Tuesday, April 29, 2008

INDIA GAM LEH TUIKUOLGAMTE KA ZINNA 1997

1994 kum in UPSC Exam ka gieldoh a, Delhi Andaman and Nicobar Isalnds Civil Service nga hi. Delhi Khopi ah kum khat sung vingveng training zilna ka bawlzou un India gamsung enkhe dîng in India kumpi in a thawn ahing sawl uhhi.
Ka lawm leh guolte pên Daman ana tungzouta uh hi.
Kei ka hileh inn lang a tomnou khat suti pei ka hi ziehin nimit 1 Gângpi hla 1997 kum in Phâipi vânlêng phuol apatin nai 4 li vêl in Kolkatta ka zuon hi, anitâh nai6.30 tuom in ka tung hi. Kolkatta apat in Mumbai zuon dîng in Airbus 300 vânlêng zân nai 10.30 in ka man a, zîngmawng nai 1.30 in Mumbai ka tungta hi.Mumbai apat in Daman zuon in meilêng nai 2.00 tuom in ka man a zîngmawng nai 9.30 in Daman ka tungta hi.
Daman khopi pên Arabian tuipi gei noukhat a om ahi. Munzâng ahi. Amite ahileh,Portuguese hlâh leh suonte ahi uh hi. Gujarati hâm bang khat a zang uh hi. Nêh leh tâh suina lam ah gên dîng hilei mite pên ngamat(fishing) leh khawlsilsiemna lam sm u’a khosa ahi uhhi. Sahkhuo lam ah Hindu,Christian leh Muslim om uh hi. Tuate lah ah Hindute tampen a ban ah Catholicte a tampên uh hi.
Nimit 14 Jan 97 ni in Daman a Zu kibawlna munte ah ka va kawikawita uh hi. Zu siemna munte a thupi mama hi. Plastic bawlna munte zong ka vê uh hi.
Nimit 15 Jan 97 nitâh lam in Daman a vâihawmpa Pu.S.P. Aggarwal in tuipi gei ah ann nêhkhawmna khat abawl a, tua mun ah chiel ka hina dungjui un ka jou uh hi.Tuipi pang ah tumphuol ka taw uh a nêh leh dawntheite tuitui tampi ka nê u’a a nop mama hi.

Nimit 17 Jan 97 ni in Daman apat in taxi ka la uh a Vapi ka zuon uhhi. Vapi khopi ah, meilêng ka man u’a, Mumbai nitâh lam in ka tung uh hi. Anitâh main Mumbai tuipi gei lah ah ka va vâh kawikawi uh hi. Tuipi gei minthang; Juhu Beach ah ka va haw a,sakol lêng ah ka va tou hi. Cinema a hing kilang mun -Marine Drive kichi mun ah ka vâh kuol kawikawi uh hi. Limlah siem minthang Govinda in la a asah zêl “bhêlpuri” ka va neta uh hi. Huisi lâng in chidam ludam a kâi kêi mama hi. Tam mun ah nikhat ka tâm uh hi.

GATEWAY OF INDIA LEH ELEPHANTA CAVE KA HAWNA:
Azîngni in Gateway of India ka en uh a lim ka kikâp hi. Tuamun panin, MotorBoat(mawtawkuong) ka man uh a Elephanta Cave(Sâipi Suongkul sung)en dîngin ka pei uh hi. Minit 45 zou tuom in a mun ka tungta uh hi.

