuai hi. Dawimangpa’n, Jesu kungah hicin a gen hi,tang 6na; ‘Tam lenggam zousie sunga thuneina leh thupina chinteng keima a’ng kipieh ma bangin ka’ng pesawn ding hi, tang 7na; Keima nei bieh pou leh, tam lalna gamteng a bawn in nanga ahi’ ciin Satan in Jesu a hlemsawmta hi. Tang 8 gietna ah, Jesu’n Dawimangpa kungah, ‘Dawimangpa, tu mama in, ka sulnua zuon pai in, aziehpen na Topa na Pasien bou na be dinga tualeh ama beh na maimai nasem ding hi, ciin na kigielzou hi’ ‘Get thee behind me, Satan: for it is written. Thou shall worship the Lord thy God and Him only shall thou serve’.
‘Gam kikim khen Jouta kuolsung hi I masanglai I pute leh pate na hing kici peh ahia, a kithaphuo thu zong ahi nawn sih a, zatdang in zong kilawmloutaha, a mawh pumval thei ding zong hita lou hiel hi. A gam sunga tenga a kimot seng ziehin namdangte’n theisiemna’n a nei law uh. Jou kuol hih Pasien thu lam sanga a miel dieh nah laidan mi kim in I theisiem uh gintat a um’ ci thute Jougam-Thusuo sungah lainatna nei kawm in, na talang zou hi. Tua ban ah, kum tul zakuo samnga leh li, Phumhla ni 20 ni (20.2.1954), kum leh hla Hun a, Jou Christian Association Daijang khuo a bangzieha na kiphutdoh ahiei? ci thute tomkim in hiciin a na giel hi, ‘Lemtanna(Privilege and Chance) lamsang ah mun tampi ah melsie in a ki-om lengta mai a, tachi banga Lungsim a kigawtna(Hypocracy) pen bei bai ngai lou dan ding ahi ciengin a khamkham a kituom puoh ding ahiin mipi lemsah in Jou Christian Association kitung dingta. ciin na khumlut hi.
India gam sung a Zo Cultural Dance leh Zo puondum, Zo puonlaisan a’ng kithethangzie.
Gangpi hla 1954 kum ni 24 ni in Phaipi khopi ah Manipur Hills and Plain Festival-1954 kici khat a na opna ah, ‘The Jou Dancing Party’ kici in Jou nam lam lahna leh Ton, Sa-ai, Zogal Limlahna(Zogal Drama) masapen Pu. T. Lamzagin Chairman, Jou Cultural Organization Manipur makaina in na kineizou hi.
Sugunu leh Singtom Zo ngahnu tangvalte zong a va tel uhhi. Singtom khangnoute’n i pu i pate dute a gen ciengun ‘neitah’ na nei ei, Milong veng ah neitah va leita vai, neitah dawn vai ciin zu pen neitah ciin a minphuo let uhhi. Gungal lam Zote’n a zah ciengun nal sa in, a nui za mama kei uhhi (as told to me by Pu. L.K.Haokip I.P.S). Tua hun laia, Zo lam a a na kilam ciengin Sugunu leh Singtom, Sachih Kana huong a na kisil ngai Zo puondum leh Zo puonlaisan in a na kivon(kichei) teitei hi. Bangzieha tam thu ka’ng gen e? i ci leh tuami hun laiin, Gungal Zote’n(Lamka, Singngat, Behieng leh adangdangte’n) tu-a Simte puondum toh kisun sim puondum khat ‘Tawngnoh/tongnoh’ puon kici khat puon in a na zang let uhhi.
A theihuoi khat kia leuleu ahileh, Churachandpur district sunga hing kipankhie Zo hlattuom tuomtuomte melcina mun teng ah Sugunu, Singtom, Kana huonsung khu Gungal ciin na kikhumlut ma na’n uh leh zong, Sugnu, Singtom leh Kana huong lam Zote’n zong Lamka, Singngat, Behieng lam Zote pen Gungalte na kici veve uhhi, ci khu thei vai. Bangzieh ahiei? i ci leh Meitei gunpi in ei kimkhen zieh uh ahihi. Tua ziehin eite pen i unpi u’a, Gûngâlte i hi uhhi chi thei ahi.
INDIA GAM ZOTE LAH A POLITIGS A’NG KHANDAN TOMKIM
1954 kum Zinghla ni 23 nini’n Zo pumpi kikhaikhawna ding khuolna in Phamsa Pu. S.Semkhopao President masapen hina la in, Phamsa Pu. T. Khup Grace Chief Secretary masapen hina tu in JOU NATIONAL COUNCIL(JNC) kici pawlkhat Grimson Road Imphal ah na phutkhie uhhi.
Hun hing peitou zel in, JNC vaipote’n kum 3(thum) sung a na puoh nua un, 1956 kum Zinghla ni 4 niin Tuoitengphai khuo ah hausate, memberteng leh mi poimawteng kithukimna bangi Jou National Council pen UNITED MANIPUR JOU ORGANIZATION(UMJO) chiin a na hlengta uhhi. Vaipote pen a ngaingai ma a pangsah kia uhhi.
JOU TRIBE RECOGNITION 1956
Pu. S.Semkhopao UMJO President, Pu. T. Khup Grace tualeh leh Pu.T. Gougin UMJO Treasurer a puoh laitah un, India Kumpi a’ng sawl Tribal Commissioner for SC/ST kungah ngetna na bawl uhhi. Pu. T. Gougin in office lam nasep toh thuo in, sum leh paite dong in, 1956 kum bei lam in, JOU Tribe recognition na mudoh uhhi.
JOU TON AMASAPEN 1959 Tuoitengphai khuo ah 24/1/1959 kum in na kimang hi. Chief Guestpa(zinlienpa) Phamsa Pu. J.M Raina Chief Commissioner Manipur a na haw lou ziehin Jou buhpi in kiphinna nei in Tuoitengphai apatin Lamka tan mipi’n lungkimlouna etsahna in lamzuina na nei uhhi.
ZOU TON ANIVEINA 1960 Tuoitengphai khuo mama ah, dated 4/2/1960 kum in a na kimang hi. Tua hun in zong, phamsa Pu. J.M Raina ma zinlien dingin a na ciel uhhi. Tam hun laiin, i u nau Kawlgam a om Zote toh spelling kibang kideina in, JOU cia J laimal(spelling) na kigiel leh na kimang zel pen ZOU ciin Z laimal in a na kihlengkhie hi(as told by Rev. David K. Samte 1994 A.D, Lamka).
ZO KHOPPI (ZO TON) ATHUMVEINA : Manipur Zogam a tengte Singtom khuo ah kikhoppi 12-2-1961 kum a na kinei a, Zomi tul thum a na kikhawm hi. Sieltal tongsu khat a na kithat hi. Tuami Zo Khoppi athum veina hun sunga vaihawmte(organisers) ahileh; phamsate- Pu. Sienjahau, Pu. Vummang, Sub. Thangkhokam, Pu Nengjachin, Sub.Eljapao leh Upa Thangkhogin na hi uhhi. Lam gei cinteng ah, India Nampi diellap phileplep sa’n, Phamsa Pu. Saipu President leh Pu. T. Gougin Chief Secretary tegel pen na vaidot zou in, zana na kipiehna in Zogam Sakol tungah na kituongsah uhhi. Tua hun in United Manipur Jou Organization(UMJO) pen United Zomi Organisation(UZO) ciin lamkaite’n a na hleng uhhi. 1962-65 kum sungin UZO in kituplouna a na nei a, a sita bangin a na om hi..
ZNC LEH UZO KIKÂL THUTE: UZO GENERAL ELECTION 1970 SINGNGAT
Gangpi hla ni 28-30 1970 kum in Singngat khuo UZO Gen.Election a na om a, ni 25 Gangpi hla niin Phamsa Pu. Thangkhanlal UZO President in a na kaicing a, Pu. T. Semkholun Chief Secretary in na pang hi. Tua kum in phamsa Sub. Ginkhozam Election Commissioner in na pang hi. Tua dungzuiin President charge lahna 11/2/1970 kum in na la hi. So far so good, ci mai vai.
1972; MANIPUR STATEHOOD LEH MLA ASSEMBLY ELECTION ZIEH
28.1.1972 kum in MLA kitelna ding hun nai ziehin Daijang khuo ah UZO Special Assembly a na nei uhhi. MLA support tungtang a UZO thupuasahna zuilou a op leh kum 6 guh sunga pat nawsuo leh tanvou neithei lou ding ciin thupuasahna a na nei uhhi.