Elephanta Cave ka tun tah un, tuipi lâikim lâi khat a muol kidaw khat ahi hi. Tua muol kîmvêl lah ah singkungte apou a, gamlah zong chithei phiel ahi. Ka kaltoutou uh a, avûm ka tun un, tua suonghawmte ka muta uh hi.Agei a, singbâte lah ah zawngte akidel lele kawi uh hi.Atam mama uh hi.Kolte gindân in pên tua zawngte khu Hanuman hâh-leh- suonte hidân a, agintât uh, ahizieh un, chanatang pou leh nêhthei tuomtuomte apie uh a, amaute pên agilkiel ngaisih uh hi. Tuamun a suonghawm omte pên a golthei mama uh hi.Asung ka va vêl chiengleh, khanglui lâi a Kol( Hindu) pasiente suonglim(statue) ngen in adim hi.Tuana Kol pasien kithupi bawl pên ahileh, SHIVA ahi.SHIVA suonglim khu inn sawng(dan) khat sâng in asângzaw dîng hi.Hui leh guo in sêt zing hivân in,tua suonglimte pên abal,amâi leh akêhkhê atamta mama hi.Limte ka kila a, amun a canteen khat ah sûn ann ka hing nê uh a, ka hing kumsuhta uh hi.
Motorboat ma in ka hing tuong uh a Mumbai ka tungta uh hi. Nitâh lam in, Juhu Beach; Marine Drive ah ka vâh zêl uh a, tuipi gei a suongtum kichiengte lah ah ka va vumkhawl zêl uh hi. Nitum kuon chite ka en let uh a lunglên ahuoi mama hi. Tuipi kinawng zêl athawmgin gin in i dîb a kosah hi. Huisi hing lâng in damna hui hing poleh kilawm mawh hi. A kingâizawngte bang tuipi gei suongtumte tung ah tou un a kikawi ngêtngût uh hi. Khumte ka mu chiengin cinema en ma ka bang hi. Zân hita in, thangvân zawl ah tung solhla hing vâh a, tuipi kinîl tungah a hla vâh a pheliplep a, Mumbai khopi salvâh hi.

Cochin ka zotna uh
Nimit 18 Jan 97 ni zân in Mumbai apat in Konkan Express meilêng ah ka tuong uh a, nimit 19 zîngmawng lam in Ernakulam(Kerala) meilêngsai ka tungta uh hi. Ernakulam apat in Cochin zuon in taxi ah ka pei uh hi. Cochin ah Lakshadweep House ah ka tung uh hi. Nimit 20Jan97 ni in Cochin khopi enkhe dîng in ka kipandoh
uh hi. Amasa pên in nidanglâi a Portuguese mikângte ana lam kulpite en dîngin motorboat ka sâp u’a tuikuolgam khat ah ka tungta uh hi.Kupi lui tampi ka etzou un kahing kilekiata uh hi. Cochin têmbawpi khawlmun(Cochin Harbour)ka va en u’a tuana apat in Cochin tuipi gei lah ah ka vâh kawikawi uh hi.

Tua mun a etnuomhuoi pên ahileh nidanglâi a Chinesete ngamatna lên(Chinese Fishing Net)liente ahi. Tam Chinese Fishing Net te pên tu a meitei nupite domlên toh kisûn ahi.
A kikhietna ahileh alet anêuna zieh ahi. Chinese domlênte pên lien mama uh hi.A kidoptou chieng in ahêhna(gear) khat a kihia chiengin a domlên lien khu ahing kidomkângtou thei pan ahi. Mite et maimai dîng a kikoi ahita hi.

St.Mary’s Cathedral, leh St.George’s Church
Khumzou in, ka pei pei u’a, bieh-innpi lui mamate; St.Mary’s Cathedral, leh St.George’s Church sung ah thumna ka va neita hi.Tuajou in,bieh-innpi khat sung a Vasco-Da-Gama kivuina hân ka va enkhekiata uh hi.

Cochin Jew Synagogue ka hawna uh
Ka guolte ni toh(Rajsekhar leh RP Meena)Cochin Jewte Synagogue sung ah thungetna ka va neita uh hi.
Lakshadweep ka zotna uh
Nimit 21 Jan 97 ni in Cochin nuasie in Lakshdweep zuon in nai 5 tuom in,Tipu Sultan têmbawpi ah ka tuongta uh hi. Têmbawpi ka tuonchîlna ahizieh in ka kithalawp mama hi.

Minicoy tuikuolgam ka tunna uh
Nimit 22 Jan hla zîngmawng nai 9 kuo lahtuom in Minicoy tuikuolgam ka tungta uh hi. Minicoy tuipi gei la thûhlou ahizieh in tua ka tuonna uh têmbawpi pên tuipi li lâi ah
A kihlou(anchor) a,kuong nêute in Minicoy tuipi gei ka gâlkâi uh hi. Khumna apat in Minicoy Lighthouse ka va en u’a, atung sâng ah ka kâitou uhhi. Atung sâng apat a ka khodâh chiengun, hui lân a sua mama a a zâuhuoi mama hi. Ka bildawnte nata bangin a kilîng dihdih a, ka samte a lêngtou vungvung a, a kitung, a kiphênkalâu va-iah hi. Ka khodâh suh leh ka mit a lâm dingdeng va ket hi. Ka phei et chiengin tuipi dum dide tawpna neilou bangin ka gâl mukhie a, tuipi eng dingdeng khu ka et chiengin ka mit a dam hieihiei mawh hi. Kahing kumsuh uh a, mun khat tui sien kilkel na mun ah ka kingap chiet uh a, tuipi tung ah ka kilâm kawikawi hi. Khumi mun ah, kuong nêunêute ana om a ka kitawl lele kawi hi. Tuipi sung a ka kizâp na amasa pên ahiziehin ka zâu sim mawh hi. Ka kam sung a tui ahing lut chiengin chi bangin a hlum(al) hi. Tuamun apat in ka pei uh a, SDOpu S.M.Ali DANICS officerpa inn ah ka tung u’a, ama in ann tuitah ahing nesah uhhi.
Annêh zaw in,têmbawpi zuon in kuong Jetty apatin kuong nêute sungah ka tuongkiata uhhi. Ka hing kile lang un, huipi a lânsie mama,a a sua mama hi. Khuziehin, ka kuongnêute uh pên tuipi kinîl leh kinawng in a suh le a toule tamawh a, ka kuongnêute uh pên kibungdoh dîng dinmun ah ahing omta hi. Theichîl leh tuochîl chitahma, ka dîp kuotkuot na in ka sisan kiem va hiau leh a kilawm hi. Kibungta mawh leh lah ka têmbawpi uh khawlna gamla na lâi hi a, tuingap(tuizâp) dîng hita leng bangtan ka tungzou diei chimaimai ka lungtang in gêlgêlta mawh hi.

Kalpeni tuikuolgam zuon a ka peina uh
Lungmang leh beidongtah a, ka up lâi un damtah in ka têmbawpi uh khawlna mun ka tungta uh a, tuachiin, Kalpeni tuikuolgam zuon in ka kihawtkiata lêulêu uhhi. Nimit 23 Jan hla zîngmawng nai 9.30 tuom in Kalpeni tuikuolgam ka tungta uhhi. Tamna zong têmbawpi tuipi li lâi ah a kinuasie hi. Kuongnêute sungah ka kitawlkia uhhi. Khum mun ah, tuipi sieng kilkel mun ah khat ah ka va kisilta uh hi.