12.2.1972 UZO Executive Committee in 1972 Manipur Assembly Election hun ah Churachandpur A/C ah Pu T. Goukhenpau leh Singngat A/C ah Pu. Thangkhanlal UZO President full support dingin phuong uhhi.
Tuaciin, Pu. T. Gougin leh phamsa Pu. S.K. Samte tegel in Pu. Thangkhanlal MLA makaina a UZO kivaipuohdan duthusam sa lou un tualeh piching zou lou a sah ziehun Zogam siemphatna dingin ZNC Party ciin Daijang khuo ah 1972 kum ma in a na phut uhhi. UZO Executive Committee dated 29.2.1972 kum in hla 3 sung vingveng nawsuo in a om gel a, tualeh ZNC kikhopna va pang UZO member pouma leh member a va kiminvaw pouma te’n kizutkia uh heh ciin thupuasahna a bawl uhhi.
I mipilte leh i masate uh, Pu. T.Gougin leh phamsa Pu. S.K. Samte in MDC Election a din ut ziehun, Pu. Lunkap Chairmanshipna leh Pu. T. Semkholun CSecy na neiah, UZO Executive Committe dated 16.3.1972 kungah support a na ngen u’a, hinanleh UZO support pen Pu. T.Semkholun Tuining MDC leh Pu. S. Kamzadou Singngat MDC a na pie uhhi.
1972 kum Manipur Assembly Election kitêlna ah Chief Agent in Pu. T. Gouzadou President, ZSP na pang hi, tuaciin Phamsa Pu. Thangkhanlal pen a khatveina dingin Singngat MLA dingin a na lawching hi.
UZO General Assembly Tuoitengphai khuo ah dated 15/4/1972 kum in phamsa Pu. Semkhopao Samte leh Pu.T. Gougin tegel UZO party apat kum 6 guh sung nawsuo in a na phuong uhhi.
UZO General Assembly Tuoitengphai dated June hla ni 4-5 1976 kum in a na om kia hi. Tami kum in Zo Laisiengthou i.e Holy Bible in Zo sunga Apocripha tel ahiziehin MGP sung hitaven, Zo sung hitaven buoipina leh kikhenzahna na tung hi. Tuami buoina suveng dingin Phamsa Pu Thangkhanlal, Pu. T. Gougin leh Dr. M. Lachinkhai na guong uhhi. Ahi’nlah, amahaw buoina pen a na suveng zouta sih uhhi.
UZO pen ZNC min a hlen díngin Pu. T. Gougin in a na phut pen a na phuvang zouta sih hi. UZO Special Assembly Zomi Colony dated 11.11.1979 kum in Singngat A/C MLA ding dingin Phamsa Pu. Thangkhanlal leh Pu. Kamzadou Samte UZO party ticket na kitu gel hi. Pu Kamzadou Samte a na nualahkia hi.
UZO Executive Committee dated 22.4.1980 Zoveng Pu.T. Chinzagin inn ah Zomi Working Committe(ZWC) thusuo dated 30.4.1980 kum in a na kisuo hi. Tam thusuo na sungah Gungal lam ci vai Churachandpur Zo te ngen 30 sawmthum val a kiguol demduom hi. Chandel district Zo khat beh a tel sih hi. 1983 April hla in Kana huong na kici pen Kana Block leh Sugnu Block ciin ni in na kikhenkhie hi. Ahivangin, UZO sungah Chandel district huop sunga dingin palai a kibelap tuon sih hi.
Khuciin, 1980 apatin 1996 tan in Zo sungah Election toh kisai in buoina leh nawngkaina tampi na tung zel hi. Luoi kivei bangin MLA kai leh kailou in na kikhen zel hi.
*Tam atung a UZO leh MLA tangthu tomkim a, ka’ng lel na azieh ahileh, khangnoute’n zong i society sunga siltungte basic history thei uh heh, cia ka’ng sut ahibou hi
Gam leh nam, Pasien biehdan dingte toh kizawitawn in Phamsa i it mama uh, Pu Semkhopao Samte in JOUGAM-THUSUO tunga na gielsa ‘Jougam kipuohdan ding leh Pasien thu a na mamuna leh a na mangmuna tungtang ah I Mangpa Jesu Dawimangpa’n a solsawmna thute toh a na gente zou hi.
Tuniin, khangnoute leh sangnaupangte aw, i it uh, peimasa Pu Sempu mangmuna, a peisa hunte a UZO sunga lenggam leh lalgam(MLA/MDC) kituna zieh dan dihloutah, khankhuo dan zuilou a, Pasien deilam sui lou a, leitung pilna beh suong a, thudih zuilou a, eima Zo sunga UZO politigs hitaven, ZSP politigs hitaven, ZNC politigs hitaven leh adangdangte i na tangkoupi uh leh i na thupi ngai pen uh, tuni’n Khangnoute Sangnaupangte minpuo Golden Jubilee i lop hun sung un. Tuniin i Mangpa Jesu deilam bawl i hina uoi le? ci thute kingaisut vingveng ciet lei hoiva ci’ng e. Tam banga hun tomnou kal sung lalna leh letna deigawna ziehin tuni in ei Zo te’n i lellaw u’a, i basaplawta mama uhhi. Nang leh kei in Pasien deilam thudih thuman pom det in, I Mangpa Jesu in Dawimangpa kunga a dawnna bangin i Pasien i Topa bou be ding leh zui ding, ama maimai nasem ding ka hi, ciin i kiciem ngam uoi le?
Tuniin tahaw ziehin, i nam a pum buoizahta a, i nam min nasan uh zong bang pen heipen dih ahiei? ciin nawngkaina tuoh mi tampite a om dingin ka gingta hi.
Tuaziehin, i it uh, Phamsa Pu Semkhopao Samte na gielsa mabangin ‘Gam kikim khen Jouta kuolsung hi i masanglai I pute leh pate na hing kici peh ahia, a kithaphuo thu zong ahi nawn sih a, zatdang in zong kilawmloutah a, a mawh pumval thei ding zong hita lou hiel hi. A gam sunga tenga a kimot seng ziehin namdangte’n theisiemna’n a nei law uh. Jou kuol hih Pasien thu lam sanga a miel dieh nah laidan mi kim in I theisiem uh gintat a um’ ci thute Jougam-Thusuo sungah lainatna nei kawm in, na talang zou hi.
Malai a Israel mite’n Pasien thu a man lou zieh u’a, kithêthâng bangin, tuni’n eite zong kithêthâng dehdeh i hita uhhi. Pasien in Israelte a lungsiet , a it , a ngai man in, a zangai pâupâu hi. Zotate zong Israelte bang i hi uhhi. ‘Ka belam hon cing dingin belampu khat ka guot zouta a, hinanleh ama’n belamte a suse dinga a kigâlgih ciengin a panpi sih a, a mangsa a sui sih a, a manthâi díng uh lah donlou a, a vâhtâpte lah donlou a, a liemte a damsah sih a, a suohta sunte nasan a vâ sih hi. Tua thamlou in, belam thaupente sa a ne a, a kengcinte a tohsah siengta hi. Tam bang mite gam sungah buoina ka bawl ding hi, a ci Topa Pasien in. (Zekariah 11:16,17).
Tuniin nang leh kei in Pu Semkhopao in Zogam a na mangmunate sulnua i zuithei kia d`ing uoi le? Zo tate Pasien teltuom mite i hi uh hi, ciin ama’n na mangmu masa zou hi. Ama mangmudân ahileh, Zouta kuol sungah Pasien thu leh late kithêzâh henlen, Pasien hepina damtui bangin luong leh Zogam dam lien ding ahi ci thu pen na mangmu zou hi. Tualeh, a tahsa leh a zaitha neiteng in mipite na leh Pasien na a na sêm hi.
Tuniin i society sung en vingveng lei, Singngat A/C ah, MLA bangza vei ei Zota na kai ngai ma leh zong, Zo tate sepna kiguon, sepna nei leh officer lien mi bangza i kisiemdohta ei ? ciin suita lei pen i khutme dawn a hliethei hina lâi hi.
Tam thute ka gen ciengin Churachandpur DC office mun a A.E(Dev) ka tou lâi ka phawh mama hi. Tua hun lâiin, Zo ta LDC khatbêh zong ka na mu zou sih hi. Peon khat bep na om hileh kilawm! Kei khumi mun a, A.E va toupa zong ei Zo MLA adviser khat leh ni policy ziehin ei kitou ngimsah sih hi, tuaciin Civil Service Exam giel dínga suti ka lah sungin, ka panmun pen mi dang khat a na tusahta uhhi.
MDC kaite’n zong tuaci mabangin a Zota tankim díng lâi, pen mi dangte a na zua zêl uhhi. Tuhun ciengin, kumpi in zong nasep hong nawn lou ahimanin, MLA/MDC te’n zong koima nasep pethei nawn lou dinmun in a omta hi.
MLA leh MDC politigs i lah u’a a’ng lut apatin, ei Zo society sungah kumpi nasep mu mi bangza i om diei? tawm mama va izaw!
Tua ziehin u leh nau aw, tuniin Pasien lang zuon kia ta va ui, Mangpa hing ngaidam inlen, ka mi ka sate hing siemtha kiata in ci khu i thumna uh leh i ngetna uh hi zing hen. Sangnaupangte’n zong ZSP, UZO ngainat ma ding hina, hinanlehzong, koikoi MLA/MDC kai ma nanlehzong UZO leh ZSP in nasep, natoh leh kham ei guon ngei va ciin na kinem malmal nawnta sih un, hun peisate a silpiengte leh siltungte a kuon in, pilta vai, maw sawt nawnta sih vai, u leh naute aw.
THOU UN, THOU UN, THOU UN len, ‘SIN UN len, KUKALTAHI PANG TENTUN UN len Na Pu na Pate Tawndan Za ciet un’ ciin ka’ng hânthawn nâh mama uhhi. Tua ziehin tam Golden Jubilee i lop uh toh kizui in, i ZSP Motto uh Thou un, Thou un, Thou un, a na ci gige pen uh hleng va ui in, English-Mangkam in Learn, Persevere and Honour ci in kihlengthei leh deihuoi ka sa hi.
ZO TAWNDAN HOITE: Inndongta, Neita, Sielkhupsa, Nau-aitah, Mou tunsa, Gan hlahaw: Amasapen in, ei Zo inn suong khat in i bawl masah pen ding uh bang e, i ci leh, zaw leh be(Indongta) sui masah ding ahi. Tanupi(Tutapen) matna bawl pai ding, ei lah ah, Zaw leh be neiloupi a, tang hin inn suong mipa tampi ei lah ah, om ci ka thei ngai hi.
I Pu i pate tawndan hoi mama khat a hileh NEITA ZONNA ahi. Tam Neita na kizonzon ziehin i society na siengthou mama hi. Kilungsietna, ki-itna leh kingainatna na sang mama hi. Hindan poudan zong kitup mama hi. Tam Tawndan in i society sung stablesah, kipsah in ka mu hi. Pute Sielkhupsa tha ci bang tawndan manpha khat tu ciengin mang ding kisa ta hi.Pute kunga tute va pui a, guolzawlna ngetna; Nau-aitah tawndan hoi mama pi khat a mangta bang hita hi, Sugnu lam ah a kizuina lai sam hi. Inn lam cienga tu leh tate’n inn lam pa a pupa uh, panpi leh huna tawndan zong a mangthang ding ahita hi, zui kia dingin hoi ka sa hi. Mou tunsa(saluong 3 teitei) kitha ciengin, Zo sahou semdante a hi citcet in kizuithei kia leh hoi ka sa hi. Nu leh pa zatat ding a mai u’a, zu leh sa, zatep dummuom bawl lou ding ci bang piendan hoi ahi. Gan hla haw satha, bang kizang kia henlen, ei Tapidaw peidan toh kituohin kisiemtha leh hoi sa’ng.
ZSP KÊHLET DÎNG DÂN
ZSP sungah reformation hing polut unlen, hing siemtha kia un. Tu ma nâi a, i Jubileee masang a nang siemtha dân uh, hoi ka na sa hi. Example, mun tuomtuom a unit leh block nang phu tungtang thu ka cina ahi. Chandel district a letdân Churachandpur district cie pha phiel ahihi. Geographical distance gamlâtdân leh opdân en in, Chandel District ah local issue te ah autonomony neissah a full power tawithei díngin ZSP President Chandel District ciin dêngsah lei khantouna leh kilemna omzaw dingin ka gingta hi. Tuaci mabangin ZSP President Churachandpur District ciin kiminvaw ciet henlen kidingsah henlen, ZSP General President, Manipur/India ciin tam District Presidentte tungah kikhâikhawm leh, ci thu bang ka na ngaisutna sawt mama ta hi.
Chandel leh Churachandpur, Imphal districte a Zo/Zou mising omza dungzuiin ZSP Headquarters Executive Body ah Proportional Representation zuiin kipothei lei, i kivaihawmdân uh, pen a’ng navâh theizaw díng hi.
THUKÂLZIE
ZOCULSIN ka na phutkhiet kalsie kum 10 a cingta hi. ZOCULSIN pen 23rd Arpil 1998 kum in ka na phutkhie hi. Tami society tup leh ngimte ahileh; i ham i pau khantouna dinga ka na phu ahi. Zoham leh Zo tawndan tualeh ei singtangmite ham leh tawndan dangdangte khanlettheina dinga a na kiphut ahi. Ei kithuopi theite’n ei kithuopi unlen, laibu lui nei na op uh leh, na panpina uh ka sang dinga mansa ka hi gige hi. ZOCULSIN in tutan a, a sepdoh leh a bawldohte tam aneia bang ahi. 2006 kum in Dictionary of Zo Poetic Words, Metaphors and Similes Vol.I na sundoh hi. Tua ban ah, Ka Katekizam Masapen naupangte Bible zilna laibu, Katholik Zailate leh Mass lamzuidan, A Biography of Peter Thangkhokam leh adangdang. Zotongdam kici magazine khat zong hunkhat ka’ng suo hi.
Kum 10 cinna thupitahin, a lopna(A Decade of Existence) Delhi khopi ah na kinei hi. Tua toh kizuiin, UN International Year of Language kikop in, MP Club South Avenue, New Delhi ah Zo khangnou 60 val toh kithuo in, tuami hunzah pen thupitahin a na ki lawmzouta hi. Tua hun in Workshop on A Glossary of Zo Cultural Vocabularies ci thupi a la in workshop pen lawcingtahin na kizouta hi. Tuami hun ah, India leh America gam sung Linguistics/language lam a, mi minthang tampite’n a’ng uop uhhi. Mailam ciengin, a lem leh Zo English Hindi Dictionary, Zo lahamtengte Vol.II, English Hindi Zo, Zo into English Dictionary Projectte suhpicing theina dingin pan ka lahsawm ahi. Delhi a om sangnaupangte’n zong bangma kisitna neilouin a’ng panpi zel u’a, Delhi khopi ah hun lemtang nga sih tamaleng zong, tuni hun in amate tungah lungdamthu genna, lungdamkouna ka nei hi. Zoham khantouna leh khanletna dínga pan thei khamkham a pan ka na lah zel ahia, tam Zoham khantouna dinga ka kipiehna khu ei na thei pieh gige uh lacin kipah va’ng. Zoculsin in India leh Burma a Zoham a gawmsawm hi. Zou Literature Society Manipur toh a kikalna bangma a om sih hi.
Tu’nle, Zohâm suichienna toh kisai in JNU, New Delhi ah Ph.D Scholar in ka kikhumlûtta(admitted) hi. Tuaziehin kei pen ZSP ka suohkiata hi.
Radio Veritas Asia Zomi-Chin Service: Rev. Fr. Mark Thang Khan Ai pawnthawna leh kukalna zâlin, Zokam in Radio Program kum 10 vingveng a na bawl ziehin i kipâhpina uh etsahna in khutbêng ciet va ui.
Zomi Musical and Theatrical Society: Tuaci mabangin, Rev.Fr. Mark Thang Khan Ai leh a lawmpa Suonmeng(Lawrence) in Zomi Musical and Theatrical Society kici society khat; Tumging(Music), Culture leh Theatre lamsang khanletna díngin, a na phutdoh u’a, tuachi ma bangin Pu Elkhothang leh Pu Jamkhongam lamkaina in Zogam Leidi Party nupi papite telin 2002 kum in khat a na phutkhie u’a, tua ahimanin, ka’ng kipâhpi uhhi. Culture; Literature, Drama, Music, Customs lam i hing ngaikhawh ciengun, nam khangtou díng nam kidawdoh díng i hita uh ciin thei sawm lei deihuoi ka sa hi.
Ei Zo/Zou sung society sung pen Pape Huon gol mama khat bangin tuot in en vai in, a sungah pape ci tuomtuom, zat dangdang leh zem tuomtuom suon vai in, pousah vai in, gasuongsah vai in, mom pante, khangsawnte etton ding leh zui dingin a haici hoite zotang bang gawl va ui.