Kavarati tuikuolgam Lakshadweep khopi ka zotna uh
Nimit 24 Jan hla zîngmawng nai 10.00A.M in Kavarati tuikuolgam ka tung uhhi.
Tamnah zong kuonngnêute ah ka kumsuh u’a Jetty lam zuon uhhi. Guest House nuom mama khat ah ka zintung uhhi. Kavarati pên Lakshadweep UT a dînga Headquarters/Capital ahi. Aletdân pên 4x6 sq.km beh ahi. Mun nêunou khat ahi. Tammun ah Administrator khat a um hi. Amite ahileh Muslim sahkhuo zui leh biehna awi ngen ahi uhhi. Lakshadweep Tuikuolgamte anêu alien sim in 30,000(tûlsawm) tuom om ahi. Amite pên mivom lam ahi uhhi.
Kamzah leh mising
A kamzah uh pên Malayalam toh kinâi mama ahi a, hizongleh amauhte hâm a tuom vilvel hi. Tam tuikuolgam teng a ami mising omza ahileh 60,000 tuom ahi.
Tuikuolgam zousie ah mite tênglou hi. Mite tênna tuikuolgamte ahileh; Minicoy, Kavaratti,Bangaram,Kalpeni,Aggati chite ahigiap hi.
Adangte pên ah mi tênglou hi.
Nêh leh tâhte
Nêh leh tâhte pên a gumthei mama hi. Atângpi in bu a ne uhhi. Sa leh nga chite zong a ne uhhi. Antelouhing(vegetables) pên vâng mama ahi. Tuikuolgam pên aleite chitui in a tap ahimanin antelouhing pieng theilou phiel ahi. Antete khu gampi(mainland) apat a hing kipolut let ahi. Tualâi(tuh) hun chiengin, hui leh guo hât mama ahiziehin, têmbawpi hing luttheilou zêl hi. Tua hun chiengin antelouhing a nêpha sih uh a, dâl,havâi,leh alu pou toh a luhing uhhi. Lakshadweep apat in M.P. khat India Kumpi Vâihawmna ah a tou hi.
Lakshadweep tuikuolgamte pên asândân tuipi toh kikim phiel ahimanin, gamsa gam hi. Tuikuolgamte nêuthei mama ahiziehin kêng a, i pei leh zong a monglam kitung paingâl ahi. Mawtaw thum leh li bang a um hi. Cycle a kihazah pên hi.
Tuidawn siengthou vâng mama hi. Kisilna tuite khu chi al tam sêngsêng in i kisil leh zong i sam ham phêphaw(vaket) hi. Leikuoh mun khatteng ah tuisieng a toudoh zêl uh hi. Tuachi lou,tuinêh dîng om lou ahi. Zubi kung tampi a om a, mite’n tua khu kivâna a nei uh ahi. Âh,bawng leh kêlte a khawi uhhi.
Nimit 25 Jan hla ni in tuipi gei ah ka va kawikawi uh a, ka va kizapta uh hi.
Nimit 26 Jan ni in Republic Day Parade zang dîngin Public Parade Ground ah ka va tel uh hi. Nitâh in Administratorpa Rajiv Talwar Bunglow ah Tea Party ka va mangta uhhi.

Aggati ka zotna uh
Nimit 27 Jan ni in Aggati zuon dîng Kavaratti nuasie in Helicopter ah ka lêngta hi.

Bangram tuikuolgam tourist munpi ka hawna uh
Aggati tuikuolgam apat in Bangram tuikuolgam haw dîng in kuong(boat) ah tou in ka pei uh hi. Bangrram tuikulgam ah coralte(tuikeppâh) atam mama hi.
Tuikeppâhte khu tuipi nuoi sung ah apou uh hi.Pâpete ahilouleh loupate pou bangin a pou uhhi. Tuipi sungah ka kûllut suh a, ka et chiengin khumte a zêm(dong) tuomtuom a om hi; asan, nâingêh(ankampa),a kâng kilkel chite ka mu hi. Tuipi kinîl dungzuiin amate zong loudawng sâute hui in a sêm chieng a a kinîl bang un a kinîl dieldiel uh hi. Tamte sungah ngate a busa uh hi. Tuikeppâhte a shi chiengun suong a suoh u’a tuipi sungah muol a vumsah uh hi. Lakshadweep tuikuolgamteng hichi banga tuikeppâhte in a piensah ahi. Tuazieh a , Lakshadweep gam pên Tuikeppâh Tuikuolgamte(Coral Islands)zong kichi ahi. Tuipi sieng singseng sungah ka kizapzap mai uh hi. Ka kisilzou un motel nêute ah ann ka nê uh hi.

Cochin ka zotkiana uh
Sunzou in, Aggati nuasie in vanlêng ah ka tou u’a,tuachiin Cochin ka zuonkiata uh hi. Vânlêng apat a tuipi ka et suh chiengin tuikuolgamte ahing nêu deudêu a, ahing sân bep in, tua tuikuolgamte pên khitang kithêzâh bangin tuipi tungah a lâm ka mu suh hi.
Hun khat zou in ka ensuh kia leh bangma ka mu nawn sih a ,tuipi dum dide maimai ka mu giap hi. Nai khat leh a kim ka khuchi lênzou un Cochin vânlêngsai ka tu uh a, Cochin khopi a om; Hotel Sun International ah ka zin tungta uh hi.