Sangnaupang lâisimte hoitah peitou díng lâiteng zong UZO leh ZSP buoipi in, MLA kâidíngpa mawngsing bang bêl in, i Zou sunga i laisiemthei díngte, MCS, IAS, IPS leh adangdang muthei díngte pen MLA beh ah kinepna nei un, a hunte uh a na zang beita uhhi. MLA kâi pen Zo sangnaupangte’n a’ng motlawpi ta u’a, a neu a lien kam bembem in UZO leh ZSP ngen gen in Zou khoteng ah a na tângtawh u’a, lâisim man lou leh nasep hawl man lou hiel in a hunte uh a na mawh subei zêl uhhi. Tua zieha, ZSPte’n kunga ka’ng vâhlâh nuom uh ahileh, tulangkalsie, MLA/MDCte nasep leh khâm ei peva ciin kinepda ta unlen, na siemsinna te u’ah, gin-omtah leh kukaltahin pan;la ciet ta un, u leh naute aw.
Atawpna ah, ZSP sangnaupangte ka’ng thu hlâh nuom leh ka’ng thumop nuom tam aneia teng ahi:
*Career guidance lam ha bawl in bawl unlen, Seminar, Workshop, Symposium cite kum khat in nivei teitei bawl sawm un.
*I Zo khocin Govt. ahisih leh Private sanginn omte puophat dingdan awareness camp bawlthei uh lacin hoi ka sa hi.
*Mipi khanletna dinga Govt.in scheme/policies bawlte del zui unlen, Development fund hoitahin nei sawm un.
* Lâisimte Census(Mising) hoitahin maintain zel un..
*Delhi ah ZSP Study forum a kibawl a, tu’nle a gâ khat leh ni muthei in a omta hi. Tuachi ma bangin tam Manipur gam sungah zong nou ZSPte’n gam tuomtuom kho tuomtuom ah, Coaching Centre te hong unlen, tuachiin i sangnaupang tampite’n a’ng noptuompi ngêi díng u’a, tualleh khat leh ni in self-employment a’ng muthei díng hi.
*Na Foreign Policy uh hoitahin set up un
*ZSP General Hqtrs President leh GS a na telte un, Zo khoteng tuonuoh thei uh leh deihuoi ka sa hi. Zo tângthu theisiem mi leh Zou mipite ngâimi ma ahi ngâi in ka thei hi.
Tam teng na hing bawl uh leh, thei khamkham a, kei zong noute kithuopi díng leh hu dínga mansa gige ka hihi. Tunia noute mai a ka’ng dinthei na ahizieh ahileh ka pil ka siem ahisih leh noute sanga ka bawlthei zieh hizaw louin ka hina officer khat DANICS ka mu zieh ahibou hi. Noute’n kei sânga nasep lienzaw leh thupizaw na muthei tham díng uhhi. Kukaltahin hing pan un.
Tunia ZSP kum 50 nga a cin kum GOLDEN JUBILEE lopna hun a, kei mi banga cing leh siem ka hilou theinasasa a, deisahtah a, Sangnaupangte kipahpi dinga Zinlien(Chief Guest) khat a nei pansahna uh toh kisai in, Jubilee Celebration Committee te tung leh UZO leh ZSP vaipote, Tuaitengphai Hausapu leh Hausateng, tuni a hing peikhawm lamkaiteng, mipiteng leh tam Jubilee lawcinna toh kisai a, gim leh tawlte na unpi un, na tung ua’h ka lungdam thu a dimlet in ka’ng sung hi. Kum 50 i cin uh toh kizawitawn in sil i bawl cieng uh leh neukhat professional/organized deu in bawl sawm va ui, ciin ka’ng vaihlah uhhi.
Thusînna dîngin, nidang lâi a, i Zola lui mama 2ni hing hil va’ng a na ngâi un, u leh naute;
1. U leh nau aw
i) U leh nau aw, bel a zu bang kipuo ciet lei,
Piengpan lunlaite tangzaw vai e.
ii) I theina uh tem bang tawi ciet lei,
Tâng a, Lângkhup la bangin dâikai kên ah, keta vâi e.
2. Zota vontawi piengpan seinouguol
i) Zota vontawi piengpan seinouguol, lungkituoh zong
Damtui bang luongkhawm lei nuom e!
ii) Tui bang luongkhawm lungkituoh, mawng bang kikawi,
Damtui a zâl limnga bang lâmkhawm lei nuom e!.
Tunia, ZSP Golden Jubilee Chief Guest a, ka’ng panna toh kisai leh Zoculsin Chairman ka hina zâlin, ZSP Golden Jubilee panpina in ka thei khamkham in tami lâituom(envelope) sunga omza pen Zoculsin min in, ei na sânpieh un chiin, ZSP Golden Jubilee Chairmanpu a la díngin tuin ka ciel hi.
Gênkhiel, tuotkhiel leh ham khiel ka nei khah tah leh zong ei Siempa leh nouteng tungah ngâidamna ka’ng ngên hi.
I Bieh i Tung Sienmâng in i bawnpi un, ei guolzawl cietta hen. Amen.
Ka lungdam e!
ZSP dam sawtta hen!
ZSP Golden Jubilee chibai nousietna na unpi un, ka’ng buh masa uhhi.
Ei Siem Tung Sienmâng in dam leh bit a, tam ZSP Golden Jubilee muthei leh lawmthei dínga ei opsah ziehin Ama tung leh mipite tungah kipâhthu lienpi ka tut masa hi.
Tam i Golden Jubilee hunzahna ah, Zinlien a pangthei díngin ka na kinêm kha sih a, tuot zong ka na tuot kha sih hi. Jubilee Committe Chairmapu Pu Ginsuonhau in gintâtloupiin, Chief Guest hing hi in, ciin ei chiel a, tu leh tuin înghêh ka cithei pai sih a, bâkhat kingaituo tadi va’ng ci’n ka na kihou kha gêl hi. Ama’n zong a’ng ciel sawnsawn kâlkhat zouin Jubilee dâh gin ei hlât ma ahi ciin, a’ng cielna pen kipâhtahin ka na pom hi. Tuachiin, Jubilee kipâhpina la khat ka phuo a, hing simsuh va’ng.
Buolna kuomthûh Delhi tuolpan,
ZSP Golden Jubilee dâh gin in,
Selung va bang ei phawng e.
Selung va bang phawn kei aw,
ZSP Jubilee dâh ginngainou,va zou va’ng ci’n,
Tungkhâimu bang hing lêng ing.
Zou va’ng ci’n tungkhâimu bang hing lêng ing,
Tuoitêng vângkhuo pupa tongluon siemna mun ah,
Zatamte toh nga bang lâituol ka lên aw,
Nun in nuom e!, nuom bou e, cîn leh tuoi aw.
INDIA LEH KAWLGAM(MYANMAR) GAM SUNGA ZO MISING OMZA
Ei Pu Zo hlâh leh suonte gam chin ah i kithêthângta u’a, tuniin India gam ah Census 2001 kisim dungzuiin Zou mising 20,528 pha hi. Tam sungah Churachandpur District sungah mising 15,000 a om a, Sugnu biel Chandel district sungah mising 4,000-5,000 tuom a om hi. Kawlgam sungah mising simna chientah a op lou hângin Internet leh magazine tungtawn a kimukhiet dânin Myanmar(Kawlgam) sungah Zo hâm sieng a hâm mising 61,000(Zo speakers) bang a om hi, chiin a kimuthei hi. Zo hi a, ei Zohâm a hâm nawnloute misingte sim ta lei, Zo mising pen nuoi(lakh) 5 patsa’n nuoi 6 bêh ki-om dínga gintât ahi.
INDIA GAM CHANDEL DISTRICT ZOTE LAH A TAPIDAW A’NG KHANDAN TOMKIM
1939 kum tuom in, Chin Hills gamkai sunga Zo khuote; Denhla(Lennacot), Lungtah, Sielmawng, Phâitu, Khienglâm leh kho dangdangte patsa’n Tapidaw Catholic suohsa leh hisa in, Japan Gâl(WW-I) hunlaiin inn ni inn thum kizui a’ng pem zel u’a, Chandel District sunga om; Khuongtal, Zangdung leh Singtom khote ah a na pemkhie uhhi.
1939 kum in Phamsa Sie Hau Kho Kham Tungdim(Langphun khomi, Chin Hills) in Catholic Tapidaw upna(ginna) India gam sungah a na polut hi. Tua ban ah, Pu. Thang Cin Lang kici mipa khat in zong tam biehna a na thezah hi, ciin mi kimkhat in na gen ngai hi.
Tuaciin,1952 kum in Singtom khuo ah Rev.Fr.Ravalico in Mass(Latna siengthou; Topa annsieng zaluina) na neizou hi. A banban in, Phaipi munpi apatin phamsa Fr. Wollaston, veve veve at the end of the hawl is Fr. Bianchi tein Zo khote na ve zelzel uhhi. 1964 kum in Sugnu ah St.Joseph Parish ciin Rev.Fr. Joseph Mattam lamkaina nei ah a na kitungding hi. Tuana kuon in, Good Shepherd Parish, Churachandpur, St. Paul Parish Pallel, St. Thomas Parish Singngat, St. Xavier Parish, Thanlon, Tuoitengphai Catholic Centre, St. Mary Tuibuong, St. Mary’s Parish Kholien( Kana huong a) leh adangdangte a na mêngkhie uhhi.
1950 kum hun laiin, Catholic Mission fatherte’n ei Zo naupangte a hon a hon in, bawng naw, lawi naw in Don Bosco Imphal leh Dibrugarh, Assam gam tan ah a thawn in sang a na kaisah u’a, milien milal suoh uh heh, ciin Catholic Mission in ham bang na huoihuoi u’a, deici bang na tel uhhi. Himaleh, mi thasie leh huldu mite leh kinawptalte i hi zieh uh ahita diei mah?, milien milal suoh na tawm mama hi. Tu-a hun laia, Zo naupang lai simteng pi mi 5-6 beh IAS, Civil Service, Sepna lien na gieldoh a na ki-omta leh, tuniin, i Zogam in hici bangin liengvaipi sih va ci’n ka um hi.
Tuinle, ei Zo Father kai mi 3 a omta a tuate ahileh; Fr. Mark Thangkhanai, Fr. Mark Mangkhanpao leh Fr. Stanis Cin Lien Khup, sister kai mi 5 a omta hi. Eimi Father kai lah ah, Fr. Peter Tongmang Haokip, Fr. Ginkhosei Baite tegel ahi uhhi. Tutu a Archbishop of Manipur dinmun luo Rt.Rev. Dominic Lumon zong St. Joseph Parish Sugnu patsa kipankhie ahihi. Chandel district sunga Zote lah a, Tapidaw a’ng lutdan tamzaw hiphot henlen. Tu-a Pu. John Zamkhomang leh Pu. Aloysius Nehkhojang tegel bang father a na kai uh leh, pen Manipur gam sunga father senior ahilouleh Bishop nei masapen na kihi dingdan ahi a, ahinlah, Pasien lemsah lou ahimanin, mi masa ding kihi lai pen na kihi zouta lou phot ahi.
Tu’nle Churachandpur district sunga Zote a’ng khandan gen panta vai.
INDIA GAM CHURACHANDPUR DISTRICT ZOTE LAH A TAPIDAW A’NG KHANDAN TOMKIM
1950 kum bul kipat tuom in, JOUGAM THUSUO Vol.I Douta Editor: S.Semkhopao office Babulane, Imphal 1954 sungah India gam Churachandpur district Zote tancin tomkim na giel hi. Jougam kipuohdan ding leh Pasien thu hilchienna a na genna tungtang ah I Mangpa Jesu Dawimangpa’n a solsawmna thute toh a na gente hi. Ni 40 sung vingveng I Mangpa Jesu Satan in a na solsawm leh na hlemsawm thupi in a na nei hi.
Misiengthou Luke na giel tancin hoi bung 4 li tang 5 apat tang 8 gietna ah, hiciin a kigen hi, tang 5na; “Jesu Dawimangpa’n taang sangpen tungah a puitou a, Hun tomnou kal sung dingin, leitung lenggam zousie a ensah zuai hi. Dawimangpa’n, Jesu kungah hicin a gen hi,tang 6na; ‘Tam lenggam zousie sunga thuneina leh thupina chinteng keima a’ng kipieh ma bangin ka’ng pesawn ding hi, tang 7na; Keima nei bieh pou leh, tam lalna gamteng a bawn in nanga ahi’ ciin Satan in Jesu a hlemsawmta hi. Tang 8 gietna ah, Jesu’n Dawimangpa kungah, ‘Dawimangpa, tu mama in, ka sulnua zuon pai in, aziehpen na Topa na Pasien bou na be dinga tualeh ama beh na maimai nasem ding hi, ciin na kigielzou hi’ ‘Get thee behind me, Satan: for it is written. Thou shall worship the Lord thy God and Him only shall thou serve’.
‘Gam kikim khen Jouta kuolsung hi I masanglai I pute leh pate na hing kici peh ahia, a kithaphuo thu zong ahi nawn sih a, zatdang in zong kilawmloutaha, a mawh pumval thei ding zong hita lou hiel hi. A gam sunga tenga a kimot seng ziehin namdangte’n theisiemna’n a nei law uh. Jou kuol hih Pasien thu lam sanga a miel dieh nah laidan mi kim in I theisiem uh gintat a um’ ci thute Jougam-Thusuo sungah lainatna nei kawm in, na talang zou hi. Tua ban ah, kum tul zakuo samnga leh li, Phumhla ni 20 ni (20.2.1954), kum leh hla Hun a, Jou Christian Association Daijang khuo a bangzieha na kiphutdoh ahiei? ci thute tomkim in hiciin a na giel hi, ‘Lemtanna(Privilege and Chance) lamsang ah mun tampi ah melsie in a ki-om lengta mai a, tachi banga Lungsim a kigawtna(Hypocracy) pen bei bai ngai lou dan ding ahi ciengin a khamkham a kituom puoh ding ahiin mipi lemsah in Jou Christian Association kitung dingta. ciin na khumlut hi.
India gam sung a Zo Cultural Dance leh Zo puondum, Zo puonlaisan a’ng kithethangzie.
Gangpi hla 1954 kum ni 24 ni in Phaipi khopi ah Manipur Hills and Plain Festival-1954 kici khat a na opna ah, ‘The Jou Dancing Party’ kici in Jou nam lam lahna leh Ton, Sa-ai, Zogal Limlahna(Zogal Drama) masapen Pu. T. Lamzagin Chairman, Jou Cultural Organization Manipur makaina in na kineizou hi.
Sugunu leh Singtom Zo ngahnu tangvalte zong a va tel uhhi. Singtom khangnoute’n i pu i pate dute a gen ciengun ‘neitah’ na nei ei, Milong veng ah neitah va leita vai, neitah dawn vai ciin zu pen neitah ciin a minphuo let uhhi. Gungal lam Zote’n a zah ciengun nal sa in, a nui za mama kei uhhi (as told to me by Pu. L.K.Haokip I.P.S). Tua hun laia, Zo lam a a na kilam ciengin Sugunu leh Singtom, Sachih Kana huong a na kisil ngai Zo puondum leh Zo puonlaisan in a na kivon(kichei) teitei hi. Bangzieha tam thu ka’ng gen e? i ci leh tuami hun laiin, Gungal Zote’n(Lamka, Singngat, Behieng leh adangdangte’n) tu-a Simte puondum toh kisun sim puondum khat ‘Tawngnoh/tongnoh’ puon kici khat puon in a na zang let uhhi.
A theihuoi khat kia leuleu ahileh, Churachandpur district sunga hing kipankhie Zo hlattuom tuomtuomte melcina mun teng ah Sugunu, Singtom, Kana huonsung khu Gungal ciin na kikhumlut ma na’n uh leh zong, Sugnu, Singtom leh Kana huong lam Zote’n zong Lamka, Singngat, Behieng lam Zote pen Gungalte na kici veve uhhi, ci khu thei vai. Bangzieh ahiei? i ci leh Meitei gunpi in ei kimkhen zieh uh ahihi. Tua ziehin eite pen i unpi u’a, Gûngâlte i hi uhhi chi thei ahi.
INDIA GAM ZOTE LAH A POLITIGS A’NG KHANDAN TOMKIM
1954 kum Zinghla ni 23 nini’n Zo pumpi kikhaikhawna ding khuolna in Phamsa Pu. S.Semkhopao President masapen hina la in, Phamsa Pu. T. Khup Grace Chief Secretary masapen hina tu in JOU NATIONAL COUNCIL(JNC) kici pawlkhat Grimson Road Imphal ah na phutkhie uhhi.
Hun hing peitou zel in, JNC vaipote’n kum 3(thum) sung a na puoh nua un, 1956 kum Zinghla ni 4 niin Tuoitengphai khuo ah hausate, memberteng leh mi poimawteng kithukimna bangi Jou National Council pen UNITED MANIPUR JOU ORGANIZATION(UMJO) chiin a na hlengta uhhi. Vaipote pen a ngaingai ma a pangsah kia uhhi.