Chennai ka zotna uh
Nimit 28 Jan hla ni in Madras(Chennai) zuon in Cochin ka nuasieta uh hi.Perambur meilêngsai apat in Andaman House ah ka vâitung uh hi.

Chennai khopi ka tunna uh
Misiengthou Thomas(St.Thomas) Muol ka etna uh

Nimit 29 Jan ni in Chennai khopi ka vê uh hi. Amasapên in St.Thomas Muol ah ka va hawta uh hi.Tua mun khu mun sâng sim ahi. Khunah, Bieh-inn khat a um a, St.Thomas Church akichi hi.Tam mun a, Mângpa Jesu nuazui St.Thomas kithat ahi chi in a kigiel hi. Tua bieh-inn sung ah ka lut a,thungetna ka nei hi. A mâitâm lang ka va nâi a, khumi mun ah misiengthou Thomas relic(gu nêu khat) sumsan singlâmte sung a kikoi ka va mu hi.
Khumi mun pan a Chennai khopi ka et suh chiengin innte vâupa bang in apâ phitphet hi. Limte ka la uh a kahing kilekiata uh hi.

Nimit 30 Jan ni in tuipi gei kung a kilam MGR hlânmuol memorial enkhe dîng ka kuon uh hi. Marina Sea Beach(Marina tuipi gei) ah ka vâh kuolkuol kawi uh hi.
Chennai khu gamsa gam ahi. A sâlevot 32°C tunglam ngen ahi. A mite pên Tamilte ahi uh hi. Mivom mama lam ahi uh hi.

Hindute Bieh-inn liente leh Pu.Rajiv Gandhi theizingna suongkhuomte ka etna uh
31 Jan hla ni in Chennai apat in tourist bus ka man u’a VGP, Mahabali temple, Kanchipuram temple te ka va enta uh hi.Kanchipuram temple pen India sunga dînga Hindu temple minthang khat ahi. Ataw apatin a tung a zumtou a, Pyramid lim a bang hi. Tua temple bângte ah a biehte uh lim akikhêng hi. Adieh in,Ram,Sita,Hanuman leh adangdangte a tuongsah uh hi. Lim kikhêngte ka et chiengin a limkhên siemdân(art) uh a kilang hi. Ka hing kile a lang un,1991 kum May 21 ni a Rajiv Gandhi kithâna mun Sriperumbudur ah ama theizingna suongkhuom kiphutte ka va en uh a, a thupi mama hi. A khuom khat pên feet 30 a sâng ahi. Tuami mun lâikimtah ah ama lim koina bûh khat a om hi. Anitâh in Chennai ah ka hing kilêkiata uh hi.

Andamana tuikuolgam zuon a ka peina uh
Ni 1 ni Feb hla 1996 zînglam nai 10 tuom in Chennai apatin in Andaman tuikuolgamte zuon dîng un têmbawpi ah ka hing tuong u’a ka hingpeita uh hi. 2nd Feb1996 Bay of Bengal tuipi tungah ka mang uh hi. 3rdFeb1996 tuani zong Bay of Bengal tuipi tung ah ka mang uh hi. 4 Feb zîngmawng nai 8.30 am in Hado Port Blair ah ka tung uh hi.
Ka senior officerte in ei na lamdot uh hi. Andaman Teal Guest House ah ka vâitung uh hi. Port Blair pên Andaman tuikuolgamte khopi ahi.

Gammite leh midangte mising
Ami omza lakh 3 vêl ahi. Bengali, Tamilian, Oriya, Malayalee te a tam pên uh hi.
Andaman tuikuolgam pên gamsa gam ahi. A sâlevot digiri 30 tunglam ngen ahi. Gam vot hun omlou ahi. Guozuhna mun ahi.
Singtâng mite ahileh Sentinelese,Shompen,Andamanese, Jarawas,Onges,NIcobarese chite ahi uh hi. Shompênte leh Nicobaresete pên Mongoloid mêl ahi uh hi.
Adangte pên Negroid nam ahi uh hi. Tamte lah ah Nicobaresete akhangtou pên uh hi.