JOU TRIBE RECOGNITION 1956
Pu. S.Semkhopao UMJO President, Pu. T. Khup Grace tualeh leh Pu.T. Gougin UMJO Treasurer a puoh laitah un, India Kumpi a’ng sawl Tribal Commissioner for SC/ST kungah ngetna na bawl uhhi. Pu. T. Gougin in office lam nasep toh thuo in, sum leh paite dong in, 1956 kum bei lam in, JOU Tribe recognition na mudoh uhhi.
JOU TON AMASAPEN 1959 Tuoitengphai khuo ah 24/1/1959 kum in na kimang hi. Chief Guestpa(zinlienpa) Phamsa Pu. J.M Raina Chief Commissioner Manipur a na haw lou ziehin Jou buhpi in kiphinna nei in Tuoitengphai apatin Lamka tan mipi’n lungkimlouna etsahna in lamzuina na nei uhhi.
ZOU TON ANIVEINA 1960 Tuoitengphai khuo mama ah, dated 4/2/1960 kum in a na kimang hi. Tua hun in zong, phamsa Pu. J.M Raina ma zinlien dingin a na ciel uhhi. Tam hun laiin, i u nau Kawlgam a om Zote toh spelling kibang kideina in, JOU cia J laimal(spelling) na kigiel leh na kimang zel pen ZOU ciin Z laimal in a na kihlengkhie hi(as told by Rev. David K. Samte 1994 A.D, Lamka).
ZO KHOPPI (ZO TON) ATHUMVEINA : Manipur Zogam a tengte Singtom khuo ah kikhoppi 12-2-1961 kum a na kinei a, Zomi tul thum a na kikhawm hi. Sieltal tongsu khat a na kithat hi. Tuami Zo Khoppi athum veina hun sunga vaihawmte(organisers) ahileh; phamsate- Pu. Sienjahau, Pu. Vummang, Sub. Thangkhokam, Pu Nengjachin, Sub.Eljapao leh Upa Thangkhogin na hi uhhi. Lam gei cinteng ah, India Nampi diellap phileplep sa’n, Phamsa Pu. Saipu President leh Pu. T. Gougin Chief Secretary tegel pen na vaidot zou in, zana na kipiehna in Zogam Sakol tungah na kituongsah uhhi. Tua hun in United Manipur Jou Organization(UMJO) pen United Zomi Organisation(UZO) ciin lamkaite’n a na hleng uhhi. 1962-65 kum sungin UZO in kituplouna a na nei a, a sita bangin a na om hi..
ZNC LEH UZO KIKÂL THUTE: UZO GENERAL ELECTION 1970 SINGNGAT
Gangpi hla ni 28-30 1970 kum in Singngat khuo UZO Gen.Election a na om a, ni 25 Gangpi hla niin Phamsa Pu. Thangkhanlal UZO President in a na kaicing a, Pu. T. Semkholun Chief Secretary in na pang hi. Tua kum in phamsa Sub. Ginkhozam Election Commissioner in na pang hi. Tua dungzuiin President charge lahna 11/2/1970 kum in na la hi. So far so good, ci mai vai.
1972; MANIPUR STATEHOOD LEH MLA ASSEMBLY ELECTION ZIEH
28.1.1972 kum in MLA kitelna ding hun nai ziehin Daijang khuo ah UZO Special Assembly a na nei uhhi. MLA support tungtang a UZO thupuasahna zuilou a op leh kum 6 guh sunga pat nawsuo leh tanvou neithei lou ding ciin thupuasahna a na nei uhhi.
12.2.1972 UZO Executive Committee in 1972 Manipur Assembly Election hun ah Churachandpur A/C ah Pu T. Goukhenpau leh Singngat A/C ah Pu. Thangkhanlal UZO President full support dingin phuong uhhi.
Tuaciin, Pu. T. Gougin leh phamsa Pu. S.K. Samte tegel in Pu. Thangkhanlal MLA makaina a UZO kivaipuohdan duthusam sa lou un tualeh piching zou lou a sah ziehun Zogam siemphatna dingin ZNC Party ciin Daijang khuo ah 1972 kum ma in a na phut uhhi. UZO Executive Committee dated 29.2.1972 kum in hla 3 sung vingveng nawsuo in a om gel a, tualeh ZNC kikhopna va pang UZO member pouma leh member a va kiminvaw pouma te’n kizutkia uh heh ciin thupuasahna a bawl uhhi.
I mipilte leh i masate uh, Pu. T.Gougin leh phamsa Pu. S.K. Samte in MDC Election a din ut ziehun, Pu. Lunkap Chairmanshipna leh Pu. T. Semkholun CSecy na neiah, UZO Executive Committe dated 16.3.1972 kungah support a na ngen u’a, hinanleh UZO support pen Pu. T.Semkholun Tuining MDC leh Pu. S. Kamzadou Singngat MDC a na pie uhhi.
1972 kum Manipur Assembly Election kitêlna ah Chief Agent in Pu. T. Gouzadou President, ZSP na pang hi, tuaciin Phamsa Pu. Thangkhanlal pen a khatveina dingin Singngat MLA dingin a na lawching hi.
UZO General Assembly Tuoitengphai khuo ah dated 15/4/1972 kum in phamsa Pu. Semkhopao Samte leh Pu.T. Gougin tegel UZO party apat kum 6 guh sung nawsuo in a na phuong uhhi.
UZO General Assembly Tuoitengphai dated June hla ni 4-5 1976 kum in a na om kia hi. Tami kum in Zo Laisiengthou i.e Holy Bible in Zo sunga Apocripha tel ahiziehin MGP sung hitaven, Zo sung hitaven buoipina leh kikhenzahna na tung hi. Tuami buoina suveng dingin Phamsa Pu Thangkhanlal, Pu. T. Gougin leh Dr. M. Lachinkhai na guong uhhi. Ahi’nlah, amahaw buoina pen a na suveng zouta sih uhhi.
UZO pen ZNC min a hlen díngin Pu. T. Gougin in a na phut pen a na phuvang zouta sih hi. UZO Special Assembly Zomi Colony dated 11.11.1979 kum in Singngat A/C MLA ding dingin Phamsa Pu. Thangkhanlal leh Pu. Kamzadou Samte UZO party ticket na kitu gel hi. Pu Kamzadou Samte a na nualahkia hi.
UZO Executive Committee dated 22.4.1980 Zoveng Pu.T. Chinzagin inn ah Zomi Working Committe(ZWC) thusuo dated 30.4.1980 kum in a na kisuo hi. Tam thusuo na sungah Gungal lam ci vai Churachandpur Zo te ngen 30 sawmthum val a kiguol demduom hi. Chandel district Zo khat beh a tel sih hi. 1983 April hla in Kana huong na kici pen Kana Block leh Sugnu Block ciin ni in na kikhenkhie hi. Ahivangin, UZO sungah Chandel district huop sunga dingin palai a kibelap tuon sih hi.
Khuciin, 1980 apatin 1996 tan in Zo sungah Election toh kisai in buoina leh nawngkaina tampi na tung zel hi. Luoi kivei bangin MLA kai leh kailou in na kikhen zel hi.
*Tam atung a UZO leh MLA tangthu tomkim a, ka’ng lel na azieh ahileh, khangnoute’n zong i society sunga siltungte basic history thei uh heh, cia ka’ng sut ahibou hi
Gam leh nam, Pasien biehdan dingte toh kizawitawn in Phamsa i it mama uh, Pu Semkhopao Samte in JOUGAM-THUSUO tunga na gielsa ‘Jougam kipuohdan ding leh Pasien thu a na mamuna leh a na mangmuna tungtang ah I Mangpa Jesu Dawimangpa’n a solsawmna thute toh a na gente zou hi.
Tuniin, khangnoute leh sangnaupangte aw, i it uh, peimasa Pu Sempu mangmuna, a peisa hunte a UZO sunga lenggam leh lalgam(MLA/MDC) kituna zieh dan dihloutah, khankhuo dan zuilou a, Pasien deilam sui lou a, leitung pilna beh suong a, thudih zuilou a, eima Zo sunga UZO politigs hitaven, ZSP politigs hitaven, ZNC politigs hitaven leh adangdangte i na tangkoupi uh leh i na thupi ngai pen uh, tuni’n Khangnoute Sangnaupangte minpuo Golden Jubilee i lop hun sung un. Tuniin i Mangpa Jesu deilam bawl i hina uoi le? ci thute kingaisut vingveng ciet lei hoiva ci’ng e. Tam banga hun tomnou kal sung lalna leh letna deigawna ziehin tuni in ei Zo te’n i lellaw u’a, i basaplawta mama uhhi. Nang leh kei in Pasien deilam thudih thuman pom det in, I Mangpa Jesu in Dawimangpa kunga a dawnna bangin i Pasien i Topa bou be ding leh zui ding, ama maimai nasem ding ka hi, ciin i kiciem ngam uoi le?