Jolly Buoy tourist mun ka hawna uh
5 Feb ni in Sippighat AgricultureFarm ah singnou ,antelouhing kichîngte ka va enkheta uh hi.Khumna apat in Jolly Buoy tuipi gei zuon in ka pei uh hi.Jetty apat in special kuong khat ah ka tuong uh hi. Ka peina uh tuitung khu muol’leh muol kikâl abang a a ka ziet ka vei uh ah singmângte apou uh hi.
Minit 45 jou in JollyBuoy ka tungta uh hi. Kuongnêute ah ka kumsuh uh a tua tuipigei ka zuon uh hi. Tua tuipigei pên nuom mama ahi a gêndân dîng a um sih hi. Tuite sieng kilkel, vâm singseng, luitui luong bang dân khat zong a om hi. Tua tuipigei ah sawtpi khat ka kisil uh a ka kizâp uh hi. Tua tuipigei ah bibûh tampi a kilam a satin bangin a kitung uh hi. Tuipi langkhat lam apat a ka et chiengin a dum dide a atawpna a kimupha sih hi.I et leh i mit dam hieihiei mawh hi. Huisi lâng in i tahsa ahing sêm chiengin nop mama hi. Lim tampi ka kila hi. Nai 1 gin in ka hing kilêkia u’a nai 3.30 in Andaman Teal Guest House ka tung uh hi.

Port Blair Dockyard,Ross tuikuolgam leh mun dangdangte ka vena uh
Ni 6 ni Feb hla1996 ni in Port Blair Dockyard lah ah ka kitawl kawikawi uh a Navyte tembawte leh mun tuomtuomte ka nkuol uh hi.
Khumjou in, Ross Island enkhe dîngin ka va lutta uh hi. Tua Ross tuikuolgam pên 1930,1940 kum hunlâi a British(Mângkângte) kumpi in Hqtr a ana man mun ahi.Khumlâi a, a innte uh, a ki-apmaina munte uh,akisilna uh mun,a bieh-inn uh, a hânmuol uh, a vankoina munte uh dâi dide in tulpân a kâi siengta hi.
Tua mun ka enkhiet a ka lungsim ahing khoi silthum a om hi. Tuateng ahileh, Mângkângte kisilnamun(swimming pool), lâmna mun(ballroom), leh Bieh-inn (Church). A kisilnamun uh adung avâi feet 15 leh feet 40 pha hi. Athûhdân feet 10 in a thûh hi. Alâmnamun uh club hall bang in a kilam hi.Azawl lam uh ahi. Abieh-inn uh pên aletdân alâi lah ahi a , tam in a etsah ahileh tuahunlâi in tam tuikulgam ah mitampi a na omlou hidîng a gintâthuoi ahi. Tami bieh-inn pên amâilam akitoukhaw a adawn ah singlâmte lim a kiphut hi. Mawngsingte in, a poukhumta a a bângte leh a mâilamte singbate leh singhuite in adêpsuhta a, a kântawmta a,a poukhumsiengta a, sawtlou a chîmkhê dîng dân in a omta hi. Tamte ka mu chiengin, khumhunlâi a a lim ding dân uh leh a nopsah ding dânte uh ka lungsim ah ahing kilang hi. Laisiengthou in a gên bangin leisiet khu a thupina toh bei dîng ahi chite tam mun a tung ahimai hi chite ka hing theikhie hi. Lim tampi ka kila uh hi. Khuna apat in kuongpi ah kitawl in harbour cruise ka pei kuolkuol uh hi. Harbour munchin teng ah ka vâh kawikawi uh hi.