Tuniin tahaw ziehin, i nam a pum buoizahta a, i nam min nasan uh zong bang pen heipen dih ahiei? ciin nawngkaina tuoh mi tampite a om dingin ka gingta hi.
Tuaziehin, i it uh, Phamsa Pu Semkhopao Samte na gielsa mabangin ‘Gam kikim khen Jouta kuolsung hi i masanglai I pute leh pate na hing kici peh ahia, a kithaphuo thu zong ahi nawn sih a, zatdang in zong kilawmloutah a, a mawh pumval thei ding zong hita lou hiel hi. A gam sunga tenga a kimot seng ziehin namdangte’n theisiemna’n a nei law uh. Jou kuol hih Pasien thu lam sanga a miel dieh nah laidan mi kim in I theisiem uh gintat a um’ ci thute Jougam-Thusuo sungah lainatna nei kawm in, na talang zou hi.
Malai a Israel mite’n Pasien thu a man lou zieh u’a, kithêthâng bangin, tuni’n eite zong kithêthâng dehdeh i hita uhhi. Pasien in Israelte a lungsiet , a it , a ngai man in, a zangai pâupâu hi. Zotate zong Israelte bang i hi uhhi. ‘Ka belam hon cing dingin belampu khat ka guot zouta a, hinanleh ama’n belamte a suse dinga a kigâlgih ciengin a panpi sih a, a mangsa a sui sih a, a manthâi díng uh lah donlou a, a vâhtâpte lah donlou a, a liemte a damsah sih a, a suohta sunte nasan a vâ sih hi. Tua thamlou in, belam thaupente sa a ne a, a kengcinte a tohsah siengta hi. Tam bang mite gam sungah buoina ka bawl ding hi, a ci Topa Pasien in. (Zekariah 11:16,17).
Tuniin nang leh kei in Pu Semkhopao in Zogam a na mangmunate sulnua i zuithei kia d`ing uoi le? Zo tate Pasien teltuom mite i hi uh hi, ciin ama’n na mangmu masa zou hi. Ama mangmudân ahileh, Zouta kuol sungah Pasien thu leh late kithêzâh henlen, Pasien hepina damtui bangin luong leh Zogam dam lien ding ahi ci thu pen na mangmu zou hi. Tualeh, a tahsa leh a zaitha neiteng in mipite na leh Pasien na a na sêm hi.
Tuniin i society sung en vingveng lei, Singngat A/C ah, MLA bangza vei ei Zota na kai ngai ma leh zong, Zo tate sepna kiguon, sepna nei leh officer lien mi bangza i kisiemdohta ei ? ciin suita lei pen i khutme dawn a hliethei hina lâi hi.
Tam thute ka gen ciengin Churachandpur DC office mun a A.E(Dev) ka tou lâi ka phawh mama hi. Tua hun lâiin, Zo ta LDC khatbêh zong ka na mu zou sih hi. Peon khat bep na om hileh kilawm! Kei khumi mun a, A.E va toupa zong ei Zo MLA adviser khat leh ni policy ziehin ei kitou ngimsah sih hi, tuaciin Civil Service Exam giel dínga suti ka lah sungin, ka panmun pen mi dang khat a na tusahta uhhi.
MDC kaite’n zong tuaci mabangin a Zota tankim díng lâi, pen mi dangte a na zua zêl uhhi. Tuhun ciengin, kumpi in zong nasep hong nawn lou ahimanin, MLA/MDC te’n zong koima nasep pethei nawn lou dinmun in a omta hi.
MLA leh MDC politigs i lah u’a a’ng lut apatin, ei Zo society sungah kumpi nasep mu mi bangza i om diei? tawm mama va izaw!
Tua ziehin u leh nau aw, tuniin Pasien lang zuon kia ta va ui, Mangpa hing ngaidam inlen, ka mi ka sate hing siemtha kiata in ci khu i thumna uh leh i ngetna uh hi zing hen. Sangnaupangte’n zong ZSP, UZO ngainat ma ding hina, hinanlehzong, koikoi MLA/MDC kai ma nanlehzong UZO leh ZSP in nasep, natoh leh kham ei guon ngei va ciin na kinem malmal nawnta sih un, hun peisate a silpiengte leh siltungte a kuon in, pilta vai, maw sawt nawnta sih vai, u leh naute aw.
THOU UN, THOU UN, THOU UN len, ‘SIN UN len, KUKALTAHI PANG TENTUN UN len Na Pu na Pate Tawndan Za ciet un’ ciin ka’ng hânthawn nâh mama uhhi. Tua ziehin tam Golden Jubilee i lop uh toh kizui in, i ZSP Motto uh Thou un, Thou un, Thou un, a na ci gige pen uh hleng va ui in, English-Mangkam in Learn, Persevere and Honour ci in kihlengthei leh deihuoi ka sa hi.
ZO TAWNDAN HOITE: Inndongta, Neita, Sielkhupsa, Nau-aitah, Mou tunsa, Gan hlahaw: Amasapen in, ei Zo inn suong khat in i bawl masah pen ding uh bang e, i ci leh, zaw leh be(Indongta) sui masah ding ahi. Tanupi(Tutapen) matna bawl pai ding, ei lah ah, Zaw leh be neiloupi a, tang hin inn suong mipa tampi ei lah ah, om ci ka thei ngai hi.
I Pu i pate tawndan hoi mama khat a hileh NEITA ZONNA ahi. Tam Neita na kizonzon ziehin i society na siengthou mama hi. Kilungsietna, ki-itna leh kingainatna na sang mama hi. Hindan poudan zong kitup mama hi. Tam Tawndan in i society sung stablesah, kipsah in ka mu hi. Pute Sielkhupsa tha ci bang tawndan manpha khat tu ciengin mang ding kisa ta hi.Pute kunga tute va pui a, guolzawlna ngetna; Nau-aitah tawndan hoi mama pi khat a mangta bang hita hi, Sugnu lam ah a kizuina lai sam hi. Inn lam cienga tu leh tate’n inn lam pa a pupa uh, panpi leh huna tawndan zong a mangthang ding ahita hi, zui kia dingin hoi ka sa hi. Mou tunsa(saluong 3 teitei) kitha ciengin, Zo sahou semdante a hi citcet in kizuithei kia leh hoi ka sa hi. Nu leh pa zatat ding a mai u’a, zu leh sa, zatep dummuom bawl lou ding ci bang piendan hoi ahi. Gan hla haw satha, bang kizang kia henlen, ei Tapidaw peidan toh kituohin kisiemtha leh hoi sa’ng.
ZSP KÊHLET DÎNG DÂN
ZSP sungah reformation hing polut unlen, hing siemtha kia un. Tu ma nâi a, i Jubileee masang a nang siemtha dân uh, hoi ka na sa hi. Example, mun tuomtuom a unit leh block nang phu tungtang thu ka cina ahi. Chandel district a letdân Churachandpur district cie pha phiel ahihi. Geographical distance gamlâtdân leh opdân en in, Chandel District ah local issue te ah autonomony neissah a full power tawithei díngin ZSP President Chandel District ciin dêngsah lei khantouna leh kilemna omzaw dingin ka gingta hi. Tuaci mabangin ZSP President Churachandpur District ciin kiminvaw ciet henlen kidingsah henlen, ZSP General President, Manipur/India ciin tam District Presidentte tungah kikhâikhawm leh, ci thu bang ka na ngaisutna sawt mama ta hi.
Chandel leh Churachandpur, Imphal districte a Zo/Zou mising omza dungzuiin ZSP Headquarters Executive Body ah Proportional Representation zuiin kipothei lei, i kivaihawmdân uh, pen a’ng navâh theizaw díng hi.
THUKÂLZIE
ZOCULSIN ka na phutkhiet kalsie kum 10 a cingta hi. ZOCULSIN pen 23rd Arpil 1998 kum in ka na phutkhie hi. Tami society tup leh ngimte ahileh; i ham i pau khantouna dinga ka na phu ahi. Zoham leh Zo tawndan tualeh ei singtangmite ham leh tawndan dangdangte khanlettheina dinga a na kiphut ahi. Ei kithuopi theite’n ei kithuopi unlen, laibu lui nei na op uh leh, na panpina uh ka sang dinga mansa ka hi gige hi. ZOCULSIN in tutan a, a sepdoh leh a bawldohte tam aneia bang ahi. 2006 kum in Dictionary of Zo Poetic Words, Metaphors and Similes Vol.I na sundoh hi. Tua ban ah, Ka Katekizam Masapen naupangte Bible zilna laibu, Katholik Zailate leh Mass lamzuidan, A Biography of Peter Thangkhokam leh adangdang. Zotongdam kici magazine khat zong hunkhat ka’ng suo hi.
Kum 10 cinna thupitahin, a lopna(A Decade of Existence) Delhi khopi ah na kinei hi. Tua toh kizuiin, UN International Year of Language kikop in, MP Club South Avenue, New Delhi ah Zo khangnou 60 val toh kithuo in, tuami hunzah pen thupitahin a na ki lawmzouta hi. Tua hun in Workshop on A Glossary of Zo Cultural Vocabularies ci thupi a la in workshop pen lawcingtahin na kizouta hi. Tuami hun ah, India leh America gam sung Linguistics/language lam a, mi minthang tampite’n a’ng uop uhhi. Mailam ciengin, a lem leh Zo English Hindi Dictionary, Zo lahamtengte Vol.II, English Hindi Zo, Zo into English Dictionary Projectte suhpicing theina dingin pan ka lahsawm ahi. Delhi a om sangnaupangte’n zong bangma kisitna neilouin a’ng panpi zel u’a, Delhi khopi ah hun lemtang nga sih tamaleng zong, tuni hun in amate tungah lungdamthu genna, lungdamkouna ka nei hi. Zoham khantouna leh khanletna dínga pan thei khamkham a pan ka na lah zel ahia, tam Zoham khantouna dinga ka kipiehna khu ei na thei pieh gige uh lacin kipah va’ng. Zoculsin in India leh Burma a Zoham a gawmsawm hi. Zou Literature Society Manipur toh a kikalna bangma a om sih hi.
Tu’nle, Zohâm suichienna toh kisai in JNU, New Delhi ah Ph.D Scholar in ka kikhumlûtta(admitted) hi. Tuaziehin kei pen ZSP ka suohkiata hi.
Radio Veritas Asia Zomi-Chin Service: Rev. Fr. Mark Thang Khan Ai pawnthawna leh kukalna zâlin, Zokam in Radio Program kum 10 vingveng a na bawl ziehin i kipâhpina uh etsahna in khutbêng ciet va ui.
Zomi Musical and Theatrical Society: Tuaci mabangin, Rev.Fr. Mark Thang Khan Ai leh a lawmpa Suonmeng(Lawrence) in Zomi Musical and Theatrical Society kici society khat; Tumging(Music), Culture leh Theatre lamsang khanletna díngin, a na phutdoh u’a, tuachi ma bangin Pu Elkhothang leh Pu Jamkhongam lamkaina in Zogam Leidi Party nupi papite telin 2002 kum in khat a na phutkhie u’a, tua ahimanin, ka’ng kipâhpi uhhi. Culture; Literature, Drama, Music, Customs lam i hing ngaikhawh ciengun, nam khangtou díng nam kidawdoh díng i hita uh ciin thei sawm lei deihuoi ka sa hi.
Ei Zo/Zou sung society sung pen Pape Huon gol mama khat bangin tuot in en vai in, a sungah pape ci tuomtuom, zat dangdang leh zem tuomtuom suon vai in, pousah vai in, gasuongsah vai in, mom pante, khangsawnte etton ding leh zui dingin a haici hoite zotang bang gawl va ui.
Sangnaupang lâisimte hoitah peitou díng lâiteng zong UZO leh ZSP buoipi in, MLA kâidíngpa mawngsing bang bêl in, i Zou sunga i laisiemthei díngte, MCS, IAS, IPS leh adangdang muthei díngte pen MLA beh ah kinepna nei un, a hunte uh a na zang beita uhhi. MLA kâi pen Zo sangnaupangte’n a’ng motlawpi ta u’a, a neu a lien kam bembem in UZO leh ZSP ngen gen in Zou khoteng ah a na tângtawh u’a, lâisim man lou leh nasep hawl man lou hiel in a hunte uh a na mawh subei zêl uhhi. Tua zieha, ZSPte’n kunga ka’ng vâhlâh nuom uh ahileh, tulangkalsie, MLA/MDCte nasep leh khâm ei peva ciin kinepda ta unlen, na siemsinna te u’ah, gin-omtah leh kukaltahin pan;la ciet ta un, u leh naute aw.
Atawpna ah, ZSP sangnaupangte ka’ng thu hlâh nuom leh ka’ng thumop nuom tam aneia teng ahi:
*Career guidance lam ha bawl in bawl unlen, Seminar, Workshop, Symposium cite kum khat in nivei teitei bawl sawm un.
*I Zo khocin Govt. ahisih leh Private sanginn omte puophat dingdan awareness camp bawlthei uh lacin hoi ka sa hi.
*Mipi khanletna dinga Govt.in scheme/policies bawlte del zui unlen, Development fund hoitahin nei sawm un.
* Lâisimte Census(Mising) hoitahin maintain zel un..
*Delhi ah ZSP Study forum a kibawl a, tu’nle a gâ khat leh ni muthei in a omta hi. Tuachi ma bangin tam Manipur gam sungah zong nou ZSPte’n gam tuomtuom kho tuomtuom ah, Coaching Centre te hong unlen, tuachiin i sangnaupang tampite’n a’ng noptuompi ngêi díng u’a, tualleh khat leh ni in self-employment a’ng muthei díng hi.
*Na Foreign Policy uh hoitahin set up un
*ZSP General Hqtrs President leh GS a na telte un, Zo khoteng tuonuoh thei uh leh deihuoi ka sa hi. Zo tângthu theisiem mi leh Zou mipite ngâimi ma ahi ngâi in ka thei hi.
Tam teng na hing bawl uh leh, thei khamkham a, kei zong noute kithuopi díng leh hu dínga mansa gige ka hihi. Tunia noute mai a ka’ng dinthei na ahizieh ahileh ka pil ka siem ahisih leh noute sanga ka bawlthei zieh hizaw louin ka hina officer khat DANICS ka mu zieh ahibou hi. Noute’n kei sânga nasep lienzaw leh thupizaw na muthei tham díng uhhi. Kukaltahin hing pan un.
Tunia ZSP kum 50 nga a cin kum GOLDEN JUBILEE lopna hun a, kei mi banga cing leh siem ka hilou theinasasa a, deisahtah a, Sangnaupangte kipahpi dinga Zinlien(Chief Guest) khat a nei pansahna uh toh kisai in, Jubilee Celebration Committee te tung leh UZO leh ZSP vaipote, Tuaitengphai Hausapu leh Hausateng, tuni a hing peikhawm lamkaiteng, mipiteng leh tam Jubilee lawcinna toh kisai a, gim leh tawlte na unpi un, na tung ua’h ka lungdam thu a dimlet in ka’ng sung hi. Kum 50 i cin uh toh kizawitawn in sil i bawl cieng uh leh neukhat professional/organized deu in bawl sawm va ui, ciin ka’ng vaihlah uhhi.
Thusînna dîngin, nidang lâi a, i Zola lui mama 2ni hing hil va’ng a na ngâi un, u leh naute;
1. U leh nau aw
i) U leh nau aw, bel a zu bang kipuo ciet lei,
Piengpan lunlaite tangzaw vai e.
ii) I theina uh tem bang tawi ciet lei,
Tâng a, Lângkhup la bangin dâikai kên ah, keta vâi e.
2. Zota vontawi piengpan seinouguol
i) Zota vontawi piengpan seinouguol, lungkituoh zong
Damtui bang luongkhawm lei nuom e!
ii) Tui bang luongkhawm lungkituoh, mawng bang kikawi,
Damtui a zâl limnga bang lâmkhawm lei nuom e!.
Tunia, ZSP Golden Jubilee Chief Guest a, ka’ng panna toh kisai leh Zoculsin Chairman ka hina zâlin, ZSP Golden Jubilee panpina in ka thei khamkham in tami lâituom(envelope) sunga omza pen Zoculsin min in, ei na sânpieh un chiin, ZSP Golden Jubilee Chairmanpu a la díngin tuin ka ciel hi.
Gênkhiel, tuotkhiel leh ham khiel ka nei khah tah leh zong ei Siempa leh nouteng tungah ngâidamna ka’ng ngên hi.
I Bieh i Tung Sienmâng in i bawnpi un, ei guolzawl cietta hen. Amen.
Ka lungdam e!
ZSP dam sawtta hen!
No comments:
Post a Comment