Chaltham Saw Mill; Asia gamphêng a sawmill lienpen ka etna uh leh Chiddiyatappu tuipigei ka hawna uh
Tuazou in,Asia gam sunga Saw Mill lienpên Chaltham Saw Mill ka va enta uh hi.Ni asa mama hi.Ann nêhzou in Chiddiyatappu ka zuon uh hi.Port Blair apat in km 28 tuom ahi. Chiddiyatappu khu tuipigei ahia anop mama hi. Radhanagar tuipigei ah ka va khawlta uh hi. Tuami mun ah tombuh 6,7 vêl a om hi. Tuanah gamdangmite(foreignerte) abusa uh a agieh uh hi.Limte ka kila kuolkuol a , nitumkuon in zong ka kila hi. nai 6.30 Pm in kahing kilêkiata uh hi. Tuami ni nitâh in Seawaves,Corbyn’s Cove ah ka senior officerte’n dinner party ahing meipieh uh hi. Anop mama hi.

Havelock tuikuolgam a ka va giena uh
NI 8 ni Feb hla1996 ni in Special kuong man ka liason officerpa uh Raju Thomas toh Havelock tuikuolgam nai 7.00 tuom in ka zuon uh hi.nai 1.00 tuom in Havelock tuikuolgam ka tung uh hi. Dolphin Yatri niwas ah ka zingtung uh hi. Ni 9 Feb hla in Havelock tuipigei ah ka kisilta uh hi.Tuikep leh tuikeppâhte ka khawm uh hi.

Port Blair ka zotkiana uh leh Port Blair swimming pool a ka hawna
Nai 2.30 pm in Jetty ka zuon uh a port Blair zuon in ka hingpei kiata uh hi.
Nai 7.00 zân in Port Blair ka hing tungta uh hi. Ni 10 Feb nai 7.00am in Rajkumar toh Port Blair Swimming pool ah ka va kizâpta uh hi.

Cellular Jail ka vena leh Corbyn’s Cove a ka va kisilna uh
Sûnlâi in senoir officerte kimupi dîng in Secretariat ah ka va vâhta uh hi. Tuajou in, Cellular Jail ka va ve uh hi. Ni 12 Feb hla ni in Sudakar toh Corbyn’s Cove beach ah ka va ta u’a ka va kisilta uh hi. Suong tung lah ah nga sui in suong sung khat ka sawh leh,jelly fish in ei pet a,a na mama hi. Ka guolpa Sudakar in hospital ah ei na zawpi a,injection khat ei kikâp hi.

Lt.Governor toh ka kimutuona uh
Sûn ann nêhzou in Liason Officerpa toh LG kimupi dîng in ka va hawta uh a
ka kihoulim uh a,lim ka kila uh hi.

Kolkatta khopi ka etna
Ni 13 Feb hla ni in Port Blair airport ka zuon uh a , 1.30p.m.in Kolkatta zuon in ka lêngta uh hi. Naikâl ni zou in Kolkatta airport ah ka tu uh hi. Manipur Bhawan room no 615 ah Sudakar toh ka tung uh hi. Ni 14 Feb hla ni in Sudakar a peita hi. Kei pên ka om den a, Calcutta( Kolkatta) khopi en dîngin ka vâh kawikawi hi. Kolkata Metro rail ah ka va tuong hi. Metro train pên leinei a tâi ahi. Ka lut kuon in ticket khat ka lei a, tua pên lutna ticket ahia, lut chienga a thunna munkhat a, i thun leh kotlutna ahing kihong in tuachiin a sai ah ka lutthei hi. Metro train pên leinei a tâi ahia, i lutkuon chiengin meilêng kot ama leh ama ahing kihong hi. Minit khat tuom sung hun a kilutpai dîng ahi. Atâi sua mama a a nuom mama hi. Victoria Memorial Hall,Alipur Zoo,Park street, Chandni Chowk,Super bazar leh Calcutta(Kolkatta) Book Fair ka va enta hi. Ni 15 Feb hla in Alipur Zoo, howrahBridge,etc...ka va enta hi.
New Delhi ka zotna
Ni 16 Feb hla zîngmawng nai 7.00 gin in Howrah Rlwy station ah Poorva Exp. ah kahing tuong a Delhi lam ka hing zuonta hi. Ni 17 Feb hla zîngmawng nai 8.30 in Delhi ka tung hi. Tuachiin ka All India Tour uh a beita hi.

No comments: